စီၩ့မၩ့ဎိၩဒိၪ ၦဖျိၩ့ကျိၪ (၂)

ဖိၪၥၪယီၩ လၩ့အဲၪဝ့ၫအၪမၬလီၫစွါဘဲၫႉ ၦၡၩအဲၪကိၭဂၩႉ ဆၧကၪကမံၩ့နီၪ ဖိၪၥၪယီၩဂၪ့အ့ၬစွါဘဲၫႉ ဆၧမၩဆၫအယၪ ဆၧထးနးဆ့ မဂၪ့ဧၪအ့ၬႉ ၦၡၩမၩဂၪ့န့နးမံၩ့အ့ၬဘိၭ လၧခဲၫ့ စဎွၩနီၪ အၪ့စၪ့ပကိၪ့ၥ့ၪလၧအနီဖၧၩ့နီၪ ဖိၪၥၪယီၩထီးကဂၪ့ ပကဘၪမၩပၥ့ၪလဲၪ ဖိၪၥၪယီၩဒၪဘၪအဖါအ့ၬနီၪ ဂၪ့လီၫႉ အ့ၪမွဲဒၪဘၪအဖါ ဂၪ့လၧၩ့အ့ၬ ၦကိၪ့ၥ့ၪစံၭဆၧၫ့ထဲၩဘဲၫယီၩၥိၭတၭ ဟၩ ဖိၪၥၪယီၩအဖါအီၪအ့ၬ အီၪဖျဲၪနီၪ ပကဘၪကိၪ့လီၩ့ဎွါအဖါပၥ့ၪလဲၪ စဎွါယီၩစံၭဝ့ၫဘယီၩအခၫ ၦကိၪ့ၥ့ၪစံၭဆၧၫ့ထဲၩ့ ယီၫယီၫလီၫ စဎွၩဒိၪဧ့ ထံၫခးထၧၫ့ဘံၪ့ယၫ ကယဲၦၡၩအခွၫၥံၪအီၪနီၪ အၪ့မၧၫ့ဂဲၫန့ဆၧအဒံၪကဂၩကဖျိၪ့ဂီၩ့ အၪ့မၧၫ့နဲၪအ့ၪဖိၪၥၪယီၩ အ့ၪမွဲအဝ့ၫအဖါနီၪ ဂၪ့လီၫတၭ အ့ၪမွဲၦၡၩလဂဲၫန့ဘၪဒီၭ ကဖီၪ့ခွံၬလၩ့ဝ့ၫလၧထီၫ့ဖၧၩ့ဘိၭ ၦခွၫၥၭဘၪ့ၥံၪဘၪဂဲၫလၧနီးဖၧၩ့နီၪထီးအလူၬႉ

ၦခွၫၥံၪယီၩ ကဂၩဂီၩ့ကဂၩ ဂဲၫနဲၪအ့ၪဖိၪၥၪယီၩဆၧဒံၪနီၪ လါနၫ့ ဖိၪၥၪယီၩ ဂၪ့နးဆံၭအ့ၬစွါဘဲၫႉ လၧခဲၫ့ ကထီၩ့ထဲၩ့လၧ စကၠၧၫ့ထူၭ ကဘၪလ့ၩနဲၪ အဝ့ၫဂဲၫန့ဆၧအဒံၪနီၪ စကၠၧၫ့နီၪ ကၠၧၫ့ဘိၭ ဂဲၫဘုၭလၫ့န့ ထိၪစၫ့စံၭအဒံၪလၧ အဒိၩ့ဖၧၩ့နီၪ နဲၪအ့ၪဖိၪၥၪနီၪကထံၪဎး ဖိၪၥၪနီၪ ဂၪ့ကထုၪ့လီၫႉ ၦၡၩၥံၪကိၭၡါထၪ့အလူ ကဲ ဖိၪၥၪအဖါ ပဒၪယူၭအခၫ စကၠၧၫ့ယီၩ ထူၭဘၪထၬအလီၩ့ထဂၩယၫဒံၭဘိၭ စဎွၩၥၭထၪ့ စဎွၩနၪ့စဲၪ့လၫ့လၧနီးဖၧၩ့ကထုၪ့လီၫႉ လၧခဲၫ့ စကၠၧၫ့ယီၩစံၭစဎွၩ ယကလ့ၩစဲၪ့လၫ့လၧနီးဖၧၩ့ယီၩ  ယကဖံၬအၪ့မၩအၪ့အဂး ဖ့ၪလၫ့အ့ၪယၧၩ နဲၩ့နးဖျိၪ့ ႇ ထၭဖျၩနးဘီၩ့ ႇ ဘုၪ့နးတလိၬအခၫ စဎွၩဖ့ၪလၫ့အ့ၪ စဎွၩယီၩနၪ့စဲၪ့လၫ့ စကၠၧၫ့ကဂၩလီၫမွဲအ့ၬ ထံၭလၩ့ထဲးအ့ၪဝ့ၫအဖိၪမုၪဆံၭဒဲ အလံၩဒံၭနီၪလီၫႉ စကၠၧၫ့နးဆ့ ၥုၪ့လၫ့ကၠၩ့ဂီၩ့ အီၪလၧအဖိၪဒဲ အမၫလၥၨၩႉ  

လယံၬလမီဘၪအဖၧၩ့ စကၠၧၫ့ယီၩ ဒၪန့ကျိၪလၧ ဆၧအူၭအီၪကဖျိၪ့တၭ ဂဲၫထဲၩ့န့ အီၪက့ၪဒိၪဝ့ၫလၧအဂံၪ့ တၭ ကျိၪအစီၩ့အမၩ့အကၠီၩ့  စကၠၧၫ့ယီၩ ဂဲၫကဲၪဒိၪကဲၪမုထၪ့ အီၪထဲၩ့ဘၪလၧနီးဖၧၩ့ဒဲ အမံၩ့ၡါစဎွၩအဲၪထဲၩ့အဝ့ၫ ဘဲၫအဖိၪလီၫစွါဘဲၫႉ