ဆၧကိၭဆၧ (၂)

မၩထၭပိၫ့လဂၩ လ့ၩလီၩ့ဎွါယၪလၧ ဘံၩဖၭလဲဖၧၩ့အထီ အကနံၩအဝ့ၫလအီၪဘၪလၧ တဝၫ့ဖၧၩ့အခၫ လၧမုဎဲးလၩ့ၥၫ့အခံၫ့နီၪ တဝၫ့ဖိၪၥံၪနါဂၧၫ့ဘၪ ဆၧကိၭဆၧ အလူဖၭဒိၪ ဧၨၩႉႉႉဖံၫႉႉႉစ့ၩႉႉႉထိၫ့ႉႉ ဎၧၫ့ဎၧၫ့ႉ ၦၡၩၥံၪစီၪဆၧဘၪအ့ၬဒဲ ၡူၭန့ဖျဲၩ့န့နၭလ့ၬႉ မနီၫလဲၪကိၭဆၧလဲၪႉ ဆၧအလူနီၪ မအီၪဂဲၫခလဲၪႉ အီၪကဆိဖိၪတၭ ကိၭထၪ့ဆၧကဘျၩ့ဒီၭႉ ဧၨၩႉႉႉဖံၫႉႉႉစ့ၩႉႉႉထိၫ့ႉႉ ဝ့ၩႉႉႉအီၪဂဲၫလၧ ခိၪလီၩ့လီးဘီၩ့အိၩနဲၪႉ ခိၪလီၩ့နီၪအီၪ လၧတဝၫ့လးခဲၫ့ဆံၭပျၩ့ဖၭလဲဝါလခီၫအိၩလ့ၬႉ ၦၡၩဘၪလ့ၩဂၭဖၭ ကယံၬ မံၫ့ ထံၫချၫ့ကဖၧၩ့လ့ၬနဲၪႉ အ့ၪမွဲဘနီၪနီၪ လၧဆၧအကိၭဆၧနီၪ အၪလါ အမိဎွါကန့ၫ ၦၥထံၫ မၩ့ဘီၪ အဘုၪ့ဖၪ့ ထီးဘုၪ့ယဲယၩနီၪလ့ၬလၥၨၩႉ

လၧခိၪလီၩ့ခၪ့ထံၭနီၪ ထံၫချိၭဖိၪအီၪကဘီၩ့တၭ အ့ၪမွဲဆၧဆၧၩ့ခၫနီၪ ဂဲၫယွၩလၩ့ ထီးအထီၩ့လၩ့လၧ တဝၫ့နဲၩ့ထံၫချိၬဖၧၩ့နီၪ လၧအခၫနီၪ  ၦၡၩလ့ၩစိၩ လၧခိၪလီၩ့ခၪ့ထံၭ လၧချံၫန့ တဝၫ့ဖိၪၥံၪ လ့ၩထၪ့ယ့ၩယါ လၧခိၪလီၩ့ခိၪတၭ ဘိၭၥံၪ့မုႇ ဒုၪ့ထံၫ ႇ လီၩ့ဎွါအၪ့ဆၧဒိၭဆၧလၪ ဆၧၥူၪဆၧၥၪၥံၪ ကနံၪ့ခၧၩ့နံၪ့လ့ၬႉ ဆၧမိဒံၩမိဎွါဘနီၪ အီၪနးမံၩ့အ့ၬဘ့ၭႉ

နီၪႇ ဂဲၫဒီၭ ဧၨၩႉႉႉဖံၫႉႉႉစ့ၩႉႉႉထိၫ့ႉႉ ဆၧဂဲၫၥီၫထၪ့ ၥၧၫ့ဘျၩ့လဘျၩ့ယူၭႉ ၦၡၩကနၩ့နၩ့စံၭဝ့ၫလၧ မဆၧၥံၫကဆါ ကိၭဆၧဧၪ လါနၫ့ ဖံၫစ့ၩထိၫ့ အနၫ့ဆါဝ့ၫ အီၪဒၪဂ့ၩဘၪစဲၪႉ အဝ့ၫမွဲၦၡၩအၥၭအၡါထုၬ လၧတဝၫ့ဖၧၩ့နီၪ အၥၭလၩ့ဘူၭကယၩယူၭတၭ ဒၪဘၪအလံၩအလိၩ အၪလ့ၬယူၭႉ ဘနီၪတၭ ဆၧၥံၫနီၪ ကၥၭမဲၪဝ့ၫနးဆံၭဧၪ လါနၫ့ဂ့ၩ ဆၧအလူနီၪ မၩဝၭထိၬအၥၭနၭလ့ၬႉ

တၭ မုဂၪလၩ့ကကၠၪ ဆၧကိၭဆၧစၭထၪ့ဒီၭႉ ကိၭဆၧအလူအိၩအိၩ ဎၧၫ့ဎၧၫ့ဒၪဘနီၪလီၫႉကထုၪ့လီၫ အဖိၪအလံၩၥံၪ ဂဲၫဝၩ့ထၬ ဖံၫစ့ၩထိၫ့နီၪ ခဲၫ့ကံၭအဝ့ၫအဂးဘိၭႉ ဆၧကိၭဆၧနံၫထံၪ ကထံၪၥီၫလၫ့တၭ ဖံၫစ့ၩထိၫ့လၩ့ဘျၭလၩ့ဆါထၧၫ့ဂၩယၫႉ ဆၧကိၭဆၧၥၧၫ့ထံၪ ကထံၪနီၪထုၬ ဖံၫနီၪအၥၭအီၪလၧၩ့အ့ၬႉ အခၫနီၪ မုမ့ၬဝီၩကၠီၪနီၪ ထဲၩ့လၩ့နုၬ လၧခိၪလီၩ့လီးဘီၩ့အလးခဲၫ့ ယူၭႉဆၧဖူၫဆၧနၫဂၬ ဂံၩ့ဝၩ့မုၬအထီဘိၩ့အ့ၬဧၪႉ ၦမွံၩၦၡါလီၩယံၫယါပၧၩဘနီၪႉ ထုၪ့နၥံၪအၥၭ အခံၫ့အခၫလဘၪဘၪနီၪ လီၩ့လ့ၩဂၬလဂ့ၩဧီၪႉ