ၥၭဂ့ၩဝ့ၫဒၪ ခလီးနိဖိၪ

လၧခိၪလၩဘွၩဂဲၫပၧၩ့ဆၧအထီအိၩ လၧခလီနိနီၪ ၦလၧအၪ့န့တဝၫ့မူၩဒၩခိၪနါနီၪ အနံၪ့ထၪ့ဘၭ ကဘၪရွံထၪ့ထဲၩ့ တဝၫ့ခိၪနါနီၪလီၫႉ ၦလၧကမိထိးရွံထၪ့အၥၭ ခိၪနါအလးနီၪ အီၪဝ့ၫနံၫဂၩတၭ ကဘၪမၩဆၧရွံထၪ့နီၪလီၫႉ

ထၧၫ့ဖုဝဲမုၪခွၫၥံၪဧ့ႇ မၩထၪ့ကၠၭ ဆၧရွံထၪ့လၧ ဖျီၩ့ကထံၭတဝၫ့ ၥၫ့ခၫကၠီၩ့နီၪ လၧဝံးဒီၪ့ ခိၪနါၥံၪလဖၪ မွဲဘၪဂဲၫထၪ့ဆ့လၥၨၩႉ လၧတဝၫ့ခိၪနါပၧၩ့ဆၧအဖၧၩ့နီၪဆ့ ၦၡၩၥံၪဂဲၫကၠၭ ကဂံၪ့ကဂၩ၊ ဆၧလၧတဝၫ့ခိၪနါနီၪ လၧတဝၫ့ဖိၪၥံၪအဖၫ့ခိၪ ဂ့ၩမွဲဂ့ၩႇ လဂ့ၩဘၪမွဲဂ့ၩနီၪ အီၪဒၪလၧ တဝၫ့ခိၪနါၥံၪအဖါခိၪလီၫ မွဲအ့ၬဧၪႉ အ့ၪရွံထၪ့ ခိၪနါဘၪမၪနီၪ တဝၫ့ဖိၪၥံၪလဖၪ ကဘၪထိးနီၪ ၥ့ၪယၫကၠၭဝ့ၫတၭ ကဂဲၫဖ့ၪလၫ့ဆၧဖၭအဂး ဂဲၫကၠၭဝ့ၫဒၪလီၫႉ ၦၡၩဂဲၫအၪဒ့ၭတၭ ၥၫ့ခၫကၠီး ထီးလၧၩ့အ့ၬ ၦၡၩဘၪလီၩ့အီၪလၧ ၥၫ့ခၫကၠီးနဲၩ့ လၧၥံၪ့ခၪ့ထံၭ လအိၩကဝၩ့ လယီၩကဝၩ့ ခိၬကၠၭ ဆၧရွံထၪ့အခံၫ့နီၪလီၫႉ

ထၧၫ့ဖုဝဲမုၪခွၫၥံၪဧ့ ၦလၧကထိးရွံထၪ့အၥၭနီၪ မွဲ တဝၫ့ခိၪနါလံၩ မၩ့စံၫ့ကၠဲဒဲ ယီးဆရၫ မၩ့ပၩ့ကၠီၪအ့ၩနီၪလီၫႉ

အၥိၭနံၫဂၩယီၩနီၪ တဝၫ့ခိၪနါလံၩ မၩ့စံၫ့ကၠဲနီၪ အရွဲအၥၪမွဲအၪႇ မွဲကဲၪဒိၪႇ မၩဆၧမၩမွဲတီၩလီၩဆ့လီၫႉ  မမၩ့ပၩ့ကၠီၪအ့ၩနီၪ  မွဲယီးဆရၫလဂၩတၭ ၦၡၩကိၭအဝ့ၫလၧဆရၫကိၭ ဂၩဒ့ၭလီၫႉ အဝ့ၫနီၪ ကဲၪဒိၪအ့ၬ လါနၫ့ တီၩလီၩ့ဝ့ၫဒၪ အ့ၪထံၭလၩ့စူၪနိၩ့လၧ အဝ့ၫအနိၭဖၧၩ့တီၫ အဲၪ့ဝ့ၫအ့ၬစွါဘဲၫႉ

တဝၫ့ခိၪနါအလံၩနီၪနးဆ့ ကမိစဲၪ့လၩ့လၧ ခိၪနါအလးယီၩနးဆံၭအ့ၬႉ ဆၧမၩယီၩအဲၪဒိၭဝ့ၫ အၪမၬဒဲ လၧဝံးၦၡၩအဎိၩၥံၪအ့ၪဂဲၫလၧ အဝ့ၫအဂံၪ့လၧလဲၪ့ၥိၪနီၪ အဝ့ၫဆၧမူၭအၥၭအၪမၬ အၪ့အူၭလၩ့အၥၭအၪ့မၬလီၫႉ

