မၩဘဲၫၥိၭ ဒံၫမီၩကရ့ၫစံၫ

ဖဆပလ ခရၧၫ့ထ့ၬဖၭထၪ့တၭ ကကဲၩ့နီၪ ကဲၪ့ထၪ့ အဝီၩ့ ကကဲၩ့နီၪ ကဲၪထၪ့အဘၩ့အခံၫ့နီၪ အဝီၩ့ကကဲၩ့နီၪနးဆ့ ဘဲၫၥိၭအဝ့ၫၥံၪအပဒိၪကနၧၩ့အဂး ဖ့ၪလၪ့ကၠၭအ့ၪအဝ့ၫၥံၪဆၧဖၭအီႉ အဘၩ့ကကဲၩ့နီၪဆ့ ဘဲၫၦၡၩကထံၭလၩ့အဝ့ၫအီၪ ဆၧဖၭအဂး ထၧၫ့ခးယၫ တဝၫ့ဖၧၩ့ဖိၪၥၪၥံၪလဖၪ အီၪထးလအ့ၬ လီၩ့အၪ့ခွ့ၫကၠၭဆၧဖၭ လၧအဝီၩ့ကကဲၩ့အိၩ ၦၡၩၥံၪယီၩ အဘၩ့ကကဲၩ့ၦၡၩၥံၪယီၩ ဂဲၫထီၩ့ဝ့ၫဒၪလၧ ခလီနိနီၪလီၫႉ
ၦအဂဲၫအၪ့ခွ့ၫဆၧဖၭလဖၪ နံၫကဲၩ့လူၬနီၪ လီၩ့ကၠၭဝ့ၫဒၪ ဆၧရွံထၪ့ယီၩ ရွံမွဲအဝ့ၫၥံၪလီၫႉ ဒံၫမီၩကရ့ၩစံၫကဘၪန့အလၧၫ့အဎွ့ၩ အၪ့ခွ့ၫလၩ့ဆၧဖၭ လီၩ့ကဲၠၭဝ့ၫဘဲၫယီၩၥိၭလီၫႉ
အၪ့ခွ့ၫဆၧဖၭဂီၩ့ လယံၬလမီဘၪအထီ ဂဲၫၥုၪ့ကၠၭ ဆၧဖၭအဒူၭကဖျိၪ့လီၫႉ ကမၩန့ကၠၭ ၦခမျၧး ဆၧၥၭအီၪအဆၧဖၭလၥၨၩႉ
လးဝၩ့ယီၩ ၦၡၩကထိးရွ့အၥၭ အီၪအၪအၪအ့ၬႉ အီၪမၬ ကဝီၩ့ကဂၩ အဘၩ့ကဂၩလီၫႉ မွဲဆၧဘဲၫနီၪ ကဘၪဖ့ၪလၫ့ဆၧဖၭကနံၩနီၪ ဒံၩ့အၪ့ခွ့ၫဒီၭႉ ဆၧဒုၭအၪ့ဒုၭအီၩဆၧမွဲအီၪႉ ဆၧလီၩ့မၩၥၭမဲၪဆၧ မွဲအီၪဆ့စွါဘဲၫႉ
လၧဆၧဖၭအဒူၭနီၪ ကထိးရွ့ထၪ့အၥၭနံၫကဲၩ့လူၬ ၦလၧမူၩဒၩအီၪလဖၪ ဘၪခိၭဝ့ၫဒၪလၥၨၩႉ ဆၧဘၪဖ့ၪလၫ့ဆၧဖၭမုနံၩနီၪ ဝဲထၪ့ထၬဝ့ၫခလီးနိဆၧဖၭဒူၭနီၪ လဂီၩ ၈နၫရံၫ ထီးထီၩ့စိၩ လဂၫ လံနၩရံၫလီၫႉ လါနၫ့ မုဆၫကနၩရံၫအခံၫ့နီၪ ၦၡၩလၩ့ၡၩယူၭႉ နံၫနၩရံၩလထၪ့ဘၭဒံၭဘၪနီၪ အနုၬလၩ့စဲၪ့လၫ့အီၪလၧၩ့အ့ၬႉ အနီၭဘိၭ ဆၧဖၭကိၫ့စၩနံၫဂၩ ချဲၩ့လၩ့ဎိၭဂီၩ့ ကၠၧၫ့ကၠၧၫ့လၧ ပၧၩမူၩဒၩအီၪၥံၪလဖၪ ကလ့ၩနူၬလၩ့ယိ ဆၧဖၭအဂဲးအဖး လ့ၩနူၬလၩ့ကၠၭလၧ ဆၧဖၭအဒူၭဖၧၩ့လီၫႉ ထီၩ့လၧဆၧဖၧၩ့ဖၧၩ့အခၫ ကိၫစၩနံၫဂၩနီၪ ဒဲၭလၩ့အၥၭဂီၩ့ စံၭဆၧ မၩဝ့ၫပယီၩ မွဲထၪ့ဆ့ယါႉ
အကၠီၩ့နီၪ ထူၭလူၬထူၭဆံၫ့ထၬဝ့ၫထၬ ဘျုၪ့အၪ့ဘျုၪအီၩ့ထၬဝ့ၫလဖၪ ကဲၪ့လၪ့ ပဂးလၩ့ထံၫလၧ မ့ၬဖၫ့ခိၪ ခလီးနိဆၧဖၭအဘျၪလဖၪထီးအလူၬနီၪ ထံၭလၩ့ဝ့ၫလၧ အဝီၩ့တလၫဖၧၩ့အ့ၬ အဘၩ့တလၫဖၧၩ့အ့ၬဂီၩ့ ဒၪဘ ၪဝ့ၫလၧ စူၭကီၪ့ထၬဝ့ၫဒၪတလၫနံၫဖျိၪ့အကျၩလီၫႉ
ဒၪဝ့ၫဘဲၫယီၩၥိၭအခၫ ကိၫစၩနံၫဂၩအၥၭထၪ့ဂီၩ့ လ့ၩထၪ့လၧတဝၫ့ဖၧၩ့ ကိၭၦလၧလီၩ့အၪ့ခွ့ၫထၬဆၧဖၭ အဝ့ၫၥံၪနဲၩ့ဘၪၦၡၩၥံၪနီၪဂီၩ့ အဲၪ့လိၬဝ့ၫ ဆိၪဆံၭဝ့ၫ ကထဲၩ့ဖီၪ့ထၬအဝ့ၫၥံၪလီၩဝ့ၫဘဲၫယီၩၥိၭလီၫႉ
တဝၫ့ဖၧၩ့ဆၧကဲၪ့ထၪ့ဘဲၫယီၩၥိၭနီၪ ၦလၧဖ့ၪလၪ့ထၬဆၧဖၭလဖၪ နါဂၧၫ့တၭ ဂဲၫစူၭကီၪ့ထၪ့ကၠၭအၥၭဂီၩ့ ဟ့ၭ ဆရၫ ကိၫ့စၩလဖၪ အဲၪလိၬပၦၡၩအဎိၩကစ့ၩ မွဲၦၡၩအဎိၩၥံၪအဆၧဖၭအ့ၬ မပဆၧဖၭ အ့ၪနမိဖီၪ့နီၪ ထဲၩ့ဖီၪ့ခွံၬပၧၩထီးအလူၬႉ နၥံၪနံၫခရၧၫ့လူၬနီၪ နၥံၪလီၩဒံၫမီၩကရ့ၫစံၫဂီၩ့ ၦမၩဘဲၫၥိၭ ဒံၫမီၩကရ့ၫစံၫအၥိၭနီၪ နၥံၪထိးလန့ဘၪ အလးအီၪအ့ၬ ဝၩ့လီၩ့ကၠၭ့ဝ့ၫဘဲၫယီၩၥိၭအခၫ ကိၫစၩနံၫဂၩယီၩ ထဲၩ့ကထုၪ့လီၫစွါဘဲၫႉ ထီၩ့လၧမုနၩခီၫအခၫ ဝဲထၪ့ယိဝ့ၫလၧ ဖၫအၫ့ရိၩ့အခၫ ဒၪဘၪဝ့ၫ အဝီၩ့တလၫနီၪ န့နံၫဘျၪစွါဘဲၫႉ