ခးပယၩ့ခးခိၪဒိၪ မၩ့ဝ့ၩမီၫ့အဂဲး

ထၧၫ့ဖုဝဲထံၩၥိၭဖျိၩ့ဖိၪၥံၪဧ့ႇ မုကနွ့ၫယီၩ ယမိအဲၪဒိၭရၩလၩ့န့ဘၪနၥံၪ ခးပယၩ့ ခးခိၪဒိၪအဖၧၩ့ ၥၧၫ့ဂၩလဂၩ ခၩ့ခိၪဒိၪနီၪ မွဲဝ့ၫ ၦဖျိၩ့ဆၨၩဖိၪလဂၩလီၫႉ ဘဲၫထၧၫ့ဖုဝဲဖျိၩ့ဖိၪၥံၪ ၥ့ၪယၪထၬအၥိၭ အဝ့ၫနီၪမွဲ ခၩ့ခိၪဒိၪ မၩ့ဝ့ၩမီၫ့ လီၫႉ

ခၩ့ခိၪဒိၪ မၩ့ဝ့ၩမီၫ့နီၪ အီၪဖျဲၪဝ့ၫဒၪလၧ ဒိၩ့ပၥံၫ့ ကၠိၫ့ပၠိၫဝံးဒီၪ့ ဒကၭထံၫနိၭဖဲၩ့ လဲဆံၭတဝၫ့ နံၪ့ ၁၉၁၆နံၪ့ လၩ April (၁၇) ၥၫ့ အစီၩ့မုနံၩ အဖါဖါၥၭဘီၩ့ၦကိၪ့ၥ့ၪဒိၪ မၩ့ၡွ့ၫယ့ၫ ဒဲ အမိမိၥၭဘီၩ့ ဂါယၫအီၪနီၪလီၫႉ အထၧၫ့ဖုဝဲအီၪဝ့ၫ လံဂၩအဖၧၩ့ အဝ့ၫနီၪမွဲ ဖိၪခွၫနံၫဂၩ လဂၩလီၫႉ

မၩ့ဝ့ၩမီၫ့ယီၩ ဆံၫဖုၪဖျီၫ့ဂီၩ့ ဆုးထၪ့ ဂၠဆ့ၫကီလံၬထီးအဂီၩ့ဒဲ ၁၉၃၇နံၪ့နီၪ အဝ့ၫန့ဘၪ (B.A )ဆၧနဲၪ့လၩဖၩ့လီၫႉ အဝ့ၫန့ထၬဘၪ(B.A )ဆၧနဲၪ့လၩဖၩ့လံၬထိးၥၭနီၪ လ့ၩလီၩဎွါထၪ့ဆၧမၩအခၫ န့ဘၪစရ့ၩအလးနီၪလီၫႉ နံၪ့ ၁၉၄၀နီၪ ထဲၩၥုၭထဲၩ့အၥၭလၧ ၥုၭဖၧၩ့တၭ ထၪ့ၥုၭၥဖျးဂီၩ့အခၫ ၁၉၄၁နံၪ့နီၪ ဘၪထိးအၪ့န့ထၪ့မူၩဒၩလၧ ၥုၭခိၪဒိၪနံၫဂၩလဂၩအလးနီၪလီၫႉ

၁၉၄၂နံၪ့နီၪ အီၪဎုၬထၪ့လၧ ဂါမၠၭမ့ၫဂီၩ့ အဖိၪအီၪဝ့ၫ (၆) ဂၩနီၪလီၫႉ မၩ့ဝ့ၩမီၫ့ယီၩ ဂၠပၫ့ဆၧပိၩ့ထၪ့ဆၧအထီနီၪ အဝ့ၫပၫဝ့ၫဒၪလၧ တီၫ့ငူၫလး ခိၪနါၦလၧဂဲၩဝၭထၪ့လဂၩနီၪလီၫႉ

နံၪ့ ၁၉၄၅နီၪ ၦဖျိၩ့ၥၭဘၪ့ခိၪနါဒိၪ နံၫဂၩလဂၩဒဲ ဆၨၩဆၬဂၠၫနဲ အဲဒံၫတၫႇ ၁၉၄၇နံၪ့နီၪ ဒိၩ့ပၥံၫ့အလးခဲၫကကဲၩ့ ဉပဒေပြုလွတ်တော်အမတ်ႇ ၁၉၄၈နံၪ့နီၪ ၥၭထုဖၧၩ့ဒဲ ပမၩဆၧဖိၪခၩ့ဒိၪႇ ၁၉၄၉နံၪ့နီၪ ဆၧၥိၪ့ထူၭၥိၪ့လၩ့ဆၧဒဲ ဆၧဆုးကျိၭလိၬၥၭခၩ့ဒိၪနီၪလီၫႉ

မၩ့ဝ့ၩမီၫ့ယီၩ ၁၉၅၃နံၪ့ လၩ မၭ ၁၃ၥၫ့ ပူၬတပၠၭမုနံၩနီၪ ဘၪအၪ့န့ထၪ့ထဲၩ့မူၩဒၩလၧ ခးပယၩ့ ခးစၧၩ့ကီၪ့ ခးခိၪဒိၪ အလး နီၪလီၫႉ ခးခိၪဒိၪအလးယီၩ အဝ့ၫဘၪအၪ့န့ထၪ့ မူၩဒၩ ယဲနံၪ့ ထီးထိၩစိၩ ၁၉၆၂နံၪ့ လၩ မၭ ၂ ၥၫ့ နီၪလီၫႉ ၦဖျိၩ့ဆၨၩဖိၪလဂၩမွဲဝ့ၫ မၩ့ဝ့ၩမီၫ့ယီၩ အၥၭအီၪ (၃၁) နံၪ့နီၪ ကဲၪထၪ့ ခၩ့ဒိၪဒဲ အၥၭအီၪ ၄၁နံၪနီၪ ကဲၪထၪ့ဘၪ ခးခိၪဒိၪနီၪလီၫႉ

ထၧၫ့ဖုဝဲမုၪခွၫၥံၪဧ့ ခးခိၪဒိၪ မၩ့ဝ့ၩမီၫ့ယီၩ ၁၉၈၉နံၪ့ လၩ ဂၠုၫလဲၫ့ (၄) ၥၫ့နီၪ အၥၭအီၪ (၇၃) နံၪ့ အထီ ဘၪအီၪက့ၪထးလၩ့ခွံၬအဂံၪ့ဒီၪ့ဖိၪၥံၪနီၪလီၫႉ