ဆၧကိၭဆၧ (၁)

လၧဖျိၩ့ဖျိၩ့အိၩ ယံၬနီၪယံၬလ့ၬယူၭ ကမွဲခိၪလၩဘွၩ ပၧၩ့ဆၧအထီနီၪကဲၪယၥၭဘဲၫႉ အထီၥၪအိၩနီၪ လၧပထံၫထၪကျိၩ့ယီၩ ၡိၬၥံၪၡၩ့ၥံၪ ဆံၬပျၩ့ဖၭလဲၥံၪ အီၪအၪလ့ၬစွါဘဲၫႉ ၦၡၩခီၫနီၪ အီၪၡၩၡၩဒံၭလီၫႉ အ့ၪမွဲဆၧအလး ဘူၭဘူၭပၪ့လဲၪနီၪ ဒံၩ့ၡၩဒီၭႉ တဝၫ့ၥံၪအီၪလအိၩ ကတဝၫ့ လၧယီၩကတဝၫ့ဘနီၪလီၫႉ အၨၪ အၨၪ ၡါလၧ ယကလီၩအ့ၪနၥံၪဘဲၫယီၩနီၪ ပဆၧအဂဲး ဂဲၫထဲၩ့ကဲၪထၪ့လၧ တဝၫ့ကတဝၫ့ အီၪဘူၭလၧ ပၪ့လဲၪနီၪလီၫၥၨၩႉ

တဝၫ့အမံၩ့နီၪ ယနၨထၪ့လၧၩ့အ့ၬဘယါႉ ကိၭန့ၥၪအမံၩ့ လၧထၧၫ့ဖုဝဲဖျိၩ့ဖိၪၥံၪဘၪအၥၭ ကမံၩ့မံၩ့လီၫနဲၪႉ တဝၫ့နီၪ မွဲတဝၫ့ဖၭထီၫ ဘၪဆၧၥုၪ့ထၬလၧ ထံၫချိၬအကၠီၪ့နဲၩ့ ကဖျီၩ့ယၫနီၪ ဂံၪ့အဖျိၪ့ကအီၪ ဖိၭဘိၭ ကယၩဘျဲၪ နံၫယၩလ့ၬတၭ လၧထီၥၪအိၩနီၪ ပစံၭလၧ တဝၫ့ဖၭဒိၪဘနီၭလၥၨၩႉ တဝၫ့ဖိၪၥံၪနီၪ မၩကၩလၧ ဆၧဆၧၩ့ခၫတၭ  ဆၧယီၩလၫ့ မၩကၩဂီၩ့အခၫနီၪ လီၩ့ဎွါအၪ့ယၪဒီၭႉ

တဝၫ့ဖိၪၥံၪဖၧၩ့နီၪ ၦၡၩအဖျဲၡါက့ၭ အမံၩ့မွဲ မၩ့ထၭပိၫ့ ဘနီၪ အီၪကဂၩႉ ၦၡၩနီၪ အၥၭလၩ့ဘူၭ လံဆံၫယူၭ အၪ့န့အမၪဒံၭအ့ၬႉ အမိအဖါၥံၪဆ့ အီၪလၧနးဆ့အ့ၬႉ ဖိၪဒံၩဖိၪၥၪၥံၪခီၫနီၪ အဲၪအဝ့ၫကိၭဂၩဒ့ၭႉ မဘၪလဲၪနီၪ အဝ့ၫအီၪဂဲၫထဲၩ့လၧဝံးကိၭကၠၪနီၪ  ဂဲၫထဲၩ့ဆိၬန့ဖိၪၥၪၥံၪအဂး ကိၪၥံၪနဲၩၥံၪ ဆၧကွ့ၩဖိၪၥံၪကိၭကၠၪအကၠီၩ့နီၪလီၫႉ

ၦၡၩနီၪ မၩအၥၭ ဎွဲဎွဲ(ဎွ့) ထီၫထီၫလါနၫ့ အဂဲးဆီၫ့ဆ့ ဒူၩခီၫဒူၩနၭလ့ၬဆ့ ယိဆူၭဘီၪ အဝ့ၫလ့ၩခွံၬလၩ့အၡၬနီၪ မွဲဘူၭဘူၭလၧ တဝၫ့အ့ၬႉ လ့ၩစဲၪ့ထၪ့ဝ့ၫ လၧဘံၩဖၭလဲဖၧၩ့ ဘူၭလၫ့ထဲၩ့လၧ ပၪ့လဲၪနဲၩ့လၧအိၩလ့ၬတၭ အီၪအၡၩထုၬ ဆံၫဆဲၥၫ့မၬ ဂဲၫထဲၩ့လၧအတဝၫ့စွါဘဲၫႉ