ၦဖျိၩ့ဆၨၩလဖၪ ဘၪထွ့ၫလၧ လုၫလါထူၫရူၫဆၧးဎံၫဆၧးလၩ လံၬဂဲးထု (၄)

ထၧၫ့ဖုဝဲထံၩၥိၭဖျိၩ့ဖိၪၥံၪဧ့ႇ နံၩလၧအမုၬနဲၪႉ မုကနွံၫယီၩ ပဆၧဆၧးဎံၫဆၧးလၩအနိၪ့ဖၧၩ့ ၦဖျိၩ့ဆၨၩလဖၪ ဘၪထွ့ၫလၧ လုၫလါထူၫရူၫ ဆၧးဎံၫဆၧးလၩ လံၬဂဲးထုနီၪအဖၧၩ့ ယမိဆုးအဲၪဒိၭအၪ့နၩ့လီၩဖ့ၪနဲၪဘၪ ထၧၫ့ဖုဝဲ ဖျိၩ့ဖိၪၥံၪ ပကြၨၭဖီၪ့ဂုးထၬ ပလုၫလါထူၫရူၫလဖၪ လံမံၩ့ကမံၩ့နီၪမွဲဝ့ၫ ဆၧလီၩဖျီၪ့ထၪ့ဆၧအဲၪဒဲ ဆၧအီၪဎုၬမုၬ (ချစ်ရေးဆိုခြင်းနှင့် ထိမ်းမြှားခြင်း) လုၫလါထူၫရူၫ နီၪလီၫႉ

          လၧဖျိၩ့ဖျိၩ့အိၩ ၦဖျိၩ့ဆၨၩ အမုၪနၩ့ အဖျဲ လဖၪ လီၩဖျီၪ့ထၪ့အဆၧအဲၪန့ ပျီၩပျီၩဖျ့ၭဖျ့ၭနီၪလီၫႉ လကၭဒံၭဘၪ ကဂၩဒဲကဂၩ ဖံၭထံၩဖံၭၥိၭလိၬၥၭန့ ဘူၭဘူၭထံၭထံၭနီၪလီၫႉ လါနၫ့ဂ့ၩ လၧလိၫဘၪ ဆၧဘၪမၪလဖၪ မွဲမၩဘၪဝ့ၫ နးဆံၭအ့ၬနီၪလီၫႉ လုၫလါထူၫရူၫယီၩ မွဲမၩဖျီၪ့ထၪ့ ဆၨၩဆၬအဆၧအုၩ့လၩ့ဂုးခၧၫ့အကၠီၩ့ ကြၨၭပဆုးဖီၪ့ဂုးထၬ နီၪလီၫႉ

          တလၭမူၭမုၪခွၫနံၫဂၩ လချုၭအီၪဎုၬဒံၭဘၪ လိၫဝ့ၫဒၪအခံၫ့ လၩၡၩခိၬအဖၧၩ့နီၪ တလၭမူၭမုၪနီၪ ကဘၪထၬ တလၭမူၭခွၫအဆၧကိၭဆၧၥိၭနီၪလီၫႉ ထီၩ့လၧ ဆၧအီၪဎုၭမူၭမုနံၩအခၫ တလၭမုၭခွၫနီၪ ကဘၪလ့ၩလၧ တလၭမူၭမုၪအဂံၪ့ ၦအီၪဒံၭလၧအမိအဖါ (လိၬဖၪ့ခွၫ) ကၠၧၫ့ကၠၧၫ့ ဒဲ အထံၩၥိၭလဖၪ ဆိၪဖၪထၪ့ဖျိၩ့ၥၭအွံၪ ထၩၥံၪ ကဘၪလ့ၩလၧ တလၭမူၭမုၪအဂံၪ့နီၪလီၫႉ အထီနီၪ ဘဲၫပဖီၩ့ဖျ့ၭလၧ ဆၧလၩ့အၪ့ယိၫအဂး ၦမွံၩၦၡါလဖၪ ကဘၪအူၪထၪ့ ခွ့ၩနီၪလီၫႉ ထီၩ့လၧ တလၭမူၭမုၪအဂံၪ့အိၩအခၫ ၦလၧအမိဖါအီၪကိၭဂၩဒံၭ ၦခွၫဖျဲဖိၪလဂၩ ကဘၪၡီၪ့လၩ့တလၭမူၭခွၫလၧ ထံၫအချံၪ့နီၪလီၫႉ တလၭမူၭခွၫ အဆၧကီၩ့ဆၧၥိၭအစီၪ့လဖၪနီၪ တလၭမူၭမုၪ ကဘၪအၪ့ဆိၪလၬအ့ၪဒဲ ကဘၪဖ့ၪလၫ့ထဲၩ့ဝ့ၫ အဝ့ၫ ထၬထၬအ့ၪတလၭမူၭခွၫအဂး ဆၧကီၩ့ဆၧၥိၭလဖၪနီၪလီၫႉ လၧဆၧအီၪဎုၬမုၬ ဆၧထံၪလၩ့ဒီၪလၩ့နီၪ တလၭမူၭမုၪဒဲ တလၭမူၭခွၫ ဆၧဖ့ၪဆွ့ၪအ့ၪလိၬၥၭမ့ၩႇ ကလိၬထၪ့ မိဖါ ဒဲ ခိၭနၪလၩ့ဎိၭထၪ့ မိဖါ ၦမွံၩၦၡါလဖၪ အဆၧၥီၪ့ဆၧၥၫ့နီၪလီၫႉ ၦဖျိၩ့အီၪလးကျဲၩ့ လနၩ့နၩ့နီၪ ကိၭအ့ၪဝ့ၫအလၩလၧ ဆၫ့ နီၪလီၫႉ လၧဆၧအီၪဎုၭမူၭဆၧထံၪလၩ့ဒီၪလၩ့နီၪ မၩထီးထၬဝ့ၫလၧ ဖျုၩႇ ဆၧလုလၧထီး ဆၧမၩထီးထၬဆၧ လဖၪယီၩ မွဲၦဖျိၩ့လုၫလါယီၩ ဆၧမၩယံၩယါအီၪအ့ၬနီၪလီၫႉ လါနၫ့ဂ့ၩ ဘၪထွ့ၫလၧ ဆၧအီၪဎုၬမူၭဆၧထံၪလၩ့ဒီၪ လၩ့နီၪ အလးကစီၪ့ဒဲ ကစီၪ့ လမီၪ့ဎီၩ့ဘၪကအီၪ ကဆံၭကခ့ၭနီၪလီၫႉ

          ၦဖျိၩ့ဆၨၩလဖၪ ဘၪထွ့ၫလၧ လုၫလါထူၫရူၫ ဆၧးဎံၫဆၧးလၩ လံၬဂဲးထုနီၪအဖၧၩ့ ပကြၨၭဆုးဖီၪ့ဂုးခၧၫ့ထၬ လုၫလါထူၫရူၫလဖၪနီၪ လၧခဲၫ့မုနွ့ၫမၬ ယကဆုးလီၩဖ့ၪနဲၪဘၪနၥံၪဒဲ ပကဒၪဎီၩ့ထဲၩ့လိၬၥၭလၧ ၦဖျိၩ့ဆၧးဎံၫဆၧး လၩအနိၪ့ဖၧၩ့ယီၩနဲၪႉ