ဆၧဆၧၩ့ (၅)

ထၧၫ့ဖုဝဲမုၪခွၫၥံၪဧ့ နံၩလၧအမုၬနဲၪႉၦဖျိၩ့ၡါဖိၪနိၪ့အဖၧၩ့  လၧအဖီၩ့ ခွံၬမုနွ့ၫဒံၭဒၪအိၩ ထီၩ့လၧ နးချံၫ့လဂၩ အီၪအၪ့ဘၪဂ့ၩဂ့ၩဘၪဘၪနီၪ ဖံၫနါအၩ့ဒၪန့အ့ၬ ကိၪ့အၧၩ့ထဲၩ့ဝ့ၫလၧ ဆၧလၧလၫ့အဆၨၩ လၫ့ဝဲဒံၭနီၪ မွဲဆၧအဂ့ၩအီၪလၧမူၭခိၪတၭ အ့ၪမွဲအၪ့ဘၪထွံၪယၪ အစီၩ့အမၩ့ဂၭဂီၩ့လၩ့မၬထီးအလူၬနီၪလီၫႉ အနီၭဘိၭ ဖံၫနါအၩ့လဂၩ မၩၥံၫထွံၪကဒုၩဂီၩ့ အၪ့ဖီၪ့လၫ့ဝ့ၫဂ့ၩဘၪစဲၪ့ ကဒုၭအၪ့နးချံၫ့အထၧၫ့မၫဝၩအဂး ဘၩ့လၩ့မ့ၩနီၪလီၫႉ

စလၫ့ဝဲဒံၭလဂၩ ဒၪဘၪထွံၪယၪကထုၪ့ဎး ၥၭထၪ့ဒိၪမၬဒ့ၭဂီၩ့ ကၠူၭထၪ့အမၫအစူၪ ထဲၩ့ထၪ့ထဲၩ့လၧ မူၭခိၪလီၫႉ ထဲၩ့ထီၩ့အခၫ လီၩ့အ့ၪအဖူၫလၫ့ အဂဲးအဖး ထီးအလူၬနီၪလီၫႉ ဖူၫလၫ့လဂၩ နါဂၧၫ့ဘၪ ဆၧပရၧၫ့ယီၩကထုၪ့ဎး ၥၭထၪ့ဒိၪမၬဒ့ၭဂီၩ့ နးချံၫ့ဂဲၫထၪ့ထၬ ခိၪလီၩ့နီၪ ခၭဝ့ၫကထုၪ့လီၫ ခိၪလီၩ့နီၪ လၩ့ထ့ၬလၩ့ဘျ့ၭလၩ့နူၬနီၪလီၫႉ (ခိၪလီၩလၧအလၩ့ထ့ၬလၩ့ဘျ့ၭလၩ့နူၬလဖၪနီၪ ဘဲၫယီၩအခၫ လၧၦဖျိၩ့ဆၨၩခးဒီၪ့အဖၧၩ့ကဘီၩ့ယၫ ပဒၪဘၪ ဆၭဒၫ့ဂူၫ လိးခိၪလီၩ့လဖၪ ဂဲၫကဲၪထၪ့ဝ့ၫဒၪအကၠီၩ့ ဖံၫဖူၫၥံၪလီၩယံၫယါအ့ၪ ဖိၪၥၪဆံၭၥံၪနီၪလီၫ) ႉစၭထၪ့လၧအထီးနီၪ နးချံၫ့လဂၩ မွဲလဂဲၫထဲၩ့လၧၩ့ဘၪလၧ ၦၡၩအီၪအလးယီၩနီၪလီၫႉ

ထၧၫ့ဖုဝဲမုၪခွၫၥံၪဧ့ စၭထၪ့လၧအထီနီၪ ဖူၫလၫ့လဂၩ မွဲပၧၩ့ထၬအၥၭလန့လၧၩ့ဘၪဒဲ မၩၥူၭမၩၥီၫ့အလူဖၭ ဒိၪ မူၭခိၪထၧၫ့ဘံၪ့ယၫလီၫႉ အီၪဝ့ၫ လၩ (၄)  ဘံၪ့အခၫ နးချံၫ့အၪ့ကံၩ့အၪ့ယၫအကၠီၩ့ အၥၭဘျၪထဲၩ့ကဆံၭနီၪလီၫႉ

လါနၫ့ ကိၭနံၪ့ကိၭနံၪ့ဒ့ၭ ဖူၫလၫ့အလံၩနံၫဂၩ လၧဆၧၥုၪ့လမုၬၥၭလမုၬဘၪအဖၧၩ့ ဂဲၫထဲၩ့အခံၫ့နီၪ ဖူၫလၫ့နၪ့ထၪ့ထဲၩ့ ပၧၩ့ထၬအၥၭန့အ့ၬ မၩၥီၫ့ထၪ့အလူ မူၭခိၪထၧၫ့ဘံၪ့ယၫနီၪ ၦၡၩၥံၪ ထီးနဲၪထၬလၧ ဆၧဂဲၫဆၧၩ့လၩ့ၥၫ့ ဆၧကဆၧၩ့လၩ့လီၫအကၠီၩ့ ထိးဆၧၫ့ထၬဝ့ၫဒၪဘဲၫယီၩၥိၭလီၫႉ