နဒၪၥံၪ့အဖံၭလါနၫ့ မၥံၪ့ပၫလဲၪ နလီၩလၥ့ၪ (၁)

လၧကကၠၪအိၩ ဖံၫမုၪၡါလဂၩ အဖိၪခွၫအီၪဝ့ၫနံၫဂၩလီၫႉ ဖံၫမုၪၡါနီၪ မွဲအဝၩအီၪလၧၩ့အ့ၬဘိၭ ဘၪအီၪထးဒၪကၠၧၫ့ကၠၧၫ့လၧ အဖိၪခွၫဖျဲနံၫဂၩလီၫႉ

ယဖိၪခွၫၥံၪယီၩ ဂဲၫလူၫဘီၩ့လါနၫ့ ကမိန့အမၫ လီၩဝ့ၫယနါဂၧၫ့နၩ့ကၠၪအ့ၬႉ ဘဲၫယလၥံၫဒံၭဘၪယီၩ မွဲယဆိၬဘၪယလံၩအဂး ယဖိၪခွၫၥံၪယီၩ မအဖိၪၥၪမုၪ အီၪဧၪ အီၪအ့ၬဧၪ အ့ၪမွဲအီၪနီၪ ယကဖ့ၪခၫခွံၬ လအီၪဘၪနီၪ ယကလီၩ့ဎွါအ့ၪ ဖံၫမုၪၡါယီၩ အၪ့ဎါဝ့ၫဒၪဘဲၫယီၩၥိၭအခၫ ကနၩနီၪ ကိၭစူၭကီၪ့အဖိၪခွၫၥံၪဂီၩ့ အၪ့စၪ့ဝ့ၫဒၪ

ဖိၪခွၫၥံၪဧ့ နၥံၪထၪ့ၡါအခံၪ့ဘၪယူၭ နၥံၪအဖိၪၥၪမုၪၥံၪအီၪအ့ၬဧၪ နၥံၪကအီၪဎုၬအဂး နၥံၪအၪ့ဎၬနၩ့မံၩ့ဒံၭအ့ၬဧၪႉ အမိအၪ့စၪ့ဘဲၫယီၩၥိၭအခၫ ဖိၪခွၫဆံၭဝ့ၫဒၪ လီၩ့ဝ့ၫလမိဘၧၫ့ဘၪလါနၫ့ ယၧၩယဖိၪၥၪမုၪအီၪမိ စံၭဆၧၫ့အမိဘဲၫယီၩၥိၭအခၫ ဖံၫမုၪၡါနီၪ နါဂၧၫ့အဖိၪခွၫဆံၭ အဆၧချဲၩ့ကထုၪ့ဎး ခ့ၭထဲၩ့လၧအဖိၪခွၫဎိၩအီၪ ဖိၪခွၫဎိၩ နၧၩဧီၪ အီၪဧၪ အီၪဒံၭအ့ၬမိမိ အနီၪဘိၭ ဖံၫမုၪၡါယီၩ စီၪဝ့ၫဒၪလၧအၥၭခံဖၧၩ့ ဖိၪခွၫဆံၭနီၪ ဒဲၩ့ဂီၩ့ ဖိၪခွၫဎိၩနီၪ ခိၭနၪမိဖါဆၧချဲၩ့ မိဖါလၥ့ၪယၪဘၪ မၩနးမံၩ့အ့ၬႉ ဖိၪခွၫဆံၭနီၪ မိမၩဝ့ၫမၩဒၪဝ့ၫကဂၩ မဖိၪခွၫဎိၩအဂးနီၪ ယကလီၩ့ဎွါအ့ၪ အမၫႉ

ထၧၫ့ဖုဝဲမုၪခွၫၥံၪဧ့ႇ အနီၪဘိၭ ဖံၫမုၪၡါယီၩ ဒုၭခၫခွံၬ အဖိၪခွၫနံၫဂၩလူၬအမၫလီၫႉ  ဖိၪခွၫဎိၩအမၫအမံၩ့နီၪ မွဲဝ့ၫ နးၡီၫ စွါဘဲၫႉ အမိရွံထၬအ့ၪဂ့ၩဂ့ၩဘၪဘၪႉ အဝ့ၫနီၪ ဂ့ၩနီၪ မွဲဂ့ၩ ဎွံၪဎွံၪဖျဲၪဖျဲၪမွဲအီၪ ဆ့စွါဘဲၫႉ မအဖိၪခွၫဆံၭအမၫနီၪ အမံၩ့မွဲ နးလိၫ့မိ အဝ့ၫနီၪ ဂ့ၩနၭအ့ၬ အီၪဝ့ၫၥ့ၪယိၩယိၩဖိၪ ချံၫ့ချံၫ့ဖိၪလီၫ ဒဲမၩဆၧဖံၭဆၧမၩလီၫႉ

အနီၪ ဖံၫမုၪၡါဘၪအၥၭအ့ၬႉ အ့ၪမွဲဒၪၦၡၩကဂၩဂၩစွါဘဲၫ ဘၪလီၩ့အဒဲၪ့ၥံၪအဂဲးဒ့ၭႉ အ့ၪလဒၪဘၪၦၡၩနးဂၩ ထၪ့ကဂံၪ့ စဲၪ့လၩ့ကဂံၪ့ လီၩ့အၪ့ကီၪ့အဒဲၪ့ၥံၪအလၩ လီၩ့အုၭလၩ့အၥၭလၥၨၩႉ အဒဲၪ့အဎိၩမုၪနးၡီၫနီၪ ဂ့ၩဎွ့ပၥ့ၪလဲၪ မငါဎွ့ပၥ့ၪလဲၪ မၩဆၧဖံၭဆၧ ဎွံၪဖျဲၪဎွ့ပၥ့ၪလဲၪ လီၩ့အၪ့အူၭဝ့ၫလါနၫ့ဂ့ၩ  မအဖိၪခွၫဆံၭအမၫ နးလိၫ့မိနီၪဘိၭ ဆၨၪအကၠီၩ့ လီၩ့အၪ့ကီၪ့ဝ့ၫဒၪထၧၫ့တဝၫ့ယၫဘီၩႉ နးၡီၫဝ့ၫဒၪ ဘဲၫအမံၩ့ၡါအဲၪအဝ့ၫအၥိၭ လီၩ့အမံၩ့ၡါအၥၭကိၭမံၩ့ႉ နးလိၫ့မိဝ့ၫဒၪနီၪ မွဲဘနီၭမွဲအ့ၬ နီၪ ဆၧမၩအီၪ မၩဒၪဝ့ၫ ဘၪမၩဆၧၩ့အမံၩ့ၡါအီၪဘိၭမၩဝ့ၫလီၫႉ လီၩ့မၩလၩ့အဲၪအၥၭ ဘဲၫၥိၭ နးၡီၫ ၥ့ၪအ့ၬဘီၩႉ ပကလီၩ့လၧဆၧၫ့ထီဆၧချဲၩ့ဘဲၫယီၩနီၪ နးၡီၫနီၪ မၩလၩ့အဲၪအၥၭၥ့ၪ နးလိၫ့မိနီၪ မၩလၩ့အဲၪအၥၭၥ့ၪအ့ၬႉ

အၪဒၪဆၧ ၦၡၩအဎိၩၥံၪလဖၪနီၪ ၦလၧမၩလၩ့အဲၪအၥၭၥ့ၪနီၪ ဘၪကၠၭဝ့ၫအၥၭအၪမၬလီၫ မွဲအ့ၬဧၪႉ အနီၭမွဲ ဆၧကျ့ၭထုၪ့ၥုၪ့ထုၪ့ၥၭလီၫႉ