ဆၧဆၧၩ့ (၄)

ထၧၫ့ဖုဝဲမုၪခွၫၥံၪဧ့ နံၩလၧအမုၬနဲၪႉ မုကနွ့ၫယီၩ ၦဖျိၩ့ၡါဖိၪအနိၫ့ဖၧၩ့ ယမိဆုးအဲၪဒိၭလီၩဖ့ၪနဲၪဘၪနၥံၪ ဆၧဆၧၩ့ၡါဖိၪနီၪ လၧအဖီၩ့ခွံၬမုနွ့ၫဒံၭဒၪအိၩ ထီၩ့လၧ နးချံၫ့လဂၩ လ့ၩထၪ့ထီၩ့လၧ လၩအီၪအခၫ လၩကလိၬမုၪနီၪ အၪ့စၪ့အဝ့ၫ မန့လဲၪအဂဲးအဖးအကၠီၩ့ နဂဲၫထၪ့ထီၩ့လၧ ဖံၫအီၪလဲၪ အခၫ နးချံၫ့ စံၭဆၧၫ့ထဲၩ့ ဖံၫဧ ယဘၪဒၪဎီၩ့ဆၧၡၪ့ဆၧနၭ အၪမၬလီၫ ယအီၪကၠၧၫ့ကၠၧၫ့လၧနၧၩကန့ဧၪ အၪ့ကံၩ့အၪ့ယၫဖံၫယီၩ ဘဲၫယီၩၥိၭအခၫ   ဖံၫယီၩ စံၭဆၧၫ့ထဲၩ့ လံၩမုၪနၩ့ဧ့ နအီၪလယၧၩနီၪန့ လါနၫ့ ယၧၩဝ့ၫ ယမၧၫ့လဆိၩၡၩအ့ၬ ယဘၪၥံၫ လၩကဘံၪ့ကကၠၪ မွဲဆၧဘဲၫနီၪ အ့ၪမွဲယမၧၫ့အခၫနီၪအတွၭအီၪအ့ၬ အ့ၪမွဲယၥံၫအခၫ နၥိၭအီၪအ့ၬ ယစီၪနီၪ နအီၪလၧယၧၩ မွဲကမငါအ့ၬႉ (ဘၪၥံၫဝ့ၫဒၪ လၩကဘံၪ့ကကၠၪနီၪ လၩကဘံၪ့နီၪ လၩၥံၫကကၠၪ မွဲအ့ၬဧၪ)

အနီၭဘိၭ နးချံၫ့အၪ့စၪ့ထဲၩ့ ယကလ့ၩအီၪခလဲၪ ဖ့ၪကိၪ့ဖ့ၪတဲၩ့ဒၪယၧၩလူၬ ဖံၫဧ့ အခၫ ဖံၫယီၩ နဲၪစိၩအ့ၪအစူၪလၧ မူၭခိၪ လၧနီၪ ၦလၧအစီၩ့အမၩ့ဎိၩဒိၪအမံၩ့မွဲဝ့ၫ လၫ့ ဖူၫခွၫၡါအီၪဝ့ၫကဂၩလီၫႉ လ့ၩအၪ့ကံၩ့အီၪအဝ့ၫ ဘၪလဲၪ အခၫ နးချံၫ့လဂၩ ဘဲၫဖံၫလၩ လီၩအၥိၭ လ့ၩလၧ ဖူၫလၫ့အီၪဂီၩ့ အၪ့ကံၩ့အၪ့ယၫဝ့ၫ ဘဲၫအီၪဝ့ၫအၥိၭကန့ဧၪနီၪလီၫႉ

ထီးနီၪ ဖူၫနီၪ အၪ့စၪ့ထဲၩ့ အ့ၪမွဲလၫ့ဝဲဒံၭ လၫ့ဖျါဆၧအခၫ အလူဆီၪ့အကၠီၩ့ အ့ၪမွဲ လံၩမုၪနၩ့ထိးန့နီၪဘိၭ အီၪလၧဖူၫအီၪန့နီၪလီၫႉ နးချံၫ့စံၭဆၧၫ့ထဲၩ့ ယကၥံၭဘံၭထၬ ယနါလၧ ဘွ့ၪအကၠီၩ့ ဖူၫလၫ့ထိးဆၧၫ့အဝ့ၫနီၪလီၫႉ နးချံၫ့လဂၩ အီၪလၧ ဖူၫလၫ့ကၠၧၫ့ကၠၧၫ့ယံၬလၫ့အခၫ ဖူၫလၫ့ယီၩ ဒုၭအီၪဎုၬလၧ အလံၩခွၫ လၫ့ဝဲဒံၭနီၪလီၫႉ နးချံၫ့လဂၩ ကဂဲၫထဲၩ့ကလိၬထၪ့အဖါၥၭဘီၩ့အဂး ဂဲၫထဲၩ့လၩ့လၧ အဝၩၥၭဘီၩ့ စလၫ့ဝဲဒံၭကၠၧၫ့ကၠၧၫ့လီၫႉ  တဝၫ့ဖၧၩ့ အထံၩၥိၭလဖၪနးဆ့ ဒၪထဲၩ့ဘၪနးချံၫ့ဆၧမုၬအၥၭ အၪ့အူၭထၪ့ဝ့ၫဒၪ လၧ ဆၧမုၬလၩၥၭဎွံၪအကျၩလၥၨၩႉ လါနၫ့ မွဲဖံၫနါအၩ့နီၪ မွဲဒၪနးချံၫ့အိၭနးကၠၪဘိၭ ကမိမၩဂၭဂီၩ့နးချံၫ့ ကိၪ့ထၪ့ထဲၩ့ဝ့ၫ ကမံၩ့ဒီၭနီၪလီၫႉ

ထၧၫ့ဖုဝဲမုၪခွၫၥံၪဧ့ ဖံၫနါအၩ့လဂၩ မကကိၪ့ကဲၪ့ထၪ့ထဲၩ့ နးချံၫ့ဘဲၫၥ့ၪလဲၪနီၪ လခဲၫမုနွ့ၫမၬ ယကဆုးလီၩဖ့ၪနဲၪထဲၩ့ဘၪနၥံၪနဲၪႉ ဆၧခိးဆၧတၩႉ