နးမုၪအဲၩ့ဒဲ စၥူၫလဲၫ့ (၁)

ထၧၫ့ဖုဝဲဖျိၩ့ဖိၪၥံၪဧ့ မုကနွ့ၫယီၩ ၦဖျိၩ့ၡါဖိၪဆၧထံၫလၩ့ဒီၪလၩ့အဖၧၩ့ ယမိအၪ့နၩ့လီၩ့ဖ့ၪနဲၪ ဘၪနၥံၪ နးမုၪအဲၩ့ ဒဲစၥူၫလဲၫ့ၡါဖိၪနီၪလီၫႉ လၧဖျိၩ့ဖျိၩ့အိၩ ၦဖျိၩ့တဝၫ့ကတဝၫ့နီၪ ပကိၭဝ့ၫအမံၩ့မွဲဝ့ၫ နးမုၪအဲၩ့ဒဲ စၥူၫလဲၫ့ ၦဖျိၩ့ၥၭဘၪ့ ထၧၫ့မၫဝၩအီၪဝ့ၫနံၫဂၩလီၫႉ အဝ့ၫၥံၪထၧၫ့မၫဝၩနံၫဂၩယီၩ မၩအၪ့ဖံၭ အၪ့ဂ့ၩဂ့ၩဘၪဘၪ မၫၥၭဘီၩ့နးမုၪအဲၩ့ဝ့ၫဒၪ ထၬထၪ အဝၩၥၭဘီၩ့စၥူၫလဲၫ့ဝ့ၫဒၪ မၩဖနံၬထးကၩ အဆၧမၩလၥၨၩႉ

နးမုၪအဲၩ့နီၪ မွဲၦဖျိၩ့မုၪလၧ အဎံၫလၩဝ့ၫဒၪလဂၩအကၠီၩ့ တဝၫ့နဲၩ့ထံၭလကၭဘၪ ၦၡၩအၪ့ အူၭထၪ့အၪမၬလီၫႉ အဝ့ၫနီၪ ဘဲၫဎံၫလၩဝ့ၫအၥိၭ အတခ့ၭဖဝၭမွဲဂ့ၩဆ့လီၫႉ နးမုၪအဲၩ့ယီၩ ခီၫလၧစၭထၪ့အီၪဎုၬၥၫ့လၧ စၥူၫလဲၫ့နီၪ လၧအဝၩၥၭဘီၩ့အဖၫ့ခိၪ ဂံၪ့ဒီၪ့မူၩဒၩလၩ့ထူၭဝ့ၫကိၭမံၩ့ အဝၩစၥူၫလဲၫ့နးဆ့ မွဲအဲၪအမၫၥၭဘီၩ့ လဘျဲၩ့ဘၪနးကၠၪလီၫႉ

အ့ၪမွဲနးမုၪအဲၩ့ထၬထၪဘိၭ အဝၩၥၭဘီၩ့ မၩအ့ၪလူၫ လီၩ့မၩဆၧၩ့အမၫအဆၧမၩကိၭမံၩ့ အီၪလၧအမၫအနဲၩ့ထံၭ လ့ၩနးပၫအ့ၬစွါဘဲၫႉ

လါနၫ့ စၥူၫလဲၫ့လဂၩ အီၪဘၪလၧနးမုၪအဲၩ့အနဲၩ့ ၥၭလဆိၩယၫအ့ၬႉ ဂံၪ့ဒီၪ့ကဒီၪ့နီၪ ခီၫ့ၡၩအနိၫ့နးဆ့ မွဲအရ့ၩ ဒိၪဆ့အ့ၬဧၪႉ အနီၭဘိၭ အကနံၩ စၥူၫလဲၫ့လဂၩ အဂံၪ့ဒီၪ့ခီၫ့ၡၩအဂး ဘၪလ့ၩဖနံၬထးကၩလၧခးဂူၫဂၩလၧ ကဘၩ့လီၫႉ လ့ၩဖနံၬ ထးကၩဘဲၫယီၩၥိၭအခၫ အီၪက့ၪထး အ့ၪအမၫၥၭဘီၩ့ ဆၧအၪ့ဆၧအီၩ့ အလၧၫ့အဎွ့ၩလီၫႉ အဝ့ၫၥံၪနီၪ အထိၪလွံအီၪဝ့ၫ ကဘံၪ့လီၫႉ နးမုၪအဲၩ့ယီၩ အ့ၪမွဲအဝၩၥၭဘီၩ့လ့ၩ ဖနံၬထးကၩယံၬ နၪ့ထၪ့ဝ့ၫအခၫ အၪ့မၧၫ့ယံၩယါ ထိၪလွံယီၩ လ့ၩလီၩ့အ့ၪအဝၩ ၥၭဘီၩ့ အဝ့ၫနၪ့ထၪ့ အၪမၬအကၠီၩ့နီၪလီၫႉ

အနီၭဘိၭ ထိၪလွံနးဆ့ ဂၪ့ကိၭထၪ့ ကူၩကူၩကူၩကူၩဂီၩ့ လီၩ့ဎွါစၥူၫလဲၫ့ထီၩ့အဒၪဝ့ၫဂီၩ့ လီၩ့ဖ့ၪနဲၪအ့ၪဝ့ၫနးမုၪအဲၩမၫလူၬ အဆၧပရၧၫ့နီၪလီၫႉ ကနံၩနီၪတၭ စၥူၫလဲၫ့ကလ့ၩဖနံၬထးကၩလၧ ခးယဲၩ့အဂး လ့ၩစဲၪ့လၪ့ဝ့ၫဒၪလၧ ကဘၩ့ကဖျိၪ့လီၫႉ စၥူၫလဲၫ့လ့ၩဖနံၬထးကၩအထီနီၪ နးမုၪအဲၩ့အီၪထးလၧဂံၪ့ ထၬထၪကိၭနံၩဒ့ၭလီၫႉကကၠၪကၠၪ အ့ၪမွဲၦၡၩဂဲၫအၪ့မၧၫ့အၪ ထၬဝ့ၫဒၪ ထီးဖိၭဖၪမုလီးဒ့ၭ ကနၩနီၪတၭ နးမုၪအဲၩ့ကျ့ၭစၨၭထၬထၪအထီ နၭဂၧၫ့ဆၧအလူဖၭဒိၪၡိၪဆၧတၭ အၪ့န့ပနဲၪ့တၨၩ့ ခ့ၭယိဝ့ၫအခၫ ဒၪဘၪလၧႉႉႉႉ

ထၧၫ့ဖုဝဲမုၪခွၫၥံၪဧ့ နးမုၪအဲၩ့ခ့ၬယိထဲၩ့အလးခဲၫ့အခၫ ဒၪဘၪမန့လဲၪနီၪ လခဲၫမုနွ့ၫမၬ ယကဆုးလီၩဖ့ၪနဲၪထဲၩ့ဘၪနၥံၪဒဲ လခဲၫမုနွ့ၫပကဒၪဎီၩ့ထဲၩ့လိၬၥၭလၧ ၦဖျိၩ့ၡါဖိၪဆၧထံၫလၩ့ဒီၪလၩ့ဖၧၩ့ယီၩနဲၪႉ