နိၪတၧၩ့ယါလီၩ ပၫဝ့ၫဒၪဆၧလဖၪ အခီၫပယီၫ

အလွ့ဝီၩ - ဆၧၥုၪ့ဒူၩၥၭဒူၩ အဆၧနဲၪ့တၭ မွဲဆၧကဘၪၥိၩ့ကြၩ့ မၩမၪဆၧလၧ ဆၧအၧၩ့ဆၧၥၫ့အဂးအ့ၬႉ မွဲဆၧကဘၪဒူၩလၧ ဆၧမွဲဆၧတီၩ ဆၧတီၩဆၧလီၩ့အဂးလီၫႉ

အလွ့ဘွၩ - မွဲၥၭမၧၫ့ဆံၫ့အဎံၪ အဂ့ၩအဘွၩ အတီၩအလီၩ့အဆၧနဲၪ့လီၫႉ ၦဖျိၩ့လဖၪ မွဲၦလဖၪလၧ အၥၭမၧၫ့ဆံၫ့ဎံၪဂ့ၩဘွၩ စၭထၪ့လၧအၥၫ့ခၪ့ထံၭနီၪ ပၥ့ၪယၫဘၪလၧ ၡါလဖၪဒဲ ထၭခိၪလဖၪအဖၧၩ့လီၫႉ

အလွ့လၫ - မွဲဆၧနဲၪ့လၧအတီၩအလီၩ့ အဂုးအခၧၫ့နီၪလီၫႉ ဆၧအလွ့လၫဘၪ့လၧအအီၪလၧမူၭဖိၭဖၪ့နီၪ ဆၧအုၪ့လဖၪအ့ၪမၩထံၭထၬ ပဒၩ့ကၭဘံၭထၬ ဘဲၫအံၩဘဲၫအိၩ လါနၫ့ လၧခဲၫ့ထုၬအဝ့ၫအဆၧတီၩနီၪ အီၪဖျဲၪထၪ့ထဲၩ့အၥိၭ မွဲဆၧဂုးဆၧခၧၫ့ လၧဆၧမၩထံၭထၬလန့ဘၪဝ့ၫနီၪလီၫႉ

မုမ့ၬထၪ့ၥၫ့ - မွဲဆၧနဲၪ့ဒဲ ဆၧအၪ့ထၩလၧၦဖျိၩ့ဆၨၩ ကလ့ၩထၪ့လ့ၩထီၫ ဒိၪထုၬကုၭဎွ့ၩလၧ ဆၧလဆၫ့ဘၪလဆၫ့အဂးလီၫႉ

မုလွ့ (၉)  ဘီၩ့ - မွဲဆၧဒုၭနၪ့ထၪ့ထဲၩ့ ၦဖျိၩ့လဆၨၩအဆၧဂဲၫထဲၩ့အီၪဘၪအလးအကျဲၩ ဘၪဆဲၫ့ထံၫချိၬဂူၬဒၩ (၉) လးတၭ ဆၧလဖၪနီၪ မွဲဝ့ၫ ယၫ့စံၫကၠၫ့ ထံၫချိၬဂူၬဒၩႇ ဟိၫထံၫချိၬဂူၬဒၩႇ စ့ၭကၠၫ့ထံၫချိၬဂူၬဒၩႇ ကီၩ့တိၫ့ထံၫချိၬဂူၬဒၩႇ မဲနၫ့ထံၫချိၬဂူၬဒၩႇ မဲခီၫ့ထံၫချိၬဂူၬဒၩႇ စ့ၭတီၩ့ထံၫချိၬဂူၬဒၩႇ ၥၫ့လွ့ၫ့ထံၫချိၬဂူၬဒၩႇ အ့ၫယၫဝတံၫထံၫချိၬဂူၬဒၩ လဖၪလီၫႉ ဆၧအလးလဖၪယီၩ ၦဖျိၩ့ဆၨၩလဖၪ ဂဲၫထဲၩ့အီၪဝ့ၫလီၫႉ

ကျိၪ - မွဲဆၧနဲၪ့လၧအနဲၪဖျီၪထၪ့ ၦဖျိၩ့ဆၨၩအၥၭမၧၫ့အဂဲး ၦဖျိၩ့ဆၨၩအဆၧဆၧးဎံၫဆၧးလၩအဂဲး အဆၧၥ့ၪထၪ့ဘၪထၪ့ ဒဲအဆၧမုၬဆၧၡူၪအဂဲးနီၪလီၫႉ

                 ၦဖျိၩ့ဆၨၩအနိၪတၧၩ့ယါနီၪ မွဲၦဖျိၩ့ထၧၫ့ဆၨၩယၫ အဆၧနဲၪတၭ ဘၪဆၧဘီၩ့ထၪ့ဝ့ၫလၧ ကယဲၦဖျိၩ့ဆၨၩအဘိၪ့လဖၪ အခံးအဂၩ့လဖၪ စၭထၪ့လၧ ခးပယၩ့လန့ဒံၭဘၪဆၧပျီၩ့ဖျ့ၭအထီနီၪလီၫႉ ထီးၦဖျိၩ့နံၪ့ထၪ့ၥၫ့အထီနီၪ ဆၧဘီၩ့ထၪ့ၦဖျိၩ့အနိၪတၧၩ့ယါလၧ ၦဖျိၩ့အဂံၪ့လဖၪတၭ ဆၧမၩလၩဖၩ့ ၦဖျိၩ့ခိၪနါဒိၪလဖၪ ထီးအၥံၫအထီနီၪဆ့လီၫႉ ၦဖျိၩ့နိၪတၧၩ့ယါယီၩ ဘၪဆၧထိးဆၧၫ့ဝ့ၫလၧ ထံၫခးၦဒိၪဒဲ ဆၧဝံနုၬထၬဝ့ၫလၧ F9 1937 နီၪလီၫႉ