ခ့ၫဘၩ့ဖိၪခွၫအီၪဒဲၥၭဒူၩ (၄)

အိၩနၧၫ့အုၪမၬလဲၪႉ ဆၧမိဎွါဘၪဆၧဖ့ၬထ့ၬအီၪလၧခၬလးမံၫဖၫ့လၬနီၪ နၧၫ့အုၪလီၫႉ စဎွၩအဖိၪခွၫအၥၭထၪ့တၭ လ့ၩၡိၬအဖါစဎွၩလၧခ့ၫဘၩ့ဖိၪခွၫ မၩဆၧလတီၩဘၪအဂဲးလဖၪလီၫႉ ထီးစဎွၩကိၭအၪ့စၪ့တၭ ခ့ၫဘၩ့ဖိၪခွၫယီၩ အၥၭမုၬလၧၩ့အ့ၬႉ

ယၧၩယီၩ မွဲစဎွၩအဖိၪခွၫထံးထံးအ့ၬႉ မွဲဆၧဖိၪဆၧဎါအဖိၪလီၫႉ ယၥံၫနီၪ အဂ့ၩထုၬအၪနဲၪ့ ဘၪအီၪလၧနီးဖၧၩ့ လၧၦလၥ့ၪယၫဘၪ ဆၧအခိးအတၩ အ စူၪဖၧၩ့လီၫႉ

စံၭလၩ့အၥၭဘဲၫနီၪဂီၩ့ႇ ချဲၩ့ထၪ့ဆၧချဲၩ့ကမီၪ့ လၧအဝ့ၫဂဲၫထဲၩ့ၥ့ၪယၫဘၪ အၥိၭနီၪလီၫႉ ကထံၪဎး အဝ့ၫကဲၪထၪ့လိးဂၩ့ ကကုၭဘၪကကုၭ ထီၩ့စိၩလၧ အခိၬထံၭယူၭႉ စဎွၩကိၭၡါအလူၥီၫၥီၫႇ ဖိၪခွၫလီၩလၧၩ့လဂ့ၩ ဘၪယူၭနဲၪႉ ယၥ့ၪယၫ လီၩလၧၩ့လဂ့ၩႉ

ဖါစဎွၩဧ့ႇ ယမုနံၩမုၥၫ့ထုၬယူၭႉ အီၪထးန့ၫယခိၪဎွံၪလီၫႉ ယကလီၩအ့ၪ လခဲၫ့ထုၬဆၧချဲၩ့ လၧကဂဲၫထဲၩ့နါဂၧၫ့ဘၪလီၫႉ ဖုခွၫလီၩလၧၩ့လဂ့ၩ ယနီၪၫ့ ယါလၩ့ယၥၭယူၭႉ ယဘၪမၪယူၭႉ

ဝဲစီၩ ယမူၩဒၩလၧၫ့ဎွၩယူၭဘီၪႉ

ဆၧချဲၩ့လၧခဲၫ့ထုၬဂီၩ ့ကကၠၪ ခ့ၫဘၩ့ဖိၪခွၫထၧၫ့ဂၩယၫ ကဲၪဘဲၫလိးဂၩ့ နီၪလီၫႉ စဎွၩခွံၬလၩ့အလူႇ စၭထၪ့လၧကနံၩယီၩ အီၪက့ၪနဖုခွၫအလိးဂၩ့နီၪ လၧနီးကဖျိၪ့ဖၧၩ့ဂီၩ့ နၥံၪကဘၪအၪ့ယၫကိၭနံၩလီၫႉ အယီၩ ဆၧစ့ၩရၫ့ခွးလၧ နၥံၪအဂးလီၫႉ

ထၧၫ့မၫဝၩနံၫဂၩ ဘၪလ့ၩအၪ့ယၫ အဖုခွၫလိးဂၩ့ကိၭနံၩလီၫႉ ကနံၪ့ထၪ့ ဘၭနီၪ အဝ့ၫၥံၪန့ဘၪအဖိၪခွၫလဂၩယူၭႉ စဎွၩအဖိၪယီၩအဲၪဘၪအဖိၪခွၫ လူၬ ၥုၪ့လူၬၥၭလီၫႉ ဖိၪခွၫလဂၩ အမ့ၬအနၫလၩ့ဂၬ ဘဲၫခ့ၫဘၩ့ဖိၪခွၫနီၪလီၫႉ မုက နၩနီၪ ၦလဂၩလၧၥိၭကီၩ့ထၬ ဆဲၫ့ဘွၩဖၭထီၫလဂၩ ဒုၭဖျီၪထၪ့အၥၭလၧ ဆၧမံၫ မးဖၧၩ့တၭ စံၭဘၪစဎွၩအဖိၪခွၫႇ နအဲၪဒိၭမၩမၧၫ့ထၪ့ထဲၩ့နဖုခွၫဧၪႉ ဘဲၫယလီၩ နၧၩအၥိၭ နကဘၪမၩလီၫႉ မွဲယူၭ ကဆါဧ့ႇ ယကမၩဘဲၫနလီၩအၥိၭလီၫႉ ၦ လဂၩယီၩ အခိၪဘွၩဒဲ အခၪလၬဆီၪ့ အီၪဖၭထီၫလ့ၬႇ မွဲဒၪၦဆံၫ့ဎံၪ (ဝတ်ဖြူ စင်ကြယ်)လီၫႉ