ဆၧကိၭဆၧ (၄)

မၩ့ထၭပိၫ့လဂၩ လ့ၩစဲၪ့လၧ ခိၪလီၩ့ ဆၧအလူအီၪဂဲၫနီၪ ကိၭလၩ့အၥၭ ဧႇ ယမံၩ့နီၪ ထၭပိၫ့ ယါဧၨၩ မၩ့ႉႉထၭႉႉပိၫ့ နးကၠၪဒိၭကိၭယၧၩနးထံၪဘ့ၩႉ အဝ့ၫကိၭဆၧဘနီၭ ဘျဲၪဘျဲၪကိၭ ၥၧၫ့ကၠၪ လံကၠၪႉ အလူနီၪ ကလ့ၩထီၩ့စိၩလၧခိၪလီၩ့ပၥ့ၪလဲၪႉ  မၦၡၩတဝၫ့ဖၧၩ့နီၪဘိၭ နါဂၧၫ့ဘၪနီၪ ဆီၪ့ကံၪထၪ့ခီၫဒံၭ ဘိၩအ့ၬဧၪႉ ကမွဲ နးဂဲးနီၩ့ဘၭဆ့ ခဲၫ့ကံၭအဝ့ၫအဂးဆ့အကၠီၩ့နီၪလၥၨၩႉ

အၡါမၫနီၪ ကဘၪကိၭၡါဆၧ လူဖီးထၪဖီးဘနီၪ ကလ့ၩလိၫခလဲၪနဲၪႉ ဆၧအအိၩနီၪ မဆၧမိဒံၩမိဎွါဘီၪႉ မဆၧဖူၫဆၧနၪဘီၪႉ ဘနီၪတၭ ဆၧကဒုၩနီၪ ဘၪလဘၪ ကဂဲၫထီၩ့ယူၭ လၧတဝၫ့ဖၧၩ့ခီၫဒံၭတၭ မၩ့ထၭပိၫ့ကိၭၡါအလူ လၧဆၧၥၭထၪ့လၩ့ဂံၬနီၪ ကယိထၪ့ဝ့ၫလၧဆၧနံမွံၪ မိလံၬမိလံၬခီၫဒံၭနဲၪ မွဲအ့ၬဧၪႉ

ကနၩၥၪနီၪ ၦၡၩအဆၧမၩအၪ ထၧၫ့တဝၫ့ယၫ မွဲန့ၫ စတိၫ့တိၫ့ လၧအလ့ၩဖီၩ့ခွံၬအဂးနီၪအ့ၬႉ ကမၩထဲၩ့ဆၧအၪ့ဎဲၩ့ ထၧၫ့တဝၫ့ယၫ လၧအဝ့ၫၥံၪ မၩလကဲၪလၫ့ဘၪ အီၪယံၬယူၭအဂးနီၪဆ့ မိလဖၪ ဘၪအီၪကိၩ့အီၪကီၪ့လၧဘျၪ့ဖၭဒိၪ အီၪလၧတဝၫ့ အကျၩၥၭနီၪႉ

လၧအခၫနီၪ မၩ့ထၭပိၫ့ဝ့ၫ ကျဲၩ့ဎ့ၬ အဎ့ၬဖၭထီၫနီၪ ကျဲၩ့ဝ့ၫကဘျၩ့ဂီၩ့ကဘျၩ့ ကျဲၩ့ဝ့ၫ နုၬယူၭဧၪ နုၬယူၭဘနီၪႉ စံၭဝ့ၫ နါဂၧၫ့ဘၪ ဆၧကိၭဆၧ နးကၠၪဒီၭတၭ ထီးဒၪ ဆၧကကိၭၦၡၩကဂၩဂၩနီၪ အဝ့ၫကလ့ၩတၭ ထီးဒၪကမွဲ ဆၧအမိဎွါကမံၩ့မံၩ့နီၪ ကမၩဘံၭခွံၬ ဆၧကဒုၩနီၪအနိၭဘနီၪနဲၪႉ

တၭ ဖိၪၥၪဖိၪၥံၫဂီၩ့ ၥၧၫ့နံၩလနံၩနီၪ ၦၡၩဘၧၩ့လၩ့ခွံၬအဝ့ၫလီၫႉ လၧခဲၫ့ကနံၩ မုဂၪခီၫနီၪ ၦၡၩဎိၭဒီၪထၬ လၧဂံၪ့ကိၭဖျိၪ့ ကမၩဆၧအၪ့ဎဲၩထၧၫ့တဝၫ့ယၫႉ လါနၫ့ဂ့ၩ လၧကနံၩဒၪနီၪ မုဎဲးလၩ့ကၠၧၫ့ ဆၧကိၭဆၧ ၥီၫထၪ့လ့ၬယါႉ လီၩယိ နးထုၪ့ဘ့ၩ ကိၭမပၧၩလဲၪႉ မကိၭပၧၩလဲၪဒဲ ၡါဖိၪယီၩ ကဂဲၫကဲၪထၪ့ဘဲၫၥ့ၪလဲၪနီၪ လၧခဲၫ့မုနွ့ၫမၬ ယကဆုးလီၩဖ့ၪနဲၪထဲၩ့ဘၪနၥံၪနဲၪႉ