ဆၧဆၧၩ့ (၁)

လၧဖျိၩ့ဖျိၩ့အိၩ တဝၫ့ကတဝၫ့နီၪ အမံၩ့မွဲဝ့ၫ နးဘၨၩ ဒဲ နးချံၫ့ အထၧၫ့ဖုဝဲမုၪအီၪဝ့ၫနံၫဂၩလီၫႉ အမိၥၭဘီၩ့ၥံၫဒၪ အဝ့ၫၥံၪခီၫလၧ အဆံၭဆံၭဒံၭဒၪအိၩ ဘၪအီၪဒၪကၠၧၫ့ကၠၧၫ့လၧ အဖါၥၭဘီၩ့နီၪလီၫႉ ဖံၫၥၭၡါအမံၩ့မွဲဝ့ၫ ဖံၫနါအၩ့နီၪ မွဲအီၪကၠၧၫ့ကၠၧၫ့လၧ အဝ့ၫၥံၪဆ့ႉ ထၧၫ့ဖုဝဲ မုၪခွၫၥံၪဧ့ ဖံၫနါအၩ့ယီၩ မွဲအၥၭကဲၪ့ဝ့ၫ အၥၭအုၪ့နၭဒ့ၭအကၠီၩ့ ၦၡၩဘၪၥၭမဲၪ ထီးတဝၫ့ယၫ ၦၡၩဒၪအိၭနးဂၩအ့ၬစွါဘဲၫႉ

နးဘၨၩဒဲ နးချံၫ့အထၧၫ့ဖုဝဲနံၫဂၩယီၩ ဖံၫနါအၩ့အဲၪမွဲ အဆံၭမုၪနးဘၨၩလီၫႉ အဎိၩမုၪမွဲဝ့ၫ နးချံၫ့နီၪ မွဲဖံၫနါအၩ့ဒၪအိၭနးဆံၭအ့ၬႉ အနီၭဘိၭ နးချံၫ့နီၪ ကိၭနံၩဒ့ၭ လ့ၩလၧ ထံၫနဲၩ့ဂီၩ့ အဝ့ၫအၪ့လုထၭ ယၪဖျီၩ့ဖိၪဒဲ ယၪဖီၩ့ဖိၪနံၫဘံၪ့ယီၩ လ့ၩဘျုၪ့လၩ့ယံၫယါဝ့ၫဒၪ အဆၫလီၫႉ အဝ့ၫအ့ၪအီၪလၧဂံၪ့ အ့ၪမွဲအၥၭၡၪ့ လ့ၩလၧထံၫနဲၩ့ထံၭနီၪဂီၩ့ လ့ၩမၩလူၬယံၩယါအခံၫ့လၧ ယၪၥံၪနီၪလီၫႉ

နးချံၫ့လဂၩ အ့ၪမွဲအခံၫ့ဘၪ လ့ၩလၧထံၫနဲၩ့ထံၭ ၥၭအွံၪလၪ့အနိၭ ကိၭအယၪဖိၪနံၫဘံၪ့နီၪ ဘျုၪ့လၩ့ဝ့ၫအဆၫ အီၪထီးအၥၭကမုၬလါနၫ့ဂ့ၩ အဝ့ၫအဖုမုၪနးဘၨၩနီၪဘိၭ ဘၪမၩဂံၪ့အဆၧမၩကိၭနံၩဒ့ၭလၥၨၩႉ လါနၫ့ဂ့ၩ လၧအဝဲမုၪအဖၩ့ခိၪ လၧအီၪက့ၪဘၪအၥၭနးမံၩ့ဒဲ အဲၪအဝဲမုၪနးချံၫ့နီၪအၪမၬလီၫႉ မအဝ့ၫၥံၪအဖံၫ ဖံၫနါအၩ့နီၪ ဒၪနးချံၫ့လ့ၩမၩလူၬအခံၫ့လၧယၪနီၪ ဒၪဝ့ၫအိၭနးဆံၭဖိၪအ့ၬႉ အယၪနံၫဘံၪ့အိၩအကၠီၩ့ မၩ့ဆၧမၩ့နးမံၩ့အ့ၬႉ အ့ၪမွဲအယၪၥံၪအိၩလအီၪလၧၩ့ဘၪမၬ ကမၩဂံၪ့အဆၧမၩအကၠီၩ့ အၪ့ဎၬထၪ့ဝ့ၫလၧ ကလ့ၩမၩၥံၫဂူၪ နးချံၫ့အယၪၥံၪနီၪလီၫႉ

ကဲ ထၧၫ့ဖုဝဲမုၪခွၫၥံၪဧ့ ဖံၫနါအၩ့လဂၩ့ ကိၪ့တဲၩ့ထၪ့ဝ့ၫလၧ ကမၩၥံၫနးချံၫ့အယၪဖိၪၥံၪအကၠီၩ့ မကကိၪ့မၩၥံၫဝ့ၫဘဲၫၥ့ၪလဲၪ မၩၥံၫဝ့ၫကန့ဧၪ န့အ့ၬဧၪနီၪ လခဲၫမုနွ့ၫမၬ ယကဆုးလီၩဖ့ၪနဲၪနၥံၪနဲၪႉ ၡါဖိၪယီၩ မွဲၦဖျိၩ့ၡါဖိၪလယွ့အကၠီၩ့တၭ အ့ၪမွဲနါဂၧၫ့ယံၩယါထၭဝဲၩစွါဘဲၫ လီၩဖ့ၪနဲၪပၧၩလၧ comment ဖၧၩ့မွဲန့ဆ့နဲၪႉ ဆၧခိးဆၧတၩႉ