နးမုၪအဲၩ့ဒဲ စၥူၫလဲၫ့ (၂)

ၦလၧအဲၪဒိၭခိၭနၪၦဖျိၩ့ၡါဖိၪလၧ အၫဘ့ၫအ့ၫဆၧရၩလၩ့ ထၧၫ့ဖုဝဲဖျိၩ့ဖိၪၥံၪလဖၪထီးလူၬ အီၪဆီၪ့အီၪချဲၫ့ကိၭဂၩဒ့ၭနဲၪႉ လၧအဖီၩ့ခွံၬမုနွ့ၫဒံၭဒၪအိၩ ယလီၩဖ့ၪနဲၪထၬအ့ၪနၥံၪ နးမုၪအဲၩ့ဒဲ စၥူၫလဲၫ့ၡါဖိၪနီၪ ထီၩ့လၧ နးမုၪအဲၩ့ကျ့ၭစၨၭထၬထၪအထီ နၭဂၧၫ့ဆၧအလူဖၭဒိၪၡိၪဆၧတၭ အၪ့န့ပနဲၪ့တၨၩ့ ခ့ၭယိဝ့ၫအခၫ ဒၪဘၪလၧ ဆီၩ့မုဖၭဒိၪကဘီၩ့ ဆဲၪ့လၪ့ထၬအနိၪဝါဂီၩ့ ယိထၪ့အဝ့ၫလီၫႉ ကထုၪ့ဎး နးမုၪအဲၩ့ၡူးဖျးဂီၩ့ ဆီၩ့မုဧ့ ဘၪန့လဲၪ နဘၪဂဲၫလၧယအီၪ ယၥၭမဲၪနၧၩ ဂဲၫလၧယနဲၩ့ထံၭလဂ့ၩႇ အနီၭဘိၭ ဆီၩ့မုဖၭဒိၪနီၪ စံၭဆၧၫ့ထဲၩ့နးမုၪအဲၩ့ ဖုမုၪ နးမုၪအဲၩ့ဧ့ ယအဲၪဘၪနၧၩ ယံၬဒ့ၭယူၭ ခီၫလၧ နထၪ့ၡါလၧ စၥူၫလဲၫ့အိၩ ယၥၭထ့ၬဖၭ ဎွ့ၩပၥ့ၪလဲၪ နၥ့ၪယၫအ့ၬ ဘဲၫယီၩ ယခွံၬလၩ့ယၥၭ ယမိအီၪဎုၬယူၭလနၧၩအကၠီၩ့ နဝၩၥၭဘီၩ့လအီၪဘၪအခံၫ့ ယဘၪဂဲၫကိၭနၧၩ အခံၫ့ဘယီၩလီၫႉ

            နးမုၪအဲၩ့လဂၩ နၭဂၧၫ့ဘၪဆီၩ့မုဖၭဒိၪအဆၧချဲၩ့ဘဲၫယီၩအခၫ ၥၭမဲၪဝ့ၫဒၪ ဝၭထိၬဝၭဂုး စံၭထဲၩ့ဝ့ၫ ယၧၩဝ့ၫ ယဝၩအီၪယူၭ ယထဲၩ့ဖိၭနခဲၫ့ မငၭလၧၩ့အ့ၬ လီၩ့မၩထီးထၬယၧၩလဂ့ၩ အၪ့ယၫဝ့ၫအမံၩ့မံၩ့လါနၫ့ဂ့ၩ မွဲဆီၩ့မုလခိၭနၪဘၪဒဲ ဘဲၩ့ဝ့ၫဒၪဂီၩ့ ထဲၩ့ကၠူၭန့ဝ့ၫလၧအဖၧၩ့လီၫႉ  နးမုၪအဲၩ့လဂၩ အၪ့ယၫဂူဖၭဒိၪယီၩ အမံၩ့မံၩ့လါနၫ့ မွဲန့အ့ၬဘိၭ အ့ၪမွဲအဝၩၥၭဘီၩ့စၥူၫလဲၫ့ ဂဲၫထဲၩ့အခၫ ဘဲၫကၥ့ၪယၫဝ့ၫဒၪ အဂဲးအဖးအကၠီၩ့ အဝ့ၫလံၬထၬ ဖဲၫ့စ့ၩနီၪကွဲၪလၩ့ဝ့ၫဂီၩ့ ကိၭစိၩ ထိၪလွံဖိၪနီၪလီၫႉ ထိၪလွံဖိၪနးဆ့ နါဂၧၫ့စိၩ နးမုၪအဲၩ့အလူကထုၪ့ဎး ဂဲၫယူၩထီၩ့ဝ့ၫဒၪလၧ နးမုၪအဲၩ့အနဲၩ့ထံၭလီၫႉ  နးမုၪအဲၩ့ဆ့ ထိၪလွံဂဲၫထီၩ့ကထုၪ့ဎး ဒုၭလံၬလၪ့အ့ၪဝ့ၫ အဝ့ၫအဖဲၫ့စ့ၩနီၪဂီၩ့ အၪ့မၧၫ့ဝ့ၫ လ့ၩလီၩ့အ့ၪအဝၩစၥူၫလဲၫ့ ဆီးမုဖၭဒိၪ ထဲၩ့န့ဆီၪ့နီၩ့အဝ့ၫအကၠီၩ့ လနၧၩ့ဘၪဝ့ၫတၭ ဘၪထဲၩ့ဖိၬဝ့ၫအခဲၫ့ အၪ့မၧၫ့ယဝၩၥၭဘီၩ့ ဂဲၫမၩဆၧၩ့ယၧၩ ဖျဲၪဖျဲၪအကၠီၩ့ အၪ့မၧၫ့ထိၪလွံလ့ၩလီၩအ့ၪနီၪလီၫႉ ဂီၩ့နီၪ နးမုၪအဲၩ့လဂၩ ဘၪထဲၩ့ဖိၬဂူအခဲၫ့လၧ အဖၧၩ့နီၪလီၫႉ  ထိၪလွံဖိၪနးဆ့ လံၬလၪ့ထၬ နးမုၪအဲၩ့အဖဲၫ့စ့ၩနီၪဂီၩ့ လ့ၩလီၩ့ဎွါစၥူၫလဲၫ့လၧ ထယၬဝ့ၫဒၪအီၪအလးနီၪလီၫႉ ဘဲၫနးမုၪအဲၩ့ မၫလူၬထၬအၥိၭ ကိၭဆၧလီၩဎွါဝ့ၫ ႉႉႉတကူၩကူၩ ကူၩ ႉႉႉနးမုၪအဲၩ့ ဆီၩ့မုဘဲၩ့

ထၧၫ့ဖုဝဲမုၪခွၫၥံၪဧ့ မုကနွ့ၫယီၩပကအီၪပထုၬထၬ ပၡါဖိၪယီၩ အလးထယီၩဂီၩ့ ထိၪလွံဖိၪယီၩ လ့ၩလီၩ့ဎွါစၥူၫလဲၫ့ ဒၪဝ့ၫဧၪ ၡါဖိၪယီၩ ပကဂဲၫကဲၪထၪ့ထဲၩ့ဘဲၫၥ့ၪလဲၪနီၪ လခဲၫမုနွ့ၫမၬ ယကဆုးလီၩ့ဖ့ၪနဲၪထဲၩ့ဘၪနၥံၪနဲၪႉ