နဒၪၥံၪ့အဖံၭလါနၫ့ မၥံၪ့ပၫလဲၪ နလီၩလၥ့ၪ (၂)

ဖံၫမုၪၡါယီၩ ဖိၪခွၫနံၫဂၩ ထၪ့ၡါဂီၩ့ကကၠၪ ဖ့ၪလၫ့အ့ၪဝ့ၫ ဂံၪ့ဒဲ ဆံၭလးၥံၪလီၫႉ လခဲၫ အဖိၪခွၫဎိၩနီၪ အဖိၪအီၪ (၃)ဂၩ အဖိၪခွၫဆံၭနီၪ အဖိၪအီၪ (၃) ဂၩလီၫႉ ကနံၩနီၪတၭ ဖံၫမုၪၡါနီၪ အဖိၪခွၫနံၫဂၩယီၩ ကအၪ့နၩ့အ့ၪဝ့ၫခီၫ့အဲၩ့ၥံၪတၭ ခီၫ့အဲၩ့ၥံၪလဖၪနီၪ အၪ့နၩ့လၫ့ဝ့ၫဖိၭဖၫ့ဂီၩ့ ဘီၪ့ထၬဝ့ၫဒၪလၧ နံၫလီၫႉ အလံၩမုၪလၧ အဖိၪခွၫဎိၩအဖိၪမုၪဂဲၫထဲၩ့ထၬ စံၭဝ့ၫ ထဲၩ့န့ယနံၫဘီၪ့ယီၩ အၪ့မၧၫ့နမိမိအၪ့ဆိၫ့လၬအ့ၪယၧၩႉ ဖိၪၥၪဂဲၫထဲၩ့န့ ထီၩ့လၧဂံၪ့အခၫ အဒဲၪ့ယီၩ လမိအၪ့ဆိၫ့လၬဘၪဝ့ၫအဖၧၩ့ အၥၭထၪ့တၭ လ့ၩခွံၬလၩ့အၪ့ဆိၫ့လၬဝ့ၫလၧ ထံၫချိၬဖၧၩ့တၭ ထီၫ့လဖၪလၩ့ထ့ၬလၬလၧ ထံၫကျၩထီးအလူၬ နီၪလီၫႉ

ဖိၪခွၫဆံၭအမၫဝ့ၫဒၪ အဖိၪထဲၩ့န့ နံၫဘီၪ့ထီၩ့အခၫ ခဲၪ့ကံၭအမံၩ့ၡါ  မအီၪမုၬအ့ၬဎွ့ပၥ့ၪလဲၪ လ့ၩအၪ့ဆိၫ့လၬနံၫအခၫ ဒၪဘၪလၧထီၫ့ၥံၪတၭ ၡးဖျးစံၭအဖိၪ နဂဲၫထဲၩ့န့ မနံၫဘီၪ့ဘၪမၪဧၪၥ့ၪယၫအ့ၬ ထဲၩ့ၥိၪ့ထဲၩ့အ့ၪအမံၩ့ၡါအခၫ အမံၩ့ၡါစံၭဆၧၫ့ထဲၩ့ ဘၪမၪအ့ၬ အနီၪယဖ့ၪလၪ့နၧၩ ခီၫ့အဲၩ့လီၫႉ

လခဲၫထုၬ ဖိၪခွၫဆံၭၥံၪအဂံၪ့ဒီၪ့နီၪ ကဲၪဒိကဲၪမုထၪ့ဒဲ ဖိၪခွၫဎိၩအဂံၪ့ဒီၪ့နီၪ ကဲၪဒၪ မၩကနံၩ အၪ့ကနံၩနီၪလီၫႉ ဘၪန့လဲၪစွါဘဲၫ အမိဖ့ၪလၫ့အ့ၪ ခီၫ့အဲၩ့ စ့ၩၥံၪထီၫ့ၥံၪလဖၪ လၩ့ထ့ၬလၬလၧ ထံၫကျၩ့ထီးအလူၬအကၠီၩ့နီၪလီၫႉ  ဖံၫမုၪၡါလဂၩ အၪ့အူၭထၬဘၪအဒဲၪ့မုၪဎိၩ လီၩဆၫထၬဘၪအဒဲၪ့မုၪဆံၭ ၥ့ၪယၫထဲၩ့ဝ့ၫအတီၩ နီၫ့ယါလၩ့ထဲၩ့အၥၭနီၪလီၫႉ

ၦၡါဖိၪယီၩအမံၩ့နီၪမွဲ နဒၪၥံၪ့အဖံၭလါနၫ့ မၥံၪ့ပၫလဲၪ နလီၩလၥ့ၪ ဘၪၡါဖိၪနီၪလီၫႉ