ယီးဆရၫ မၩ့ပၩ့ကၠီၪအ့ၩနးဆ့ အီၪဝ့ၫၥ့ၪရိၩရိၩဖိၪလီၫလါနၫ့ ကမိကဲၪၦၡၩအဎိၩဒံၭႉ

ဆၧရွံထၪ့အခံၫ့ဘၪအခၫ ၦလၧမူၩဒၩအီၪ ဝံးခိၪဒိၪနီၪ စံၭဆၧ မၩဆၧဖၭၥံၪဘၪၥံၪနးမံၩ့ကစ့ၩ လၧပၧၩဘၪအၥၭအၪလဂၩနီၪ လီၩဂီၩ့ ရွံထၪ့မၬလီၫႉ အနီၪအခံၪ့လူၬလၧၩ့အ့ၬ နၥံၪကထဲၩ့ဘၪဖျဲၪႉ ကနၩ့နၩ့ ကဘၪထဲၩ့ယဲၩ့ နၥံၪကဘၪထဲၩ့နီၪ မွဲအရ့ၩဒိၪဆ့ လီၩ့ဝ့ၫဘဲၫယီၩၥိၭအခၫ တဝၫ့ခိၪနါလံၩ အၦၡၩလဂၩ ဂၭထုၪ့လီၩဆၧ ယၧၩယဘၪဒၪယၥၭ ခိၪနါအလံၩ အခၫ ၦဂူၫဂၩၥံၪ လအိၩလဂၩ လယီၩလဂၩ ဂၭထုၪ့လီၩ့ဝ့ၫ ဘၪကၠၭအၥၭ ခိၪနါအလံၩဆ့တၭ လခဲၫထုၬ မိလ့ၩကဲၪထၪ့ ခိၪနါအလံၩ အၦၡၩထီးအလူၬလၥၨၩႉ

ထီးနီၪ ၦလၧအဒၨထၭကၠီးထုၪ့ အဲၪ့ယဲၩဖုလၫ မၩ့ၥၩ့ကၠုၫလဂၩ ဂၭထၪ့လၪ့ဂီၩ့ စံၭဆၧ ယၧၩယဘၪယၥၭမၩ့ပၩ့ကၠီၪအ့ၩလီၫ လါနၫ့ အဝ့ၫအလးခဲၫ ပၧၩလၧ ဆုးဘၪအၥၭ အီၪနးဂၩအ့ၬစွါဘဲၫႉ အနီၪဘိၭ ဝံးဒီၪ့ဒိၪနီၪ ဘၪဒုၭထၪ့ထဲၩ့ဒၪ ခိၪနါအလံၩနီၪလၥၨၩႉ ဂီၩ့နီၪၦၡၩၥံၪထဲၩ့ကၠၭဝ့ၫလီၫႉ

မၩ့ၥၩ့ကၠုၪထဲၩ့ထီၩ့လၧအဂံၪ့အခၫ အမၫၥၭဘီၩ့နါဂၧၫ့ထၬအဝ့ၫအဆၧပရၧၫ့ဘိၭ စံၭအဝၩ နၧၩဝ့ၫဆ့ နလ့ၩလီၩ့ နဘၪနၥၭလၧ မၩ့ပၩ့ကၠီၪအ့ၩ ခီၫလၧ အဆိၫထုၬအိၩ အဝ့ၫနၧၩ့အ့ၬ နၥ့ၪယၫထၬဆ့နီၪ အမၩအဲၪလိၬအဝ့ၫ ဘဲၫယီၩၥိၭလီၫႉ

ကထုၪ့ဎး စံၭဆၧၫ့ထဲၩ့အမၫ အီၩ မၫၥၭဘီၩ့ဧၪနါ အဝ့ၫလၩ့ယၪ့ၥၭအၪမၬလီၫ ဆၧၫ့နၩ့အီၪထနီၪ ၦၡၩဘၪအၥၭအဝ့ၫနးဂၩအ့ၬဘိၭ လၧနၧၩ့ဘၪနီၪ ယၥ့ၪယၪလၥၨၩ ယဘၪဒၪအဝ့ၫယၥၭမုၬအ့ၬနီၪ ယလီၩစိၩမၬ ယဘၪယၥၭအဝ့ၫလီၫဘီၩႉ မၩ့ၥၩ့ကၠုၪလဂၩ လီၩဖ့ၪနဲၪထဲၩ့အ့ၪအမၫၥၭဘီၩ့ ဘဲၫယီၩၥိၭလီၫႉ

လၧခလီနိနီၪ ၦၡၩအလၩ့ဆၫ့လဖၪအီၪလါနၫ့ ၦၡၩအယိၩပယီၩ မွဲအီၪဆ့ဒံၭႉ