ပကဘၪအၪ့ဎၬထၪ့ထဲၩ့ ၦဖျိၩ့ဆၨၩဖးဖီၩ့

ထၧၫ့ဖုဝဲထံၩၥိၭဖျိၩ့ဖိၪၥံၪဧ့ ဆၧလၧဖးဖီၩ့နီၪ ပမိၥ့ၪယၫ ဘဲၫအီၪအၥိၭ ဖးဖီၩ့အအီၪ အမွဲ အတီၩ ထီးအလူၬလီၫႉ  ခးပယၩ့ဆၧဖီၩ့ဖျ့ၭန့ဂီၩ့ ပဒိၪပမုၥံၪလဖၪ ဘဲၫထံၫခးဖးဖီၩ့ကဂဲၫအီၪထၪ့အဂး ၁၉၅၉နံၪ့ လၩစဲၭတ့ၫဘၫနီၪ ဖိၬလိၬထၪ့ ခးပယၩ့ဖးဖီၩ့ကီၫမၡ့ၫခရၧၫ့ လံၬလဲကိၪ့ၥ့ၪလဖၪဒဲ ဖးဖီၩ့ပကိၪ့ၥ့ၪလဖၪနီၪလီၫ ႉ

ခီၫလၧဖျိၩ့ဖျိၩ့အိၩ ခပယၩ့ဖးဖီၩ့နီၪ မၩကဲၪထၪ့ထၬဝ့ၫန့စဎွၩထံၫခး အၪဒၪဆၧ ဖးဖီၩ့လဖၪနီၪ ကွ့ၭထၬဝ့ၫန့ၫ ဒီၩ့ဝိၩၥံၪအဂဲး အကၠီၩ့တၭ လၧခးပယၩ့ဖးဖီၩ့ဖၧၩ့နီၪ မွဲဆၨၩဆၬဖိၪၥံၪအနိၪ့လပၫဘၪလီၫႉ မွဲဆၧဘဲၫနီၪ ခးပယၩ့အဂးအီၪဝ့ၫဒၪ ဖးဖီၩ့နီၪ မွဲဒၪ ဒီၩ့ဝိၩအဖးဖီၩ့ဒဲ လမွဲဘၪ ခးစၧၩ့ကီၪ့ခးပယၩ့အဖးဖီၩ့နီၪလီၫႉ ထီးနီၪ ပကိၪ့ၥ့ၪဆၨၩဆၬဖိၪၥံၪလဖၪ လီၩထၪ့ဝ့ၫ ဘၪနီၪလဲၪ ခပယၩ့ခးစၧၩ့ကီၪ့ယီၩ ဆၧမုၬဆၧၡူၪန့အ့ၬအကၠီၩ့နီၪ မွဲဒၪ ပဒိၪၥံၪမၩထၪ့ထၬ ပယၩ့ဖးဖီၩ့အဂဲးနီၪလီၫႉ

၂၀၁၂နံၪ့ ဆၨၩဘျၪ့ဒိၪ အူၩစဲၩ့ဘိၩအီၪ့ လီၩထၬဝ့ၫဒၪ လၧခးပယၩ့ဖၧၩ့ယီၩ ဆၨၩဖိၪၥံၪအီၪဝ့ၫ (၁၃၅) ဆၨၩလါနၫ့ဂ့ၩ အ့ၪပကစူၭကီၪ့ထၪ့ထဲၩ့ ဆၨၩဆၬအမီၪ့ဎီၩ့လဖၪစွါဘဲၫ ဆၨၩဆၬအခၪ့ထံၭခၪ့ဎၧၩ့နီၪ ကအီၪဒၪ (၈) ဆၨၩနီၪလီၫႉ လါနၫ့ဂ့ၩ ဖးဖီၩ့လဖၪနီၪ ဆၧလီၩ့ဎွါအၪ့ဎၬကွ့ၭနဲၪထၬအီၪဒဲ လၧဆၧမၩလိၪလးလဖၪ ပဘၪထိးၥီၪ့လိၪပၥၭ ဒီၩ့ဝိၩအဖးဖီၩ့နီၪ မွဲယၩဒူၩအလၧၫ့အဎွ့ၩဒဲ ပဆၨၩဆၬဖိၪလဖၪအဖးဖီၩ့ မွဲလပၫဘၪအကၠီၩ့ ပဒၪဘၪနီၪလီၫႉ မွဲဆၧဘဲၫနီၪ လၧဆၧမၩလိၪလးလဖၪ ပဆၨၩဖးဖီၩ့နီၪ လပမၩလိၪဘၪဘၪလါနၫ့ဂ့ၩ အထီဘဲၫယီၩ အရ့ၩဒိၪထၪ့ဝ့ၫဒၪတၡါနီၪ မွဲပကဘၪအၪ့ဎၬမၩလိၪထၪ့ထဲၩ့ ၦဖျိၩ့ဆၨၩဖးဖီၩ့လံၬ လဲထံၫဆ့ၭယွၩလၩ့နီၪလီၫႉ

