ၦမုၪနၩ့ဎံၪလၩဒဲ ဖူၫထၪ့ၦၡၩ (၂)

ၦမုၪနံၩဂၩယီၩ ဂဲၫထဲၩ့လီၩအ့ၪၦၡၩဆၧပရၧၫ့ယီၩအခၫ ဖီၫမံၩ့ဘွၩအမိအဖါဒဲ တဝၫ့ဖိၪၥံၪနီၪ ဖီၪ့လၫ့စူၪဝဲၩ ဘဲၫဎ့ၬၥံၪ ႇ ချံၫၥံၪ ကဂၩဘၪကဂၩဂီၩ့ လီၩ့ဆၧကၠၧၫ့လ့ၬႉ လါနၫ့ ဆၧအထိၬနိၩ့ထိၬနၫဖိၪမၬ ဒၪဘၪဝ့ၫအ့ၬႉ ကလ့ၩဒၪဆၧအကၠီၪ့ကအီၪပၥ့ၪလဲၪႉ ဆၧလၧဖူၫထၪ့ၥံၪနီၪ မွဲလ့ၩဆၧလၧဖံၭခိၪမီၪ့ဎီၩ့ပၧၩအ့ၬဘီၪႉဝ့ၬဝၭအၥၭဂီၩ့ ဖုၫစိၩလၧ ၥံၪ့ကထံၭဘၪကထံၭဘနီၪဘီၪႉ

အနီၪဘိၭ ၦလီၩဎွါဆၧၥံၪ ဘၪထုၪ့အၥၭနၭနၭလ့ၬႉ ကဂၬဖျိၬလၧ ၡိၬဒၧၩ့ထံၭအဖၧၩ့ယီၩအကၠီၩ့ ဆၧလၧခံၭဒံၭ ဘၪ ဘၪထဲၩ့ထဲၩ့လၧ တဝၫ့ကိၭဂၩဒ့ၭလီၫႉ ၡၨၩယၩဧၨၩႉႉႉအယီၩ မွဲဆၧၥုၪ့မဲၪၥၭဖျဲၩ့ႇ ဆၧၥုၪ့အုၭၥၭအုၭဖၭဒိၪအမုနံၩ ကနံၩ လၧတဝၫ့ ထၧၫ့တဝၫ့ယၫယီၩအဂးလီၫႉ

ဖူၫထၪ့ၦၡၩယီၩ ဂဲၫထဲၩ့န့ၦမုၪနၩ့ဖိၪနီၪ လၧအနၫ့ဆါအီၪအလး စၩ့ထံၭဖၭဒိၪအလီၩ့လီၫႉ ၥံၪ့ဖၭဒိၪယီၩ အမိဎွါနီၪ ကဝၭစူၪၥၧၫ့ဖိၬ ဒဲကထီၫအဖျါ လံဆံၫလ့ၬတၭ လၧအခံၫစီၪ့နီၪ အထဲၩ့ၥံၪအီၪတရၩလၩ့အၥၭ ဂ့ၩဂ့ၩလ့ၬႉ နးဖီၫမံၩ့ဘွၩၥ့ၪယၫနၪ့ထၪ့ထဲၩ့ၥံၪ့ယီၩ ဂ့ၩဘၪစဲၪလီၫႉ အဝ့ၫၥံၪဂဲၫထၪ့ လၧခိၪလီၩခိၪကိၭကၠၪဒ့ၭအခၫ ဒၪစိၩဝ့ၫလၧ မုထၪ့ယဲၩ့ယိၬအိၩနီၪ မွဲဒၪ ၥံၪ့အယီၩလီၫႉ

ဖူၫထၪ့နီၪ ဒုၭအၪ့ၦမုၪနၩ့ဖိၪ လၧဆၧၥူၪဆၧၥၪလါနၫ့ အဝ့ၫအၪ့ကလၩ့ဧၪႉ လါနၫ့ဂ့ၩ အဝ့ၫအီၪလၧအမ့ၬထံၫ မ့ၬနီၪ့နးဆ့အ့ၬႉ လၧဆၧခံၭကျၩနီၪ ယိထၪ့စိၩ ဖူၫထၪ့နီၪကျိၩကျိၩ လၧအမ့ၬၥၪ မ့ၪကခဲလၫ့မၬဆဲၪ့ဆဲးလီၫႉ ဖူၫထၪ့နီၪ လ့ၩၥုၬလၩ့ဘူၭအၥၭလၧ ၦမုၪနၩ့ဖိၪနီၪဂီၩ့စံၭဝ့ၫ ယဂဲၫထဲၩ့ကိၭန့နၧၩထီၩ့လၧယဂံၪ့ယူၭႉ နကဘၪကဲၪ ယမၪ ကိၭမုဆဲၫ့နံၩ ယကလ့ၩလၧ နမိနဖါအီၪ ယကလီၩ မွဲအ့ၪဒုၭအီၪဎုၬပၧၩႉ