ဆၧဆၧၩ့ (၃)

ထၧၫ့ဖုဝဲမုၪခွၫၥံၪဧ့ နံၩလၧအမုၬနဲၪႉ လၧအဖီၩ့ခွံၬမုနွံၫဒံၭဒၪအိၩ ယအဲၪဒိၭလီၩအ့ၪဘၪနၥံၪ ၦဖျိၩ့ၡါဖိၪအမံၩ့မွဲဝ့ၫ ဆၧဆၧၩ့ၡါဖိၪယီၩ ထီၩ့လၧ နးချံၫ့လဂၩ ဂဲၫထဲၩ့ဒၪ ၦၡၩမၩၥံၫအယၪအခၫ ဂဲၫထဲၩ့စဲၪ့ဂီၩ့ဂၪ့ ဖံၫဧ မၩၥံၫ ယယၪကစ့ၩ မၩၥံၫယယၪကစ့ၩ ဂၪ့ကိၭၡါအလူဘဲၫယီၩၥိၭဂီၩ့ လီၩ့အၪ့ဂူၪလိၬထဲၩ့အယၪနီၪလီၫႉ ဖံၫနါအၩ့ မၩၥံၫန့ ကဘံၪ့လီၫ အီၪထးကဘံၪ့ဒံၭႉ နးချံၫ့လဂၩ အၪ့န့ထၪ့ ဖံၫနအၩ့ မၩၥံၫထၬယၪဖိၪနီၪဂီၩ့ ဂၪ့ဝ့ၫဒၪနီၪလီၫႉ ထီးနီၪ နးချံၫ့လဂၩ အၥၭဆၫဖံၫနါအၩ့အကၠီၩ့ ကမိအီၪကၠၧၫ့ကၠၧၫ့လၧ ဖံၫနါအၩ့လအ့ၬတၭ ခွံၬလၩ့အၥၭလၧ ကလ့ၩနးပၫနီၪလီၫႉ

လခဲၫ ယၪလၧအမၧၫ့ထးကဘံၪ့နီၪ  ဖီၪ့လၪ့ဝ့ၫဂီၩ့ စံၭဝ့ၫ နၧၩဝ့ၫ အီၪလယီၩလၧၩ့လဂ့ၩ  ဆၧလၧၦၡၩၥံၪကမံၩ့ ယၫ့ၥၭဆၧၥ့ၪအ့ၬႉ အီၪယံၬယံၬ ၦၡၩကမၩၥံၩနၧၩဒီၭ လ့ၩအီၪလၧၦၡၩလအီၪဘၪအလး လၧၡိၬကျၩ ထံၫကၠီၪ့ဖၧၩ့နီၪ ယၧၩနးဆ့ မွဲယကလီၩလ့ၩဆ့ မၫလူၬထၬယၪဖိၪယီၩ ဘဲၫယီၩၥိၭလီၫႉ

ယၪဖိၪယီၩနးဆ့ ဘဲၫနးချံၫ့မၫလူၬထၬအၥိၭ မွဲလအီၪလၧၩ့ဘၪလၧ ထံၫဖၭလဲဖၧၩ့ဂီၩ့ လီၩက့ၪၥူၪအီၪအၥၭလၧ ထံၫဖိၪ ထံၫကၠီၪ့ဖၧၩ့နီၪလီၫႉ  (ထၧၫ့ဖုဝဲမုၪခွၫၥံၪဧ အထီဘဲၫယီၩ လၧထံၫဖိၪ ထံၫကၠီၪ့ဖၧၩ့လဖၪ ပကဒၪယံၫယၫ ယၪဖိၪအကံၪကဲၩ့ မၩအၥၭဘဲၫၥိၭထီၫ့အလွ့ ကကၠီၪ့ကကၠီၪ့အီၪဝ့ၫလီၫႉ ယၪဖိၪယီၩနီၪ ၦဖျိၩ့ကိၭဝ့ၫလၧ ယၪဖျီၩ့ဖိၪ နီၪလီၫ) ႉ

နးချံၫ့လဂၩ အၪ့ထုၪ့လၫ့အယၪအၥံၫစွၪနီၪဂီၩ့ ဎုလၪ့ဝ့ၫလၧ မ့ၪနီၪလီၫႉ မ့ၪဂဲၫခိထၪ့အခၫ ယၪဖိၪယီၩ အၥိၪလၩ့လၧဖံၭဖၫ့ခိၪ ဖံၭယီၩ ဂဲၫဆီၪ့ထၪ့ လခဲၫကဲၪထၪ့ လိးဖၭဒိၪကဖျိၪ့လီၫႉ နးချံၫ့ယီၩ ထၪ့ဆၧၫ့နၩ့အီၪလၧ လိးဖၩ့ခိၪအခၫ လိးဖၭဒိၪယီၩ ဂဲၫထီၪ့လၫ့ကဆံၭကဆံၭ လခဲၫထုၬ ကဲၪထၪ့ ခိၪလီၩ့ဖၭဒိၪကဖျိၪ့နီၪလီၫႉ နးချံၫ့လဂၩ ဆၧၫ့နၩ့အီၪလၧခိၪလီၩ့ဖၫ့ခိၪနီၪ ဂၬထုၪ့လၫ့ဂီၩ့ မိၬလၫ့အခိၪခွံၪလၧ ဆၧဖၩ့ခိၪအခၫ ထီၩ့လၧ လၩ အီၪစွါဘဲၫႉ

ထၧၫ့ဖုဝဲမုၪခွၫၥံၪဧ့ နးချံၫ့လဂၩ လ့ၩထီၩ့လၧ လၩ အီၪအခၫ အဝ့ၫ မကဘၪဒၪခီၩ့ဆၧၫ့ယၪဆၧဘဲၫၥ့ၪလဲၪနီၪ လခဲၫမုနွ့ၫမၬ ယကဆုးလီၩ့ဖ့ၪနဲၪဘၪနၥံၪနဲၪႉ ဆၧခိးဆၧတၩႉ