ဆၨၩကဆၨၩ အၥၭၥွံၪဖျီၩ့

ဆၨၩကဆၨၩဘဲၫၥိၭ ကဆုးအီၪၥၭမၫ့ဂုးခၧၫ့ကန့အဂးနီၪ ဆၨၩကဆၨၩအၥၭၥွံၫ ဖျီၩ့မွဲဝ့ၫ ဆၧချဲၩ့ႇ လံၬလဲ ဆၧဆၧးဎံၫဆၧလၩလဖၪဒဲလုၫလါထူၫၡူၫလဖၪ ကပဘၪဖီၪ့ဂုးထၬလီၫပႉ ဆၧလဖၪၥံၪယီၩ အ့ၪကဖီၪ့ဂုးထၬန့နီၪ ဆၨၩယီၩမွဲလၩ့မၬကန့အ့ၬႉ ပလီၩဘၪဆၧလၧဖီၪ့ဂုးခၧၫ့ထၬနီၪ ပကချဲၩ့ထၪ့ ၦဆၨၩဆၬဆၧချဲၩ့ႇ ပကကျ့ၭစၨၭကွ့ၭထဲၩ့ၦဖျိၩ့လံၬလဲႇ ၦဆၧဆၧးဎံၫဆၧလၩလဖၪမွဲဝ့ၫဆၧဂၬထလ့ၬ ဆၧအူၪဆၧဒံၩ့လဖၪပလၥၭနၪ့ဘၪဒဲ ပၥိၭကီၩ့ထၪ့ထဲၩ့ၦဖျိၩ့ဆၧကီၩ့ဆၧၥိၭလၧဆၧအဲၪကွံၩယူၭယၪ့အဖၧၩ့ ဖီၪ့ဂုးခၧၫ့ထၬဝ့ၫနီၪလီၫႉ

ထီမုဆၫကနံၩယီၩနးဆ့ တခၩဒၪဆၨၩနးဆၨၩ ဘဲၫၥိၭဆၨၩဆၬလလၩ့မၬဘၪအဂး ဘၪဖီၪ့ဂုးထၪ့ထၬလံၬလဲဒဲဆၧချဲၩ့လီၫႉ ၦဖျိၩ့ဆၨၩဖိၪၥံၪလဖၪနးဆ့ ဘဲၫၥိၭၦဆၨၩယီၩ လလၩ့မၬဘၪအဂး ဖျိၩ့ဖိၪၥံၪလဖၪ ၦမူၩဒၩအီၪဝ့ၫကိၭဂၩဒ့ၭလီၫႉ အရ့ၩဒိၪထုၬနီၪ ၦဖျိၩ့မိဖါၥံၪလဖၪ ပကဘၪချဲၩ့ဒုၪ့ဂၧၩ့ဖိၪမုၪ ဖိၪခွၫဆံၭဖိၪၥံၪလဖၪလၧဖျိၩ့ခီၫ ခီၫလၧ အဖိၪၥၪဆံၭဆံၭဖိၪအထီနီၪလီၫႉ မိဖါလနၩ့နၩ့ ၥ့ၪယၫအီၪက့ၪဒိၪ ဆၨၩဆၬဆၧချဲၩ့လအ့ၬဂီၩ့တၭချဲၩ့ဂၧၩ့အဖိၪၥံၪလၧ ဖျိၩ့ဆၧချဲၩ့လဲအ့ၬနီၪ ပဒၪဘၪလၧ ဆၧၥုၪ့လမုၬ ၥၭလမုၬဘၪအဖၧၩ့လီၫႉ အနီၭဘိၭဖိၪၥၪဆံၭဖိၪၥံၪလဖၪ နးဆ့ မွဲဖျဲၩ့ဆၨၩဆၬအဆၧဖျဲၩ့ ( မိခင်ဘာသာစကား) လဘၪလၧၩ့ဘၪနီၪလီၫႉ

