Mother ထရ့ၫဇၩ အဆၧမၩဖၧၩ့ ဒၪထၪ့ဘၪ ကဆါယွၩ အဆၧယိထွ့ၫမၩဆၧၩ့အဂဲး

လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မံၩ့ဎိၩၥၪဖျီၪ မုခွၫလၧအအီၪအနိၪ့ အဆၧရၩလၩ့ဖၧၩ့ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪနီၪ မွဲဝ့ၫဒၪ မၫၥၧၫ့ ထရ့ၫဇၩ အဆၧမၩဖၧၩ့ ဒၪထၪ့ဘၪ ကဆါယွၩ အဆၧယိထွ့ၫမၩဆၧၩ့အဂဲးအကၠီၩ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ (မာသာရ် ထရေဇား) လဂၩ ၦအဂဲးအဘၭဆံၭၥံၪအဂး ဒၪဆၧၫ့ယၫဘၪဝ့ၫ ကဆါယွၩအၥုၪ့ဆၧၩ့ၥၭဆၧၩ့ႇ အဆၧယိထွ့ၫမၩဆၧၩ့ လၧအဆၧမၩဖၧၩ့နီၪလီၫႉ ဆၧမၩအနီၪ မနီၪလဲၪစွါဘဲၫ လၧမုကနံၩ ၦၡၩလဂၩ ဂဲၫဆိၬန့ ၥံၪ့ဎွံၪဆရၫ အၥံၪ့ဎွံၪချီးဂီၩ့ ဂဲၫထီၩ့လၧ အဝ့ၫၥံၪ အဆၧယိထွ့ၫမၩဆၧၩ့ဆၧအလးနီၪလီၫႉ ၦၡၩအနီၪ လီၩဝ့ၫဒၪနီၪ အဝ့ၫၥံၪ အီၪလၧ (ကာလာကတ္တား) ဘၩဒၪဖိၪအီၪအလးအကၠီၩ့ႇ အဖိၪခွၫအီၪဝ့ၫလဂၩဎးဂီၩ့ အဖိၪခွၫနီၪ ဘၪထိးဆၧဆၫ ထၨၪကၥံၪထီအကၠီၩ့နီၪလီၫႉ ကဘျၩ့ဖိၪၥၪအဂး လၧၥံၪ့ဎွံၪအလိၪလဖၪနီၪ လီၩ့ဎွါဝ့ၫလၧခး (အိန္ဒိယ) ဖၧၩ့ လန့ဘၪနးစီၪ့နီၪလီၫႉ ၥံၪ့ဎွံၪနီၪ လၧခး (အင်္ဂလန်) အိၩ ၥိၫ့ဝ့ၫမၬ ကန့ဝ့ၫဒၪအကၠီၩ့ လီၩဝ့ၫဒၪနီၪလီၫႉ (မာသာရ် ထရေဇား) အဆၧချဲၩ့လၩ့ဎိၭလၧ ၦၡၩအနီၪအခံၫ့ ရီလၧအဎွ့ၩဝ့ၫလၧ ၥံၪ့ဎွံၪလဖျိၪ့ ဂဲၫထီၩ့ဝ့ၫလၧ အဝ့ၫၥံၪ အဆၧချဲၩ့လၩ့ဎိၭ အလးနီၪလီၫႉ ၥံၪ့ဎွံၪလဖၪယီၩ လၧအလးကိၭစီၪ့ ဂံၪ့ဒီၪ့ဖိၪၥံၪအီၪ လ့ၩဝ့ၫဒၪဂီၩ့ လၧဂံၪ့ဒီၪ့ဖိၪၥံၪ ၥိၩ့လလူၬဘၪ ပအီၩန့ဒံၭ ၥံၪ့ဎွံၪလဖၪ ထိးဆၧမၩဘိၪ့ဂီၩ့ ၦအလိၪလဖၪၥံၪအဂး ၥိၩ့ဝ့ၫဒၪနီၪလီၫႉ (မာသာရ် ထရေဇား) လီၩဝ့ၫဒၪနီၪ လၧ (ကာလာကတ္တား) ဝံးဖၧၩ့ ဝဲထၪ့ထၬ ဘျၩ့ဆၧဆၫအလး ကိၭစီၪ့ဒ့ၭဂီၩ့ လၧအလိၪလဖၪၥံၪ့ဎွံၪၥံၪနီၪ အၪ့က့ၩၥံၪ့ဎွံၪဆၧမၩဘိၪ့ဂီၩ့ ဘျၩ့အ့ၪဆၧဆၫဆါၥံၪနီၪလီၫႉ (မာသာရ် ထရေဇား) လဂၩ ဆၧချဲၩ့လၩ့ဎိၭအခံၫ့ ဆၧဆၫဆါဖိၪၥၪ အဖါဖါ အၥိၩ့လိၪဝ့ၫဒၪ ၥံၪ့ဎွံၪနီၪ ဒၪထၪ့ဝ့ၫလၧ ရီဖၧၩ့နီၪလီၫႉ ထီးနီၪကကၠၪ (မာသာရ် ထရေဇား) လဂၩ အၪ့အူၭထၪ့ကဆါယွၩ အဆၧဒၪဖျီၫ့ၥ့ၪ လၧအဝ့ၫအၥၭခံဖၧၩ့နီၪလီၫႉ ဘၪမနီၪလဲၪစွါဘဲၫ ထံၫခးထၧၫ့ဘံၪ့ယၫ ဘဲၫၥိၭဖိၪၥၪအနီၪၥိၭ ၦအဘၪထိး ဆၧဆၫကိၭမံၩ့ဖိၪၥၪလဖၪ ဂဲၫထီၩ့ဝ့ၫလၧ အဝ့ၫဒၪအအီၪနီၪလီၫႉ ကဆါယွၩနီၪ ဆၧတဲၩ့လၩ့ ထီးအလူၬ အဖၫ့ခိၪ ၦလၧအပၧၩ့ဆၧႇ ဒၪထၪ့ၥ့ၪယၫဆၧႇ မၩကဲၪန့ဝ့ၫဒၪဆၧ ၦလဂၩ လမွဲဘၪစွါဘဲၫ လၧအဝ့ၫၥံၪ အလိၪအခံၫ့ အၥိၩ့လိၪၥံၪ့ဎွံၪလဖၪ ကဂဲၫထီၩ့လၧ အဝ့ၫၥံၪအအီၪအဂး ကဲၪထၪ့ဝ့ၫ လၥ့ၪဘၪနီၪလီၫႉ လါနၫ့ဂ့ၩ ဘိၩ့ယီၩ ၦလၧအလိၪလဖၪၥံၪအဂး လၧအလိၪလဖၪ ကန့ဝ့ၫဒၪအဂး အခံၫ့ဘၪအထီ ၦယၫ့ၥၭမၩဆၧၩ့ဆၧဖိၪ ဂဲၫထီၩ့ဝ့ၫဒၪနီၪ မွဲဝ့ၫဒၪ ကဆါယွၩ အဆၧဖီၪ့ထၪ့ဖံၭထၪ့အကၠီၩ့ (မာသာရ် ထရေဇား) လီၩထၬဝ့ၫဒၪ ဘဲၫယီၩၥိၭနီၪလီၫႉ

အဲၪကွံၩဘၪထၧၫ့ဖုဝဲထံၭၥိၭထီးအလူၬၥံၪဧ့ႇ ၦလၧအဂဲးဆါဘၭဆါႇ ၦအဆံၬထုၬလဖၪ လၧကဆါယွၩအမ့ၬယၫ အရ့ၩဒိၪ ဘဲၫၥ့ၪလဲၪ ပဒၪထၪ့ဘၪနီၪလီၫႉ ကဆါယွၩ ယိထဲၩ့ခွါထဲၩ့ ၦအဂဲးဆါဘၭဆါၥံၪ ဘဲၫၥ့ၪလဲၪ ပၥ့ၪယၫဘၪနီၪလီၫႉ ကဆါယွၩနီၪ ယွၩလၧ ၦအလိၪဆၧယၫ့ၥၭမၩဆၧၩ့အၡါမၬၥံၪအဂး မွဲဝ့ၫဒၪအကၠီၩ့ (မာသာရ် ထရေဇား) အဆၧလီၩဖျီၪထၪ့ အီၪဝ့ၫဒၪ ဘဲၫယီၩၥိၭအဂဲး ယရၩလၩ့န့အ့ၪဘၪနၥံၪလၧ ဆၧအဲၪဆၧကွံၩဎိၩဒိၪဖၧၩ့နီၪလီၫႉ အဲၪကွံၩဘၪထၧၫ့ဖုဝဲထံၭၥိၭထီးအလူၬ မွဲနၥံၪလၧၫ့ဎွ့ၩဝ့ၫဒၪလၧ ကဆါယွၩအဆၧအဲၪဆၧကွံၩလါဆံၭႉ