ခ့ၫဘၩ့ဖိၪခွၫအီၪဒဲၥၭဒူၩ (၂)

ထီးနီၪကကၠၪ ဖ့ၪလၫ့အခွံး လၧကလ့ၩအၪ့ဎၬ ၦမုၪနၩ့ဖိၪ လၧအၥၭဖၧၩ့ ဆိၫ့အဲၪဘၪလဂၩနီၪလီၫႉခ့ၫဘၩ့ဖိၪခွၫလဂၩဆ့ဘၪလ့ၩဖိၬအခဲၫ့လီၫႉ အဝ့ၫနီၪ အီၪဒဲ ၥၭဒူၩလီၫႉ ခၭဆၧတီၩအကၠီၩ့ၦဖီၩ့ဖျ့ၭၥ့ၪနးဂၩအ့ၬႉ

ထၧၫ့ဖုဝဲနံၫဂၩယီၩ လ့ၩထီၩ့လၧ ခိၪလီၩ့ဒၩ့ခိၪလဖျိၪ့ ထံၫဒ့ၩချိၬလၩ့ယွၩဝ့ၫ လၧအနဲၩ့ မၩန့အီၩတၭဂၪ့ဝ့ၫလီၫႉ  နါဂၧၫ့ၦလဂၩဂၪ့ဆိၪလၩ့ၥၭ လၧခိၪလီၩ့ခိၪ နီၪ ကဲၪလၫ့ လၧဒိၭခၩလဒုၩ ဆၧၫ့နၩ့ဂၪ့နၭလ့ၬအကၠီၩ့ ၥ့ၪယၫဝ့ၫ လၧ ဒၪစိၩ ၦမုၪနၩ့ဎံၫလၩနီၪလီၫႉ ဒိၭခၩလဒုၩယီၩ အခိၪဎွံၫအီၪ၇ဖျိၪ့တၭ အမ့ၬထံၫလၩ့ ဝ့ၫကဲၪထၪ့ ဘဲၫထံၫဒ့ၩ ချိၬ(စမ်းချောင်း)ယွၩလၩ့ထီၩ့စိၩလၧအဖၫ့လၬလီၫႉ ထၧၫ့ဖုဝဲနံၫဂၩအီၩထံၫနီၪ မွဲဒၪဒိၭခၩအမ့ၬထံၫလီၫႉ ဒိၭခၩစံၭႇမၩၥံၫယၧၩလဂ့ၩ အီႉ

 ယကလ့ၩဖိၬနၥံၪအခဲၫ့ဘဲၫ နဖျဲအၥိၭလီၫႉ (ၦစံၭဝ့ၫ ဒိၭခၩလဖၪနီၪ ဘၪၥၭ မဲၪလၧ ခ့ၫဘၩ့အဖိၪခွၫ လဂၩအကၠီၩ့နီၪလီၫႉ) ၦမုၪနၩ့လဂၩယီၩ ဂ့ၩတၡါလ့ၬ အကၠီၩ့ ဘၪဆၧစၧၩ့ထၬဝ့ၫ လၧနီးအထီၫထုၬအဖၫ့ခိၪတၭ ၦခိၭဆၧနီၪ မွဲ ဆၧလီးဆၧဘွဲၩမုၪလဂၩလီၫႉဘၪန့အၥၭအ့ၬအကၠီၩ့ လီးထၬစဎွၩအဖိၪခွၫနီၪ ၥၭနၪ့အၥၭယူၭႉ ဒိၭခၩဒဲ ခ့ၫဘၩ့ဖိၪခွၫၥံၪ မၩဖီၩ့ဖျ့ၭထၪ့ၦမုၪနၩ့လါနၫ့ဂ့ၩ ကလိၭ အၧၩ့ထဲၩ့ကိၭန့ လၧအနီးအီၪလၧ မူၭဖိၭဖၫ့ဆၧအုၪ့နီၪလီၫႉ

ခ့ၫဘၩ့ဖိၪခွၫ ထၪ့ထူၬဒိၭခၩ ယူၩလၫ့ထီၩ့စိၩလၧ ကလိၭအၧၩ့အနီး လၧ ဆၧကၪဆၧဂဲၩအဖၧၩ့ တၡါလ့ၬနီၪလီၫႉ ကလိၬအၧၩ့စၧၩ့ထၬ ၦမုၪနၩ့လၧဒူၭဖၧၩ့ လီၫႉ လၧခဲၫ့ခ့ၫဘၩ့အဖိၪခွၫလဂၩယီၩ အၪ့ဎၬန့ကလိၭအၧၩ့အချံၪ အီၪက့ၪၥူၪ ထၬဝ့ၫအကၠီၩ့ ခၭၥံၫခွံၬဝ့ၫလီၫႉ အဝ့ၫၥံၪ ဂဲၫထဲၩ့ထီၩ့လၧ ဂၪ့ခိၪလၬတၭ စဎွၩ အဖိၪခွၫ နၪ့ထၪ့ထဲၩ့အၥၭယူၭလီၫႉ ၦမုၪနၩ့ဒဲ စဎွၩအဖိၪခွၫ န့ဘၪလိၬၥၭ ကထံၪဎး ၦခိၭဆၧၦမုၪ လၧအလီးဆၧၥ့ၪလဂၩ ကိၪ့မၩၥံၫထၧၫ့မၫဝၩနံၫဂၩ လၧအဆၧၥ့ၪဆၧဘၪလီၫႉ