ပကိၪ့ၥ့ၪလဂၩလီၩ့ထၬဝ့ၫဒၪ ဘဲၫၥိၭလဆၨၩဆၬဆၧချဲၩ့လလၩ့မၬဘၪအဂးပကဘၪစၭထၪ့ချဲၩ့ဒုၪ့ဂၧၩ့ ဖိၪၥၪဆံၭလဖၪခီၫလၧချဲၩ့ၥ့ၪၥၫ့အထီလီၫႉ အနီၭဂီၩ့မၬ ပကဘၪၥီၪ့လိၪဖျဲၩ့ဂၧၩ့ထဲၩ့အ့ၪ ပၧၩၥိၩ့အၪဆၧချဲၩ့ ( အများသုံးဘာသာစကား) နီၪ ဂဲၫကဲၪထၪ့ဝ့ၫဆၨၩဆၬဆၧချဲၩ့ဘၪလၩ့မၬထၪ့ဝ့ၫဒၪ အရ့ၩဒိၪထုၬအဂဲးကမံၩ့အကၠီၩ့ လီၩ့ထၬဝ့ၫဒၪလီၫႉ

ဆၨၩကဆၨၩ ဆၧချဲၩ့လ လၩ့မၬနီၪ မီၪ့ဎီၩ့ ၡၩခမျၧးဆၨၩဆၬလၩ့မၬလီၫႉ ၦဂၪ့ခိၪချိၪ့ယီၩ ဆၧၩဆၬဆၧချဲၩ့စၭထၪ့လၩ့မၬလၧ ဖီၩ့ခွံၬ နံၪ့ (၅၀၀)  အိၩယူၭလီၫ စွါဘဲၫႉ အဆီဘဲၧယီၩ အၥၭမၧၫ့ဒံၭဝ့ၫဒၪ ဆၨၩဆၬဆၧချဲၩ့ အီၪဝ့ၫ (၆၈၀၉)  မံၩ့နီၪ အီၪဂုးခၧၫ့ၥၭမၧၫ့ထးဒၪ ဖိၭဘိၭ (၆၀၀) လီၫအကၠီၩ့ ပလီၩ့ဎွါအၪ့ဎၬဆၧလဖၪနဲၪဖျီၪ့ထၪ့ထၬဝ့ၫလၧ ၦဖျိၩ့ဆၨၩဖးဖီၩ့လံၭစီၩ့ဖၧၩ့နီၪလီၫႉ ဆၧလၧဆၨၩဆၬဆၧချဲၩ့နီၪ ၦချဲၩ့လအီၪလၧၩ့ဘၪနးဂၩစွါဘဲၫ ကလၩ့မၬခွံၬဝ့ၫလီၫႉ

ထၧၫ့ဖုဝဲမုၪခွၫၥံၪဧ့ႇ ပၧၩလနၩ့နၩ့ ဆၧအၪ့စၪ့ကအီၪ ပချဲၩ့ၦဖျိၩ့ဆၧချဲၩ့ဘၪနီၪ ပလ့ၩချဲၩ့ထံၫခးဂူၫဂၩ ၦၡၩနၪၥ့ၪဧၪႇ ပလ့ၩၥိၩ့ထၪ့န့လဲၪႇ လါနၫ့ဂ့ၩထၧၫ့ဖုဝဲမုၪခွၫၥံၪဧ့ႇ ပကဲၪဆၨၩဖိၪလဂၩ ဘဲၫပလံၬလဲဆၧချဲၩ့လလၩ့မၬဘၪအဂးနီၪ ပမူၩဒၩအီၪဝ့ၫကိၭဂၩဒ့ၭအကၠီၩ့မိဖါၥံၪဧ့ ပကကျ့ၭစၨၭချဲၩ့ဒုၪ့ဂၧၩ့ဂု ဖိၪၥၪဆံၭလဖၪ လၧဖျိၩ့ခီၫကိၭဂၩဒ့ၭလါဆံၭနဲၪႉ