နးမုၪအဲၩ့ဒဲ စၥူၫလဲၫ့ (၃)

တကူၩကူၩ ကူၩ ႉႉႉနးမုၪအဲၩ့ ဆီၩ့မုဘဲၩ့ အၪ့မၧၫ့စၥူၫလဲၫ့ဂဲၫထဲၩ့ စၥူၫလဲၫ့နအီၪခလဲၪႉႉႉ တကူၩကူၩ ကူၩ

ထၧၫ့ဖုဝဲမုၪခွၫၥံၪဧ့ႇ ၦၡါဖိၪယီၩ ထီၩ့စိၩလၧ ထိၪလွံဖိၪ လ့ၩလီၩ့ဎွါ စၥူၫလဲၫ့ယူၭနဲၪႉ ထိၪလွံဖိၪ လ့ၩလီၩ့ကိၭၡါ လီၩ့ဎွါစၥူၫလဲၫ့ တကူၩကူၩ ကူၩ ႉႉႉနးမုၪအဲၩ့ ဆီၩ့မုဘဲၩ့ အၪ့မၧၫ့စၥူၫလဲၫ့ဂဲၫထဲၩ့ စၥူၫလဲၫ့နအီၪခလဲၪႉႉႉ တကူၩကူၩ ကူၩ ဘဲၫယီၩၥိၭလီၫႉ အခံၪ့ထၪ့ဘၭ ယံၬထၪ့ (၇) ၥၫ့အခၫ ထိၪလွံဒၪစၥူၫလဲၫ့ဂဲၫထဲၩ့လၧဖၧၩ့ၥၭ လီၩဖ့ၪနဲၪအ့ၪဝ့ၫအဂဲးအဖးအခၫ စၥူၫလဲၫ့မိနဲၩ့အ့ၬ လါနၫ့ ဒၪဘၪနးမုၪအဲၩ့အဖဲၫ့စ့ၩလၧ ထိၪလွံအခိၬဘီၩ့တၭ ၥ့ၪယၫဝ့ၫဒၪလၧ နးမုၪအဲၩ့မၩဒၪဎီၩ့ဆၧနိၫ့ဆၧနၭ တၡါယူၭလီၫႉ ထၧၫ့ဖုဝဲဖျိၩ့ဖိၪၥံၪဧ့ စၭထၪ့လၧ နးမုၪအဲၩ့ဒူၭလံၬလၪ့ ထိၪလွံအဖဲၫ့စ့ၩနီၪ ထိၪလွံလဖၪအခိၬဘီၩ့နီၪ အစံၫဖီးအီၪထးဝ့ၫဒၪအကၠီၩ့ ဖံၫဖူၫၥံၪလၧဖျိၩ့ဖျိၩ့အိၩ လီၩယံၩယါအ့ၪပၧၩနီၪလီၫႉ စၥူၫလဲၫ့လဂၩ လၧဆၧလၧယိလါဘၪအဖၧၩ့ နါဂၧၫ့ဘၪအမၫအဆၧပရၧၫ့အခၫ လၧဆၧၥုၪ့လမုၬၥၭလမုၬဘၪအဖၧၩ့ ဂဲၫထဲၩ့ထဲၩ့လၧဂံၪ့ ဂဲၫထဲၩ့ထီၩ့အခၫ အဂံၪ့နဲၩ့ထံၭ ၦၡၩၥံၪလဖၪ လီၩအ့ၪ ဆီးမုထဲၩ့န့အမၫၥၭဘီၩ့အကၠီၩ့ ၦၡၩၥံၪဝၩ့လီၩဖ့ၪနဲၪအ့ၪလၥၨၩႉ ကနၩ့နၩ့နီၪဘိၭ  လ့ၩနဲၪအ့ၪစၥူၪလဲၫ့ ဆီးမုအဖၧၩ့နီၪလီၫႉ စၥူၫလဲၫ့လဂၩ ကလ့ၩကိၭထဲၩ့ နးမုၪအဲၩ့အဂး ခုၪ့ဖံၭ ကနံၩဂီၩ့ကနံၩလါနၫ့ မွဲလထီၩ့ဘၪလၧ နးမုၪအဲၩ့အီၪနီၪလီၫႉ ဘၪအီၪဝ့ၫဒၪလၧ ဖံၭဖၧၩ့အိၩ နးမုၪအဲၩ့လဂၩနးဆ့ ကနံၩကနံၩ အီၪခိၬယိလါ စၥူၪလဲၫ့ကဂဲၫမၩဆၧၩ့အဝ့ၫလၧ ဆၧမ့ၬထံၫမ့ၬနီၫ့အကျၩလီၫႉ

စၥူၪလဲၫ့နးဆ့ လဒၪဘၪနးမုၪအဲၩ့နီၪ ကနံၩကနံၩ ကျ့ၭစၨၭခုၪ့အဖံၭနီၪ ကဘၪအၪ့ဆၧအီၩဆၧ နၪ့ထၪ့အၥၭလၧၩ့အ့ၬ ဆုးခုၪ့ဒၪမွဲဖံၭလီၫႉ စၥူၪလဲၫ့လဂၩ လၧဆၧၥုၪ့လမုၬၥၭလမုၬဘၪအဖၧၩ့ ဆုးခုၪ့ဒၪဖံၭနီၪအထီ ထွံၪကဒုၩဂဲၫမၩကၪဂဲၩ့ထၬအဝ့ၫတၭ အဝ့ၫၥၭထၪ့ လူဝ့ၫလၧ ဖံၭခုၪ့ ထွံၪကဒုၩ ၥံၫလီၩ့ဝ့ၫဒၪလီၫ ႉ စၥူၫလဲၫ့လဂၩ ထွံၫအၥံၫစွၪနီၪ ကဘၪခွံၬၡိၬဝ့ၫလနၫ့ဘၪအၥၭတၭ ဆုးခုၪ့ဒၪအဖံၭနီၪ ထၪ့ဘၭလံၥၫ့အခၫ ထွံၪနီၪထၪ့အုၪ့ လိၫ့ဂဲၫထၪ့ဝ့ၫဒၪလီၫႉ လိၫ့ကနၩ့နၩ့ ထဲၩ့လၩ့ထ့ၬလၧ ဖံၭဖၧၩ့နးမုၪအဲၩ့ အီၪအလးနီၪလီၫႉ

နးမုၪအဲၩ့လဂၩ ယိထၪ့လိၫ့လဖၪနီၪဂီၩ့ အၪ့ကံၩ့အခွးလၧ ဂူဖၭဒိၪအီၪ အယီၩမွဲဝ့ၫအဝၩအစွၪလီၩ လၩ့ထ့ၬဝ့ၫဒၪလိၫ ့အကၠီၩ့ ကမိထဲၩ့ဂုလၪ့အဝၩနီၪလီၫႉ လါနၫ့ မွဲဂူဖၭဒိၪ လဒူၭထဲၩ့ဘၪအဝ့ၫလီၫႉ