ၦဖျိၩ့ဆၨၩဖိၪၥံၪလဖၪ ပမိအီၪဖီၩ့ဖီၩ့ဖျ့ၭဖျ့ၭ ပမိမၩၡၪ့အၥၭအ့ၬ ပမိအီၪကၠၭချံၪ့ချံၪ့ရူၪရူၪနီၪလီၫႉ ပအၪ့အီၪၥ့ၪချံၪ့ချံၪ့လီၫ လုၫလါယီၩနီၪ မွဲၦဖျိၩ့ဆၨၩအဆၧနဲၪ့ကမံၩ့လီၫႉ အ့ၪပကယိထဲၩ့ၦဖျိၩ့ဆၨၩဖိၪၥံၪလဖၪယီၩစွါဘဲၫ အီၪလၧ ၡိၬကျၩ ခိၪလီၩ့ခိၪ ဆံၬဖၧၩ့လၧ ၦၡၩၥံၪလ့ၩလထီၩ့နၭဘၪအလးလဖၪနီၪ ၦဖျိၩ့ဆၨၩဖိၪၥံၪအၪဒၪဆၧစူၭကီၪ့အီၪကၠၭနီၪလီၫႉ အဝ့ၫၥံၪနီၪ ဘၪအၥၭ ဆၧခိဆၧဝီၩအ့ၬ ကမိအီၪၡူၪၡူၪချံၪ့ချံၪ့နီၪလီၫႉ ဘဲၫနီၪအၥိၭ ၦဖျိၩ့ဆၨၩခိၪနါလဂၩ မွဲဝ့ၫ ဖူၫၥမံၫ့ထိၩ့ လီၩ့ဝ့ၫဒၪ ၦဖျိၩ့ဆၨၩဖိၪၥၪၥံၪလကၭဘၪ ၥၭဘၪ့ၥံၪလဖၪ ဖီကၠၭလံၬအ့ၬ ႉ ကဘၪဖီလံၬကၠၧၫ့ဝ့ၫဒၪလီၫႉ ဖီလံၬအ့ၬ ကွ့ၭလံၬအ့ၬ မွဲဆၧဘဲၫနီၪ ဘၪထွ့ၫလၧဖးဖီၩ့နီၪ ဆၧကွ့ၭနဲၪ့ လအီၪဘၪလီၫႉ ၦဖျိၩ့ဆၨၩဖိၪၥၪၥံၪလဖၪ ပခွံၬစိၩအ့ၪ မ့ၪဖီးဖၭ (လက်ပစ်ဗုံး) လၧအဝ့ၫၥံၪအစူၪဖၧၩ့စွါဘဲၫ လၧဆၧၥၭမဲၪလအီၪဘၪ အဖၧၩ့ ကကွ့ၭၥဲၫဝ့ၫဒၪလီၫႉ လါနၫ့ဂ့ၩ ခွံၬယိစိၩအ့ၪ လံၬစီၩ့နးအူၭ ကဘၪတိၭဘူၭဝ့ၫၥၭမဲၪဝ့ၫဒၪ လံၬစီၩ့နီၪ ၥၭမဲၪဝ့ၫနၭန့ မ့ၪဖီးဖၭဒံၭ ထဲၩ့စဲၪ့ကထုၪ့လီၫ အကၠီၩ့ လီၩထၬဝ့ၫဒၪလီၫႉ ဆၧအယီၩ မွဲလၩ့ဆၧနံအဂးအ့ၬ ၦကဲၪၦဖျိၩ့ဖိၪလဂၩ ပကဘၪၥ့ၪယၫ ၦဖျိၩ့ဆၨၩဖးဖီၩ့လီၫ လပၥ့ၪယၫဘၪ ဖးဖီၩ့ ပကဘၪထီးအၪ့လီၫ ထီးပလဘၪထိးအၪ့လီၫဘၪနီၪ ပကဘၪအၪ့ဎၬ ၦဖျိၩ့ဆၨၩဖးဖီၩ့နီၪလီၫႉ