ဆၧအဲၪဂုးခၧၫ့

ကကၠၪအိၩ ဒၪဆၧလၥ့ၪလၧၩ့ဘၪတၭ ဒၪဆၧလအိၭလၧၩ့ဘၪထီးလူၬ ၦမုၪဎံၫလၧ အီၪဝ့ၫလဂၩလီၫႉ ၦမုၪယီၩ အဂူၫဂၩမ့ၬလဲၩဝ့ၫထီးအလူၬတၭ အဲၪဒၪဝ့ၫမွဲ အဆၧအဲၪခွၫကဂၩလီၫႉ အဆၧအဲၪခွၫနီၪ ယိထွ့ၫအဝ့ၫကိၭမံၩ့ဒဲ အီၪလၧအဖိၪၥၪမုၪအနဲၩ့ထံၭကိၭကၠၪလီၫႉ ၦမုၪနီၪ စံၭထၪ့ အဖိၪၥၪခွၫ ယမ့ၬၥၪဂ့ၩထၪ့ထဲၩ့  ယဒၪဆၧၥ့ၪထဲၩ့အခၫ ယကထၪ့ၡါနၧၩနီၪလီၫႉ

မုကနံၩနီၪတၭ ဆၧအဲၪခွၫနီၪ ယၪ့ၥၭအဖိၪၥၪမုၪဘိၭ မၩဘိၪ့အ့ၪဝ့ၫအမ့ၬၥၪတၭ ၦမုၪနီၪ အမ့ၬၥၪဖၩ့ထၪ့ထဲၩ့လီၫႉ အဆၧအဲၪခွၫနီၪဆ့ ဒၪထၪ့ဝ့ၫန့ယူၭလီၫႉ အနီၪကကၠၪ ထၪ့ၡါလၩ့ဖၭန့ယူၭ အကၠီၩ့ အဆၧအဲၪခွၫ အၪ့စၪ့ဝ့ၫ ဒ့ၩမုၪဧ့ နကအၪ့န့ယၧၩဒံၭဧၪ အၪ့စၪ့ထံၩလၪ့ထဲၩ့ဝ့ၫအခၫ ဒၪအဖိၪၥၪခွၫနီၪ အမ့ၬၥၪဘျီၪတၭ ၡူၭဖျးဝ့ၫဒဲ စံၭဆၧၫ့ထဲၩ့ဝ့ၫ ယၥၭစီၪ နမ့ၬၥၪဂ့ၩဧၪဘဲၫ နမ့ၬၥၪဘျီၪ့ဘယီၩနီၪ ယအၪ့န့ထၪ့နၧၩနၧၩ့လၧၩ့အ့ၬ အနီၭတၭ ဖိၪၥၪခွၫနီၪ အၥၭမုၭလအ့ၬ စဲၪ့ထၪ့ဝ့ၫယဲၩ့ယိၬလၧ အဖိၪၥၪမုၪနီၪလီၫႉ

မုနံၩမုၥၫ့ဖီၩ့ခွံၬဝ့ၫဂီၩ့ အကနံၩ ဖိၪၥၪခွၫနီၪ ကွ့ၭၥိၪ့စိၩလံၬလၧ ဖိၪၥၪမုၪအီၪ ဝိၩႉႉႉဖုဒ့ၩမုၪ စီၩအီၪလၧနနဲၩ့ဖၭ လန့လၧၩ့ဘၪလါနၫ့ စီၩအမ့ၬၥၪနီၪ ယိထွ့ၫယိခွၫထၪ့အ့ၪဂ့ၩဂ့ၩဘၪဘၪအီ ကွ့ၭထၬလံၬဘဲၫယီၩၥိၭလီၫႉ

ထၧၫ့ဖုဝဲမုၪခွၫၥံၪဧ့ ၦၡၩအၥုၪ့အၥၭလမံၩ့နီၪ အၪ့လဲၩထၪ့ၥၭၥ့ၪ ဘဲၫနီၪၥိၭလီၫႉ ပဘၪထိးဆၧနၭဆၧၡၪ့အခံၫ့နီၪ ပၧၩအီၪလၧပနဲၩထံၭ ၡၩဝ့ၫအၪမၬလီၫႉ ပၥၭမၧၫ့နီၪ မွဲဝ့ၫ လၬဆီၪ့လမံၩ့လီၫႉ ဘဲၫပစံၭအၧၩ့စံၭၥၫ့ဘၪ ၦဂူၫဂၩအထီ နၪ့ထၪ့ထဲၩ့လၧ ၦချဲၩ့လၥ့ၪဘၪနီၪဆံၭႉ ဆၧအၪ့ဆၧအီၩလဂ့ၩဘၪတၭ ပအၪ့လအွံၪဘၪအထီနီၪ နၪ့ထၪ့ထဲၩ့လၧ ဆၧအၪ့ဆၧအီၩလအီၪဘၪ ၦလဖၪနီၪဆံၭႉ ပလမံၫ့ၥုၪ့မံၫ့ၥၭဘၪ ပၥၭမၧၫ့နီၪအထီ နၪ့ထၪ့ထဲၩ့လၧ ၦဘၪၥံၫခွံၬ ဂီၩဂီၩလဖၪနီၪဆံၭႉ ပၥုၪ့လၩ့ဆါၥၭလၩ့ဆါအခံၫ့နီၪ မွဲပအီၪၥၭမၧၫ့န့ဒံၭအကၠီၩ့ နၪ့ထၪ့ထဲၩ့ဆံၭႉ