ဆၧကိၭဆၧ (၇)

မၩ့ထၭပိၫ့လဂၩ စဲၪ့လၩ့လၧၥံၪ့ခံၫ လ့ၩစဲၪ့စိၩလၧ ခွံၫၥ့ၭနၪ ဆၧနၪအအီၪအခၫ အဝ့ၫခုးဆၧလၧအၥၭလၬဖၧၩ့ ကကၠၪယီၩနီၪ ယဎ့ၬအၪ့နၧၩယူၭ ဆၧနၪဧၨၪ အခၫနီၪ ဆၧနၪနီၪ ကကိၭဆၧနးမီၪ့ဒီၭအဂး တဲၩ့ဝဲၩလၫ့အၥၭယူၭႉ ထိၭလၩ့အစူၪ ဘိၭလၫ့အၥၭနၪ ဆဲၫထီၫလၪ့အခိၭ ဖဲၫလၫ့အဒံၭ ဧၨၩ မၩ့ ထၭ ပိၫ့ မွဲၥၪ ဎၧၫ့ဎၧၫ့ၡီၪၡီအခိၫကိၭကၠၪကၠၪအိၩႉ

မၩ့ထၭပိၫ့လ့ၩစဲၪ့ထီၩ့ လၧဆၧလၩ့ပျၩ့အလးနီၪတၭ ခွံၫၥ့ၭနၪနီၪ ကကိၭဆၧ ၥၧၫ့ကၠၪကကၠၪအဂး ထိၭလၩ့စူၪ ဘိၭလၫ့ၥၭနၪ ဆဲၫထီၫလၪ့အခိၬ ဖဲၫလၫ့အဒံၭ ဧၨၩ မၩ့ႉႉထၭႉႉ မၩ့ထၭပိၫ့အဎ့ၬနါနုၬနုၬနီၪ ဘၪလၩ့အခိၬဆၧၫ့ထံၭတၭ ပံၫႉႉႉၥီၫပနီၪႉ အလူလၧခဲၫ့ထုၬနီၪ ထုၬအယွ့ ပံၫႉႉႉဘနီၪ န့လၧၩ့ထၧၫ့ယၫအ့ၬႉ ဖ့ၬဝ့ၫဘျဲၩဖ့ၬလ့ၬဘိၭ အခိၬဘီၩ့ မိထ့ၬ မိထ့ၬလ့ၬႉ

ကဖ့ၬဝ့ၫနးထံၪဒီၭအဂး ယူၭလၫ့အဎ့ၬအခၫနီၪ ဒၪဘၪခွံၫၥ့ၪနၪ ထဲၩ့လၩ့ၥွံၭ လၩ့ၥွံၬဘနီၪႉ ကဲၪခိၬလံၩဖျိၪ့ လၧလံၩဆဲးကဖျိၪ့အၥိၭ ထဲၩ့လၩ့ဆံၭလၩ့ဆံၭၥဲၩနီၪဘိၭ အီၪထးဒၪအလီးကထၫဘျဲၪဘျဲၪ ဘဲၫခွံၫၥ့ၭနၪၡါမၬအလီးနီၪလီၫႉ ဆၧနၪလၧ အဒိၩ့ထၬအဝ့ၫနီၪဆ့ မကထဲၩ့ဂီၩ့တလီးလီၩ့ယူၭႉ

မၩ့ထၭပိၫ့ထိၭလၩ့အဎ့ၬလၧဖံၭခိၪ အီၪပွံၭအခၫ ယိလၩ့ခွံၫၥ့ၭနၪအၥံၫစွၪဖိၪနီၪ အဝ့ၫချဲၩ့ၥၪကဂၩ ကီၩ့ယၫဒံၭ ဆၧကဒုၩယီၩ မၩဆၧခိဎၧၫ့ခဲၫ့ဎၧၫ့အကၠီၩ့ အ့ၪလမွဲဘၪႉႉႉႉဘနီၪႉ ဂီၩ့တၭအၪ့ထုၪ့လၫ့ခွံၫၥၭနၪဖိၪနီၪလၧ အမ့ခဲၫ့နီၪတၭ စဲၪ့လၩ့ထဲၩ့လၧ ခိၪလီၩ့ခၪ့ထံၭႉ ဘဲၫဆၧဖၩ့ဒံၭကဆံၭဆံၭအခၫ ကဘၪထဲၩ့အဖျဲၪဘီၪႉ အထံၩၥိၭဖိၪဒံၩဖိၪၥၪၥံၪ ကခိၬယိလါအနၫ့ဆါမွဲအ့ၬဧၪႉ ၦၡါဖိၪယီၩနီၪ မွဲဒၪထီးယီၩလီၫနဲၪႉ ပကဘၪအီၪလၧဆၧၥၭဒူၩ ဘဲၫမၩ့ထၭပိၫ့ၥိၭ ခိၬနီၪ ထီးမၩဆၧဎၧၫ့ဆ့ၭဎၧၫ့ဆၩ့ အခိၪခွံၫၥ့ၭနၪနီၪကလ့ၩနဲၪႉ