ပမီၪ့ဆၧယီၫ ပခီၩ့ဆၧကၪ

အခီၫပယီၫနီၪဘိၭ အ့ၪပဆီၩ့မီၪ့ဆၧယီၫယီၫလီၫနီၪ မုအီၪကနံၩ ပကဒၪဎီၩ့ထဲၩ့ ဆၧကၪဆၧဂဲၩ့နီၪလီၫႉ ကကၠၪကၠၪ ဆၧယီၩ ဖ့ၪလၫ့ပၧၩဆၧမၩလိၪ ဖၭဒိၪလီၫႉ ဆၧလၧပကဘၪမၩဆၧကမံၩ့မံၩ့နီၪ ပတဲၩ့ဝဲၩ့ပၥၭဂ့ၩအ့ၬ ပတဲၩ့ဝဲၩ့ပၥၭလၧၫ့လၧၫ့ဎွ့ၩဎွ့ၩအ့ၬ အလးအီၪလၧ ပကဘၪတဲၩ့ဝဲၩ့ပၥၭ ဂ့ၩဂ့ၩဘၪဘၪလီၫႉ ထီးမွဲဆၧလၧပကမၩကမံၩ့ယီၩ အ့ၪလကဲၪ့ထၪ့ကဲၪ့ထီၫ့ဘၪတၭ ပကမၩထဲၩ့ပၥ့ၪလဲၪႉ ဆၧမၩလၧပကမၩယီၩ အ့ၪကဲၪ့ထၪ့ဆၧကၪဆၧဂဲၩ့တၭ ပကဘၠၩ့ကၥ့ၪထဲၩ့လၧဖၧၩ့ၥၭပၥ့ၪလဲၪႉ ဒဲ အ့ၪမွဲပဘၠၩ့လၥ့ၪဘၪတၭ ဘဲၫၥိၭထီးကဲၪထၪ့ဆၧကၪဆၧဂဲၩ့လဂ့ၩအဂး ပကဒူၭထူၬပၥ့ၪလဲၪႉ အယီၩမွဲပကျ့ၭဆီၪ့မီၫ့စိၩထၬဝဲၩ့ လကြၨၭလၧ လၧပမၩဘၪဆၧကမံၩ့မံၩ့နီၪလီၫႉ ကကၠၪကၠၪ ဆၧလၧပမၩနီၪ အၪဒၪဆၧ ဘဲၫအကဲၪထၪ့အၥိၭ ပမၩလီၫႉ ကကၠၪကၠၪ ဆၧလၧအကဲၪထၪ့အၥိၭ ပမၩတၭ ကဲၪထၪ့ဂ့ၩဘၪစဲၪ့ လါနၫ့ဂ့ၩ ဘဲၫအကြၨၭကဲၪ့ထၪ့ဝ့ၫအၥိၭနီၪ ကဲၪ့အ့ၬႉ ကဲၪ့ဝီၩ့ကဲၪ့ဘၪခွံၬဝ့ၫနီၪလီၫႉ ကကၠၪကၠၪလၧ ဆၧလၧအဂဲၫကဲၪထၪ့နီၪ ပဖိၬၥရွ့ဂီၩ့ပမၩတၭ ကဲၪထၪ့ဆၧကၪဆၧဂဲၩလၧ ပဘၠၩ့လူၬလၥ့ၪလၧၩ့ဘၪနးဆိၬအီၪ ၥ့ၪဝ့ၫလီၫႉ ၦဖျိၩ့ဖိၪၥံၪ မုဆၫကနံၩယီၩ အလးအီၪလၧကဘၪယိဆီၪ့မီၪ့ဆၧ ဘဲၫယီၩၥိၭ ဆီၪ့ဆီၪ့လ့ၬနီၪလီၫႉ အ့ၪပဆီၪ့မီၪ့ဆၧယီၫယီၫနီၪ မုအီၪကနံၩ ပဘၪဒၪဎီၩ့ထဲၩ့ဆၧကၪဆၧဂဲၩၥ့ၪ အကၠီၩ့တၭ လၧပဆၧဖံၭဆၧမၩကမံၩ့မံၩ့အဖၧၩ့ အလးအီၪလၧ ပကဘၪယိထံၫယိဆၭ စၭထၪ့ခီၫလၧ အခၪ့ထံၭ ထီးအထူၬနီၪလီၫႉ