ၦအမၩဆၧၩ့ ဂူၫဂၩ ၡၩခံးဂးအဆၧမၩ ၦဆံၫ့ဎံၪ ကဲၭၥၭရံၩ့ဒရ့ၫဇဲၫ

လၧဎြံၬဆၧအဲၪဆၧကွံၩဖၧၩ့  ထၧၫ့ဖုဝဲထံၭၥိၭထီးအလူၬၥံၪဧ့ႇ  မံၩ့ဎိၩၥၪဖျီၪ မုၪခွၫလၧအအီၪအနိၪ့  အဆၧရၩလၩ့ဖၧၩ့ မုကနံၩယီၩယအဲၪဒိၭ  ရၩလၩ့န့အ့ၪနၥံၪနီၪ မွဲဝ့ၫဒၪ ၦဆံၫ့ဎံၪ ကဲၭၥရံၩ့ အဂဲးအကၠီၩ့နီၪလီၫႉ အဲၪကွံၩဘၪထၧၫ့ဖုဝဲထံၭၥိၭထီးအလူၬၥံၪဧ့ႇ ပကမၩကၠဲၬအဆၧမၩအဂး  ကဆါဎြံၬနီၪကိၭထၪ့ ၦၡၩအမံၩ့မံၩ့ လၧဎံၩ့လးကိၭစီၪ့ လၧဆၧလၩ့ဆၫ့အကၠီၪ့အဖျီၩ့နီၪလီၫႉ ၦဆံၫ့ဎံၪ ကဲၭၥရံၩ့ယီၩ အီၪဖျဲၪ့လၧ(  Filadarefia )ဝံး နံၪ့ (၁၈၅၈)နံၪ့ နီၪလီၫႉ အဝ့ၫနီၪ မွဲဝ့ၫ ဆၧကဲၪဒိၪအဖိၪမုၪ လဂၩနီၪလီၫႉ အဝ့ၫယီၩ မွဲဝ့ၫဒၪ ၦအမၩဆၧၩ့ ဂူၫဂၩအဂး မံၭထၭမုၪလဂၩနီၪလီၫႉ

လယံၭလမီးဘၪ အဝ့ၫအမိမိၥံၪဖီၩ့ခွံၬအဝ့ၫဂီၩ့ အဖါဖါနီၪ အၪ့န့အမၫ လခဲၫ့ကဂၩနီၪလီၪႉ အဝ့ၫယီၩ ဘၪအီၪလၧ အမိယါကၠၧၫ့ကၠၧၫ့နီၪလီၫႉ လါနၫဂ့ၩ အမိမိနီၪ အၥၭဂ့ၩၥၭဘွၩအီၪလၧ အဝ့ၫအဖၫ့ခိၪ အၪမါလ့ၬနီၪလီၫႉ လကၭဒံၭဘၪ အမိမိနီၪ အၥၭဂ့ၩၥၭဘွၩ အီၪလၧ ၦအၡၪ့ဖိၪၥံၪ အဖၫ့ခိၪဆ့နီၪလီၫႉ အဝ့ၫဒၪ အဖါဖါနီၪ အီၪလၧ ကၠဲၬလူကၠဲၬဂဲးနီၪလီၫႉ အဝ့ၫယီၩ အမိမိ မၩဘိၪ့ ၦအၡၪ့ဖိၪၥံၪ ဆၧအၪ့ဆၧအီၩႇ ဆၧကီၩ့ဆၧၥိၭနီၪ ဒၪဘၪဝ့ၫတၭ အဝ့ၫအၥၭလုၬအီၪ ကမိမၩဝ့ၫဘဲၫၥိၭ အမိမိအဆၧမၩနီၪလီၫႉ မွဲဆၧနီၪအကၠီၩ့ နံၪ့ (၁၈၇၉)နံၪ့နီၪ အဝ့ၫလ့ၩနုၬလၩ့လၧ ၦအမၩဆၧၩ့ ဂူၫဂၩ ၡၩခံးဂးဆၧမၩဖၧၩ့နီၪလီၫႉ အဝ့ၫအမိမိနီၪ ဘၪထိး  (ဆၧဆၫဝံစဲၩ) (ကင်ဆာ) (၃)နံၪ့ဂီၩ့တၭ ၥံၪဖီၩ့ခွံၬအဝ့ၫနီၪလီၫႉ

အဝ့ၫဒၪဘၪ အမိမိ ဘၪထိးဆၧဆၫ ထၨၪကၥံၪကကၠၪတၭ အၥၭခံဖၧၩ့ ဆီၫ့မီၪ့ဝ့ၫ ဆၧလၧဆၧကဲၪဒိၪကဲၪမု ကျိၪၥံၪ စ့ၩၥံၪနီၪ မၩမၧၫ့ၦၡၩအၥၭ လန့ဘၪနီၪလီၫႉ လယံၭလမီးဘၪ အဖါဖါၥံၪဖီၩ့ခွံၬ အဝ့ၫဒၪဆ့နီၪလီၫႉ စႇထၪ့လၧ မုကနံၩနီၪ ၦဆံၫ့ဎံၪ့ ကဲၭၥရံၩ့လဂၩ လ့ၩနုၬလၩ့လၧ (sister of Mercy) အခရၧၫ့ဖၧၩ့ဂီၩ့ ကဲၪထၪ့မံၭထၭမုၪလဂၩဂီၩ့ မၩထၪ့ထဲၩ့ ကဆါဎြံၬအဆၧမၩ မွဲဝ့ၫ ၦအမၩဆၧၩ့ ဂူၫဂၩ ၡၩခံးဂးအဆၧမၩနီၪလီၫႉ ၦဆံၫ့ဎံၪ ကဲၭၥရံၩ့ယီၩ နံၪ့(၁၈၉၁)နီၪ လၧ(United State) New Orleans အလးနီၪ မၩကၧၩ့ထၪ့ ကၭၥလ့ၭ ဘျၪ့ကိၪဒိၪ အမံၩ့မွဲဝ့ၫလၧ Xavier နီၪလီၫႉ အဝ့ၫအၥၭအီၪ (၇၇)နံၪ့နီၪ ဘၪထိး (ခၬၥၭဆၧဆၫ)ဂီၩ့တၭ ၥံၪဖီၩခွံၬဝ့ၫဒၪနီၪလီၫႉ ဘဲၫၥိၭနၥံၪကအၪ့န့ထီးထၬ ၦဆံၫ့ဎံၪ ကဲၭၥၭရံၩ့အဂဲးအဖးကန့အဂး ယအဲၪဒိၭ ရၩလၩ့န့အ့ၪဘၪနၥံၪလၧ ဆၧအဲၪဆၧကွံၩ ဎိၩဒိၪဖၧၩ့နီၪလီၫႉ အဲၪကွံၩဘၩထၧၫ့ဖုဝဲထံၩၥိၭထီးအလူၬ မွဲနၥံၪလၧၫ့ဎွ့ၩဝ့ၫဒၪလၧ ကဆါဎြံၬ အဆၧအဲၪဆၧကွံၩလါဆံၭႉ