ကထၬထံနီၪ ဖိၬဒၪအဖံၫၡါအခဲၫ့

Thursday, March 23, 2023

ကထၬထံနီၪ ဖိၬဒၪအဖံၫၡါအခဲၫ့လီၫႉ ၦဖျိၩ့ဖိၪၥံၪၥ့ၪယၫဝ့ၫ ဆၧလၧကထၬထံနီၪ မွဲဆၧအၪ့ကမံၩ့ လၧအဝ့ၫၥံၪ လ့ၩခုၪ့အၪ့ဝ့ၫနီၪလီၫႉ ထီးမွဲကထၬကထံၭ လၧအထံနီၪ အ့ၪမွဲၦၡၩလခုၪ့အၪ့ဘၪ ၦၡၩလဒၪဘၪစွါဘဲၫ လခဲၫ အ့ၪမွဲဆၧခိထၪ့နီၪ ၡါဂီၩ့တၭ ဎဲၪ့ထၬလၩ့ၥွံၭၥံၫဒၪဝ့ၫလီၫႉ လါနၫ့ဂ့ၩ အခိၪဆုၪ့လၧ အအီၪထးနီၪ ထီးမွဲဆၧဆၧၩ့ဘၪတၭ အယိၬထၪ့ထဲၩ့ႉ အယိၬထၪ့ထဲၩ့ဂီၩ့ ဎိၩထၪ့ဒိၪထၪ့တၭ ထံလၪ့ထဲၩ့နီၪလီၫႉ အနီၭတၭ ၦဖျိၩ့ဖိၪၥံၪ လီၩ့ယိဆူၭကထၬထံတၭ လီၩ့ခုၪ့ဝ့ၫႉ ဒၪဘၪဝ့ၫလၧ ကထၬထံအၥၫ့ လၧအထံလၩ့ထဲၩ့ကနံၪ့ယီၩနီၪ ဖိၬဆီၩ့ဆွံၩထဲၩ့ ကထၬထံအလံၩ လၧမၫ့ဂၩနံၪ့အိၩအၡါ အလၩ့ၥွံၭအီၪထးအကၠီၪ့ အနီၭအကၠီၩ့တၭ ကထၬထံအၥၫ့ယီၩ မွဲအလီၩ့ဖိၬဆီၩ့ဆွံၩထဲၩ့ဒၪ ကထၬထံအလံၩအကၠီၩ့တၭ ဆၧချဲၩ့နီၪအီၪ လၩ့ထးဝ့ၫလၧ ကထၬထံနီၪ ဖိၬဒၪအဖံၫၡါအခဲၫ့နီၪလီၫႉ ဆၧချဲၩ့ယီၩ ဖ့ၪလၪ့ဆၧအဒီၩ့ပၥ့ၪလဲၪစွါဘဲၫ ထီးမွဲၦၡၩကဂၩဂၩ ဆၧတၩ့လၫ့လၧခိၪနါ မၩဆၧဂ့ၩလါနၫ့ဂ့ၩ လခဲၫခီၫ အနၫ့ဆါအဆၧဖံၭဆၧမၩနီၪ ဂ့ၩလၧၩ့အ့ၬႉ မီၪ့ဎီၩ့ခိၪနါလးလံၩအိၩမွဲဂ့ၩႇ ၦၡၩလဂၩဂၩ လၧအဆၧအီၪမၧၫ့အီၪဂဲၩအဖၧၩ့နီၪ အတခ့ၭဖဝၭအ့ၪဂ့ၩလါနၫ့ဂ့ၩ ထီးမွဲလခဲၫခီၫ လဂ့ၩလၧၩ့ဘၪအထီမွဲဂ့ၩ ၦၡၩလဂၩဂၩ အဆၧအီၪက့ၪၥုၪ့အီၪက့ၪၥၭ စၭထၪ့လၧအခၪ့ထံၭနီၪ ဂ့ၩလါနၫ့ဂ့ၩ ထီၩ့ထၪ့ဖိၪထၪ့ၡါဂီၩ့လခဲၫ လဂ့ၩလၧၩ့ဘၪနီၪ ထီးနီၪကကၠၪ ဆၧစံၭဒၪလၧ ကထၬထံနီၪ ဖိၬဒၪအဖံၫၡါအခဲၫ့နီၪလီၫႉ မိစံၭဝ့ၫ ၦၡၩကိၭဒံၩကိၭဂၩဒ့ၭ အဆၧအီၪမၧၫ့အီၪဂဲၩ့နီၪ ကဘၪစၭထၪ့လၧအဂ့ၩ ဒဲအကျၩ ထီၩ့အထုၬကကၠၪနီၪဘိၭ ကဘၪဂ့ၩဝ့ၫလီၫႉ အ့ၪလဂ့ၩဘၪ အ့ၪဂၭဂီၩ့ဂၭစၪဒဲ လခဲၫထဲၩ့အ့ၪကဲၪထၪ့ထဲၩ့ ဆၧလဂ့ၩဘၪလၧ အဆၧအီၪမၧၫ့အီၪဂဲၩ့အဖၧၩ့နီၪ ထီးနီၪကကၠၪ ၦဖျိၩ့ၥံၪစံၭဝ့ၫလၧ ကထၬထံနီၪ ဖိၬဒၪအဖံၫၡါအခဲၫ့နီၪလီၫႉ