နီၫဘူၫဘီၩခိၪလီၩ့ (၁)

စဎွၩဖၭဒိၪလၧ အပၧၩ့ပၪ့လဲၪနီၪ အဖိၪမုၪအီၪဝ့ၫဒၪကဂၩလီၫႉအဝ့ၫအမံၩ့နီၪ ပကိၭဝ့ၫလၧ နီၫဘူၫဘီၩ နီၪလီၫႉ  စဎွၩဖၭဒိၪအဖိၪမုၪယီၩ ဎံၫလၩဝ့ၫနၭဒဲ့ၭဒဲ အၥုၪ့ဂ့ၩၥၭဘွၩအီၪအၪမၬလီၫစွါဘဲၫႉ အထီနီၪ စဎွၩဖၭဒိၪလၧ အပၧၩ့ခိၪလီၩ့အမံၩ့မွဲဝ့ၫ စီၩကံၩကူၫနးဆ့ မွဲအဖိၪခွၫအီၪဝ့ၫဒၪကဂၩလီၫႉ အဝ့ၫအမံၩ့နီၪမွဲ စီၩၥီၩယီၩခွၩနီၪလီၫႉ မွဲၦလၧအစီၩ့အမၩ့ဎိၩဒိၪလဂၩဒဲ အမိၥၭဘီၩ့ဒဲ အဖါၥၭဘီၩ့နံၫဂၩ အၪ့ဎၬထၪ့ဝ့ၫဒၪ ကမိဒုၭအီၪဎုၬအဖိၪခွၫယီၩလၧ နီၫဘူၫဘီၩနီၪလီၫႉ လၧခဲၫ့ ဘဲၫအဝ့ၫၥံၪအၪ့ဎၬထၬအၥိၭ စဎွၩဖၭဒိၪစီၩကံၫကူၩအဖိၪခွၫ စဎွၩဖိၪစီၩၥီၩယီၩခွၫနီၪ ဒုၭအီၪဎုၬထၪ့ဝ့ၫဒၪလၧ နီၪဘူၫဘီၩနီၪလီၫႉ

            စီၩၥီၩယီၩခွၩနီၪ အီၪလၧနီးဖၧၩ့ လၧကံၩကူၫခိၪလီၩ့နီၪလီၫႉ နီၫဘူၫဘီၩလဂၩ ထၪ့ၡါလၧ စီၩၥၪယီၩခွၩဂီၩ့ အခၫ ကဘၪထဲၩ့အီၪဖိၬအဝၩၥၭဘီၩ့အခဲၫ့လၧ ခိၪလီၩ့နီးဖၧၩ့တၭ နီၫဘူၫဘီၩ အမိမိဖ့ၪလၫ့စိၩအဖိၪမုၪ ထံၫလူၫကၠၭကူၩဒဲ ဂုဆၫနီၪလီၫႉ ဂုဆၫကဖျိၪ့နီၪ မၩထ့ၬဖၭဝ့ၫနံၫကဲၩ့ဂီၩ့ အၪ့မၧၫ့အဖိၪမုၪအၪ့ဖီၫ လဂီၩကကဲၩ့ လဂၪကကဲၩ့နီၪလီၫႉ ဂုဆၫအဖျိၪ့ဖိၪကကဲၩ့နီၪ အ့ၪထံၭလၩ့အၪ့ဖီၫ့လၧ ဆၫ့ဒံၪကူၩဖၧၩ့စွါဘဲၫ ထၧၫ့ခၩဒၪၦၡၩကအၪ့ လူၬန့အ့ၬစွါဘဲၫႉ အနီၭမွဲဝ့ၫ နီၫဘူၫဘီၩ ဂဲၫထဲၩ့န့ ခီၫ့အဲၩ့လၥၨၩႉ လကၭဒံၭဘၪ အဝ့ၫ ထီၫ့ၥံၪ့ခွံၫပၫကဘံၪ့ဒံၭစွါဘဲၫႉ ထီၫ့ၥံၪ့ခွံၫယီၩ အ့ၪမွဲဆၧခံၭအကျၩ ပျၩ့အၪမၬလီၫစွါဘဲၫႉ အနီၭကၭဒံၭအ့ၬႉ ၥံၪ့ခွံၫယီၩအစီၩ့အမၩ့ဎိၩဒိၪဝ့ၫအၪမၬလီၫႉ အ့ၪၦၡၩထၪ့ ယဲထၬစွါဘဲၫ ၦၡၩယီၩလၩ့မါ ၦၡၩဒၪၥ့ၪလၧၩ့အ့ၬစွါဘဲၫႉ အနီၪတၭ ၥံၪ့ခွံၫယီၩ ဖ့ၪလၫ့အ့ၪအဝၩၥၭဘီၩ့ လၬဆီၫ့နီၪလီၫႉ

            စီၩၥီၩယီၩခွၩနးဆ့ လ့ၩစဲၪ့လၫ့ဒုၭဆၧအခၫ လ့ၩန့ထဲးထီၫ့ၥံၪ့ခွံၫယီၩလၥၨၩႉ ထၪ့ယဲးထၬ ထီၫ့ၥံၪ့ခွံၫယီၩဂီၩ့ မွဲဒုၪဒၩၥံၪ ဒၪအဝ့ၫၥ့ၪအ့ၬဘိၭ ဆၧဒုၭၥုၭကိၭကၠၪနီၪ အဝ့ၫနၧၩ့ဝ့ၫလီၫႉ  အထီနီၪ လၧနီးဖၧၩ့နီၪ ပၧၩလၧ ဒၪနီၫဘူၫဘီၩလအိၭဘၪ အီၪဝ့ၫအၪမၭလီၫႉ အမံၩ့ၡါစဎွၩအဲၪအဝ့ၫနၭဒ့ၭနီၪ မွဲပၫဆ့လၥၨၩႉ