ခ့ၫဘၩ့ဖိၪခွၫအီၪဒဲၥၭဒူၩ လခဲၫ့ထုၬအဆၫ့

မၩန့ဎ့ၬနီၪဂီၩ့ လ့ၩၥွၪထ့ၬခွံၬ နဖိၪအီၩနူအခိၬဘီၩ့ဆံၭႉ ဒိၭအၥွံၪလၧအ လၩ့ယွၩဂီၩ့တၭႇ လ့ၩဂါလၩ့လၧ နဖုခွၫလိးဂၩ့အခိၪဎွံၪဖၫ့ခိၪဘီၪႉ ကမၧၫ့ထၪ့ ထဲၩ့ဘဲၫၦၡၩလဂၩလီၫႉ

ထီးနါဂၧၫ့ကထံၪဎး ၥၭနၪ့အၥၭ လၩ့ထံၩဖါဒၪလ့ၬလီၫႉ ကဘၪၥွၪထ့ၬ အဖိၪခွၫအခိၬဘီၩ့လၧဎ့ၬအကၠီၩ့လီၫႉ ဆၧမၩယီၩကၪဂဲၭလၧ မိဖါအဂးလမွဲ ဘၪဧၪႉ ပကမၩဘဲၫၥ့ၪလဲၪႉ ထၧၫ့မၫဝၩနံၫဂၩစံၭလိၬၥၭဂီၩ့ ပဖုခွၫလိးဂၩ့ ကမၧၫ့ထၪ့ထဲၩ့အဂးနီၪ ပကအၪ့လဲၩ့န့လၧ ပဖိၪခွၫအၥၭမၧၫ့နဲၪႉ ယီၩ နၧၩဝ့ၫ ဖီၪ့ထၬခွၭ ယကၥွၪထ့ၬဖိၪခွၫအခိၬဘီၩ့လီၫႉ

ထၧၫ့မၫဝၩနံၫဂၩ လ့ၩဆိၬန့အဖိၪခွၫအၥွံၪလၧ အဖုခွၫလိးဂၩ့ အီၪအလး ဒဲစံၭဝ့ၫႇ ဖုခွၫဧ့ႇ ပၡီၫ့လၩ့ယူၭ ပဖိၪခွၫအၥွံၪလၧ နခိၪဎွံၪလီၩ့လီၫႉ ပဖ့ၪဆၧၫ့ ထဲၩ့ နခိးနတၩဘိၩ့ယီၩလီၫႉ ဖိၪၥံၫလါနၫ့ မိန့ထဲၩ့နးဂၩၥ့ၪဝ့ၫဒံၭလီၫႉ ၦလၧ မၩခိးမၩတၩဘဲၫနၧၩနီၪ ပအၪ့ဎၬန့ဝ့ၫၥ့ၪလၧၩ့အ့ၬႉ

အၥွံၪလဖၪလၩ့ယွၩဝ့ၫ ကဆၫ့ဘၪကဆၫ့ ခ့ၫဘၩ့ဖိၪခွၫလဂၩဆ့ အခံး အဂၩ့ အၪ့လဲၩ့ထၪ့အၥၭ ဘဲၫဆၧဖံၭဆၧယၪအၥိၭနီၪလီၫႉ ထီးနၪ့ထၪ့ထဲၩ့အၥၭ ဘဲၫၦၡၩလဂၩအၥိၭႇ ဒၪစိၩအဝဲခွၫဒဲ အခ့ၫနဲၩမုၪနံၫဂၩ ဂၪ့ဝ့ၫနၭမၬ ဎွ့ၩဒဲမ့ၬ ထံၫမ့ၬနီၫ့အကၠီၩ့ နၪဆၧၥ့ၪအ့ၬႉ အဝ့ၫအၪ့စၪ့အဝဲ ဘၪမနီၪ နၥံၪဂၪ့လဲၪႉ

ထၧၫ့မၫဝၩၥံၪလီၩဖ့ၪနဲၪထဲၩ့အဂဲးလဖၪဂီၩ့ႇအ့ၪမွဲပနီၪ ယမၧၩ့အၥွံၪ က ဘၪစီၪလၧယလီၩ့လီၫၥၨၩႉ ယိနးထံၪဆၧအီၪနးမံၩ့အ့ၬႉ မွဲလီၫႉ ဆၧအၥွံၪလ ဖၪ လအီၪဘၪလၧ ခ့ၫဘၩ့ဖိၪခွၫအလီၩ့နီၪအကၠီၩ့ စံၭလိၬၥၭႇ ဂဲၫ ပကလ့ၩ ယိနဖိၪ မံၫလၧဆူၬပၪဖၧၩ့နးထံၪႉ

အဝ့ၫၥံၪလ့ၩစဲၪ့ယိဖိၪၥၪဆံၭတၭႇ လဒၪလၧၩ့ဘၪအၥွံၪ လၩ့ဆၩ့ထးလၧ ဆူၬပၪဖၧၩ့ဒဲ လးမံၫဒၩခိၪလီၫႉ ကိၭၥီၫထၪ့အလူကထံၪဎး ဖိၪၥၪနၪ့ထဲၩ့အၥၭ ဒဲဂၪ့ဝ့ၫလီၫႉ အခိၬဘီၩ့ဆ့ဘၪဆၧနးမံၩ့လၧၩ့အ့ၬႉ ထီးနီၪ အထၧၫ့ဖုဝဲၥံၪ အၥၭ ဎွံၫဝ့ၫအကၠီၩ့ ဝါထၬလိၬၥၭ လဂၩဘၪလဂၩနီၪလီၫႉ

ဖူၫခၩ့လိးဘွၩ (ကၠိၫ့ပၠီၫ)