ဂဲၫဖျီၪထၪ့ယူၭ ၦဖျိၩ့လံၬ

ပအီၪလၧ ထံၫထၪကျိၩ့ခးဒီၪ့လး၀ၩ့ဖၭဒိၪယီၩ ပထၧၫ့ဖုဝဲဖျိၩ့ဖိၪၥံၪလဖၪ အီၪဝ့ၫအၪမၬလီၫႉ လါနၫ့ မအီၪဎွ့ၩပၥ့ၪလဲၪနီၪ ဆၧထုၬထၪ့ဖျီၪ့ထၬ ထံၫထံၫဆၭဆၭလအီၪဒံၭဘၪလီၫႉ ၦဖျိၩ့ဆၨၩဖိၪၥံၪလဖၪ အၪဒၪဆၧနီၪ ဖျိၩ့ဆၧချဲၩ့ ဖျိၩ့လံၬ ၦလၧနၪၥ့ၪ ချဲၩ့ဘၪ ဖီဘၪလၩ့ၡၩဝ့ၫအၥိၭ ပဒၪဘၪ ဆၧဖီၪ့ဂုးထၬ ဆၧကီၩ့ဆၧၥိၭ လုၫလါထူၫရူၫဆၧဆၧးဎံၫဆၧးလၩအနိၫ့နးဆ့ ဂဲၫလၩ့ၡၩထၪ့ဝ့ၫဒၪလီၫႉ ပကဲၪၦဖျိၩ့ဆၨၩမီၪ့ဎီၩ့ ကကၠၪကၠၪ ပဘၪထိးအၪ့စၪ့ အ့ၫယၫဝတံၫခးဒီၪ့လးဝၩ့ဖၭဒိၪနီၪ ဖျိၩ့ဆၨၩအီၪဧၪ အနီၭအကၠီၩ့တၭ ၦထံၫထၪကျိၩ့ခးဒီၪ့ လးဝၩ့ဖၭဒိၪယီၩ ဘဲၫၥိၭ ၦဖျိၩ့ဆၨၩလလၩ့မါဘၪ ၦပဒၩ့ထၬကန့အဂး ဖိၬလိၬထၪ့ လံၬလဲဒဲဆၧဆၧးဎံၫဆၧး လၩ့ခမံတံၫဂီၩ့ ဆၧချဲၩ့ လံၬလဲ ဆၧကီၩ့ဆၧၥိၭ ဆၧဆၧးဎံၫဆၧးလၩဒဲ ပကဘၪဆုးဖီၪ့ဂုးထၪ့ထၬ လုၫလါထူၫရူၫ ဆၧမၩလဖၪယီၩ ဖံၫဖူၫၥံၪလဖၪ စၭထၪ့ဖီၪ့ထၪ့ဖံၭထၪ့ခီၫလၧ ဖိၭဘိၭ ဖီၩ့ခွံၬ အနံၪ့ (၅၀) အိၩယူၭနီၪလီၫႉ ဖံၫဖူၫၥံၪ အဆၧဖီၪ့ထၪ့ဖံၭထၪ့ယီၩအဖၧၩ့ ဘဲၫၦဖျိၩ့လံၬလဲလလၩ့မၬဘၪအဂး ဆၧၥီၪ့လိၪလံၬဖျိၩ့ မွဲပၫဆ့လီၫႉ  ကကၠၪကၠၪ ၦလနၩ့နၩ့အၪ့စၪ့ပၧၩ နၥံၪအဖျိၩ့လံၬနီၪ နၥံၪကလ့ၩၥိၩ့အလးခလဲၪႇ နၥံၪၥ့ၪဖျိၩ့လံၬနီၪဧီၪ ကကဲၪထၪ့မန့လဲၪ ဆၧချဲၩ့ဘယီၩ ပဘၪထိးအၪ့စၪ့ယံၩယါလီၫႉ ဆၧအၪ့စၪ့ယီၩ ယမိစံၭဆၧၫ့ထဲၩ့လၧ ပကဲၪဖျိၩ့ဆၨၩလဂၩ ပဂဲၫကဲၪထၪ့လၧဖျိၩ့ဆၨၩအကၠီၩ့ ဘဲၫဆၨၩယီၩလလၩ့မါအဂး ပကဘၪချဲၩ့ထၪ့ ႇ မၩလိၪပဖျိၩ့လံၬလဲနီၪ မွဲၦမူၩအီၪလီၫႉ ပၥီၪ့ထၪ့ပလံၬလဲယီၩ မွဲပကလ့ၩချဲၩ့လၧ ၦဂူၫဂၩအခးအဂးအ့ၬ လါနၫ့ ဆၧၫ့ထီဘဲၫယီၩ ၦဖျိၩ့ဆၨၩဖိၪၥံၪ အီၪလၧထံၫခးဂူၫဂၩအၪမၬလီၫႉ ၦဖျိၩ့ဆၨၩမီၪ့ဎီၩ့ အ့ၪပဒၪဎီၩ့လိၬၥၭအခၫ ပချဲၩ့ဒုၪ့လိၬၥၭလၧဖျိၩ့ခီၫအ့ၪဘၪဒံၭနီၪ မွဲၦဖျိၩ့ဆၨၩယီၩ ကလၩ့မါအ့ၬဒဲ ကဆုးမၧၫ့ထၪ့လၧယၫ အဆိၩဆိၩနီၪလီၫႉ

