ဆၧကိၭဆၧ (၅)

ကဲ ဆၧအလူယီၩ မဆုးကိၭထၪ့ မပၧၩလဲၪအမံၩ့လဲၪ လီၩယိနးထံၪဘ့ၩႉ ဧၨၩ မၩ့ ထၭ ပိၫ့ မွဲတီၩ မွဲတီၩ လၧအလူဎၧၫ့ဎၧၫ့ဘနီၪနဲၪႉ အၨၩ မွဲယူၭ နါဂၧၫ့ဘၪ ဆၧအလူနီၪကကၠၪ တဝၫ့ဖိၪကနၩ့နၩ့ လ့ၩစဲၪ့ယိ မၩ့ထၭပိၫ့နီၪ ဖိၪၥၪၥံၪ မွဲပၫဆ့လၥၨၩႉ အဝ့ၫနီၪ မအဝ့ၫၥံၪအထံၩအၥိၭ မွဲအ့ၬဧၪႉ

မၩ့ထၭပိၫ့ခီၫနီၪ မံၫနၩ့အီၪပွံၭ စီၪ့စူၪစီၪ့ခၪ့တၭ အီၪခိၭနၪ ဆၧကိၭအမံၩ့နီၪ ထၪ့ဘၭၥၧၫ့မီၫ့ဂီၩ့မၬ ဂဲထုၪ့ကျဲၩ့အဎ့ၬဖၭထီၫနီၪဒီၭႉ အၥၭမံၫ့ကကၠၪ ချဲၩ့ဒုၪ့ၦၡၩဂဲၫဒၪအနၫ့ဆါနီၪ အဝ့ၫနီၪ ဖျီၪ့အၥၭၡူၫဘၩၡါမၪလ့ၬႉ တဝၫ့ဖိၪၥံၪလီၩ့အဝ့ၫ လၧဆၧအၪ့ဎဲၩ ထၧၫ့တဝၫ့ယၫ လယံၬဘၪကစၭထၪ့လီၫနီၪ ဒဲလီၩဖ့ၪဂဲးဖ့ၪဘၭအဝ့ၫ  လၧဆၧအၪ့ဎဲၩ့ဂီၩ့ကကၠၪ ဆၧနိၫ့ဆၧနၭ မကဘၪအဝ့ၫလၧၩ့အ့ၬဘနီၪႉ

အီၪယံၬကဆိဂီၩ့  အဝ့ၫၥံၪဘၪထဲၩ့ဝ့ၫ ဆၧအၪ့ဎဲၩ့ကစၭထၪ့ လၩ့ဘူၭယူၭဘိၭႉ ဘိၪ့အထီနီၪ ၦၡၩကိၭဂၩဒ့ၭကဘၪ အီၪဒၪလၧအဂံၪ့ လူၬထဲးဖိၪၥၪဘ့ၩဆ့ၩဖိၪဒံၭဘီၪႉ မၩ့ထၭပိၫ့ဝ့ၫနီၪဘိၭ ဆၧၫ့နၩ့ထွံၩလၩ့တၭ ဆီၪ့မီၪ့ထဲၩ့အမိအဖါ အဖံၫအဖူၫထီးအလူၬ အခိးအတၩၥံၪကဆိဖိၪ ဂီၩ့ ဖီၪ့လၫ့အဎ့ၬတၭ ဂၭဖၭလၫ့ဝ့ၫႉ ထီၩ့လၧခိၭလးဖၧၩ့တၭ ယိထၪ့စိၩခိၪလီၩ့လၧ မုနုၬမူၭထံၬအိၩတၭ လ့ၩဂၭဖၭဖျဲၪဖျဲၪဖိၪႉ တဝၫ့ဖိၪၥံၪယိစိၩအဝ့ၫတၭ ဒၪဘၪအဎ့ၬဖၭဒိၪလၧ အယိၬထၬဝ့ၫ လၧအဘံၭထံၭခိၪနီၪ ဖဲးလၫ့တၪယဲး တၪယဲ လၧမုမ့ၬအဆၧဖၩ့ဘၪလၩ့ဒိၭအကၠီၩ့နီၪ အဝ့ၫၥံၪထီးအလူၬ ဆိၫ့ဂ့ၩဆိၫ့ဘွၩဆၧ ဘဲၫအဝ့ၫကဂဲၫထဲၩ့ကန့ ဖီၩ့ဒုၪဖီၩ့ဒၩအဂးလီၫႉ

မၩ့ထၭပိၫ့လ့ၩထီၩ့ လၧခိၪလီၩ့ခၫ့ထံၭအခံၫ့နီၪ မုဎဲးလၩ့ ကဆံၭယူၭ အဝ့ၫဒၪစိၩၥံၪ့ဖၭထီၫအနၩ့နၩ့ ဂဲၩလၫ့ဝၭလၫ့ လၧအိၩကထံၪ လၧယီၩကထံၪတၭ စီၪဝ့ၫလၧဆၧအနီၪ ကမွဲဒၪ ဆၧမိဎွါလၧအကိၭဆၧနီၪႉ ဆၧနီၪအ့ၪမွဲအီၪဒၪလၧ ၥံၫ့ခံၫနီၪ ကကဲၪလၫ့ဆၧ အကၪက့ၭလ့ၬႉ အနၫ့ဆါပကဘၪကိၪ့ လ့ၩထၪ့ကျီၪ့ၥံၫပၥ့ၪလဲၪ စီၪဆၧဘၪအ့ၬႉ

မၩ့ထၭပိၫ့လဂၩ ပကကိၪ့မၩၥံၫ ဆၧမိဎွါယီၩ ဘဲၫၥ့ၪလဲၪနီၪ လၧခဲၫ့မုနွ့ၫမၬ ပကဆုးခိၭနၪနဲၪႉ