ဆၧကိၭဆၧ (၆)

မၩ့ထၭပိၫ့လ့ၩထၪ့စဲၪ့လၧခိၪလီၩ့ခိၪအဖျဲၪတၭ လီၩ့ယိဎွါဆၧ ကဆိဖိၪ ဎံၩ့လးလ့ၬလါနၫ့ ဒၪဆၧနးမံၩ့အ့ၬႉ ၥံၪ့ထဲၩ့ ဝၪထဲၩ့ၥံၪ ဂဲၩလၫ့ဝၭဝၫ့ဘနီၪ မအီၪနးဆ့အ့ၬႉ ဝ့ၩႉႉဆၧဂဲၫခံၭလၩ့ မံၬမူၬ မံၬမူၬခီၫယူၭနဲၪႉ လ့ၩထၪ့လၧ ၥံၪ့ကထံၭအလီၩ့ဂီၩ့ လီၩ့ယိဆၧဝၬဝၬတၭ လၧဘူၭဘူၭယဲၩ့ယဲၩ့အိၩ ဒၪစိၩဖံၭလးလၧလၩ့ပျၩ့ကလး ဆၧအလးနီၪ ထၪ့ထီၫဖိၭဘိၭကချဲၫ့တၭ လၧအနဲၩ့ဝၬဝၬ ဖိၭဘိၭယဲချဲၫ့အဖၧၩ့နီၪ ၥံၪ့ဎိၩဎိၩအီၪနးထံၭအ့ၬႉ

အဝ့ၫယိထၪ့စိၩဆၧလၩ့ပျၩ့နီၪ အဘိၩ့ဘၭ နါဂၧၫ့ ၥံၪ့ထဲၩ့ၥံၪဂဲၩဝၬထၪ့အလူၥံၪ အီၪကဖျၭဖိၪအထးဖၧၩ့ ဆၧအမိဎွါဖၭဒိၪကဒုၩ ဂဲၫယူၩလၩ့လၧဆၧအလးနီၪႉ ၡၨၩယါဧၨၩ လၧ ခွံၪၥ့ၭနၪဖၭဒိၪကဘီၩ့နဲၪႉ အၡၪမၪနီၪ ဆၧလၧခွံၪၥ့ၭနၫနီၪ အလီးထီၫ ကထၫဘျဲၪ ဘနီၪလီၫႉ မဆၧအယီၩနီၪဘိၭ ကအီၪဖိၭဘိၭ ဆံၫယဲဖျါခီၫဒံၭႉ ဆၧဖူၫဆၧနၫဖၫၡါက့ၭကမံၩ့မံၩ့ နုၬလၩ့ဒိၩ့ထၬအကၠီၩ့ ဎိၩဘယီၩလၥၨၩႉ

ခွံၪၥ့ၭနၪနီၪ ယိစိၩဆၧ လၧမၩ့ထၭပိၫ့ၥံၪအတဝၫ့ လၧအမ့ၬၥၪဖၭဒိၪဝီၩဝီၩနီၪ မုမ့ၬကလၩ့နုၬထီ အဆၧဖၩ့ဖၧၩ့နီၪ ပဒၪစိၩၥ့ၪတဝၫ့ဖၭထီၫနီၪ ဒုၪဒၩဖိၪဒံၭႉ ဂီၩ့တၭ ထိၭလၩ့အစူၪနံၫခီၫတၭ ဆၫ့ထီၫလၪ့အၥၭနၪ ဆဲၫထီၫလၫ့အခိၭဘီၩ့ ဖဲၫ့လၫ့အဒံၭနံၫခီၫတၭ မၩလၫ့အဆၧမၩနီၪလ့ၬႉ ဧၨၩ မၩ့ႉႉ ထၭ ႉႉ ပိၫ့ႉႉႉ

အလူဖၭဒိၪဎၧၫ့ဎၧၫ့  အယွ့ထီၫထီၫနီၪ ထဲၩ့ၥီၫလၩ့ လၧခိၪလီၩ့ထၧၫ့ဖျိၪ့ယၫ ဂီၩ့ ခိၬလၩ့ထဲၩ့ ဖဲၫလၩ့ထဲၩ့အဒံၭၥံၪ လၧအဂံၬပၪနီၪႉ ဆၧကဒုၩနီၪ ထီၫဒၪလၧအမ့ခဲၫ့နီၪလီၫဘ့ၭႉ အနီၪ ကအီၪအဖျါ ကဆံၫခီၫဒံၭတၭ အမိဎွါခီၫနီၪ ကန့ၫၥၪ ထိၭဘၪဒၪကဒုၩလီၫႉ အမိဎွါန့ၫနီၪဖိၪလီၫနီၪ ကြၨၭလၧအလူဖၭဒိၪနီၪအ့ၬႉ အၨၪဘီၪ ဆၧနၪနုၬလၩ့ဒိၩ့ထၬဘိၭႉ

ကထံၪဎး မၩ့တၭပိၫ့စဲၪ့လၩ့လၧ ၥံၪ့လီၩ့နီၪတၭ လ့ၩစဲၪ့စိၩလၧခွံၫၥ့ၭနၪ ဆၧနၪအအီၪနီၪ ကထံၪလီၫတၭ မၩ့ထၭပိၫ့လဂၩ မဆၧကအဲၪ့ၥံၫဧၪ ၦၡါဖိၪယီၩ ကဂဲၫကဲၪထၪ့ဘဲၫၥ့ၪလဲၪနီၪ လၧခဲၫ့မုနွ့ၫမၬ ယကဆုးလီၩအ့ၪဘၪနၥံၪနဲၪႉ