                 လၧအခီၩ့အိၩနီၪ ၦဖျိၩ့လံၬလဲယီၩ ဘၪၥီၪ့လၧ ဆၧယီၩခၫ ပဒိၪဆၧမၩလိၪလးဖၭဘံၭအခံၫ့ဒဲ လံၬလဲဒဲ ဆၧဆၧးဎံၫဆၧး လၩခမံတံၫ အဆၧကျ့ၭစၨၭခိးဂဲးခိးဘၭ ကဆၫ့ဘၪကဆၫ့အကၠီၩ့ ထီးမုဆၫကနံၩယီၩ ဆၨၩဆၬ လံၬလဲပၥီၪ့လိၪလန့ဘၪ ပဒိၪဆၧမၩလိၪလးလဖၪ ပၥီၪ့လိၪဖျိၩ့လံၬန့လၧ ပဒိၪတၩ့ဖုၪဆၧမၩလိၪလးဖၧၩ့ နံၫဖုၪယူၭ အကၠီၩ့ဒဲ လံၬဖျိၩ့ဆရၫႇ ဆရၫမုၪလဖၪ ဂဲၫအီၪထၪ့ဝ့ၫဒၪအၪမၬယူၭနီၪလီၫႉ လကၭဒံၭဘၪ ဘဲၫယီၩ ပနါဂၧၫ့ထၪ့ဘၪ ဆၧပရၧၫ့ ၦဖျိၩဆၨၩ့ဖိၪၥံၪအီၪလၧ ခးအမ့ၫရံကၭလဖၪအဂး လၧခးအမ့ၫရံကၭ မ့ၫနံၫဆိၩတၫလး ဒီၪ့ ပဒိၪ ဆၧမၩလိၪလး (၄) ကၠီးနီၪ ဆၧၥီၪလိၪဎုၬထဲးၦဖျိၩ့လံၬကန့အကၠီၩ့ ပၥ့ၪယၫဘၪလီၫႉ ထၧၫ့ဖုဝဲဖျိၩ့ဖိၪၥံၪဧ့ႇ  ၦဖျိၩ့လံၬလဲယီၩ အကၧၩ့ဂဲၫဒိၪထၪ့ယူၭနီၪလီၫႉ

                 ၦကဲၪဖျိၩ့ဆၨၩလဂၩ ပကဘၪချဲၩ့ဖျိၩ့ ပကဘၪၥ့ၪထဲၩ့ပလံၬလဲနီၪ မွဲၦမူၩဒၩလီၫႉ ၦဖျိၩ့ဆၨၩယီၩ ဘဲၫၥိၭ လလၩ့မါဘၪအဂး ဖံၫဖူၫၥံၪလၧဖျိၩ့ဖျိၩ့အိၩ ကဆၫ့ဘၪကဆၫ့ ဂဲၫထဲၩ့ဖ့ၪစိၩပၧၩ ပလံၬလဲဆၧချဲၩ့ယီၩ ထီၩ့လၧ ပစူၪဖၧၩ့ယူၭ ပကဘၪဆုးဖီၪ့ဂုးအၪ့နၩ့ ထဲၩ့ဘၪလၧ လခဲၫဖိၪလံၩၥံၪနီၪ မွဲၦမူၩဒၪလီၫ မွဲအ့ၬဧၪႉ