ၦလၧအၥုၪ့ထၪ့ EWTN လူၥီၫဂၩ့ဖျီၪ Mother Angelica အဂဲး (၂)

လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မံၩ့ဎိၩၥၪဖျီၪ မုခွၫလၧအအီၪအနိၪ့ အဆၧရၩလၩ့ဖၧၩ့ မုကနံၩယီၩ ယအဲၪဒိၭ ရၩလၩ့န့အ့ၪဘၪနၥံၪနီၪ မွဲဝ့ၫဒၪ ၦလၧအၥုၪ့ထၪ့ EWTN လူၥီၫဂၩ့ဖျီၪ Mother Angelica အဂဲး လခဲၫ့ထုၬကဆၧၫ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ဖီၩ့ခွံၬလၧ မုကနွ့ၫဒၪအိၪ ယရၩလၩ့န့အ့ၪဘၪနၥံၪနီၪ ဘၪထွ့ၫလၧ Mother Angelica အဂဲး ဂီၩ့ဝ့ၫဒၪ ယဲထံၪယူၭနီၪလီၫႉ ပကစႇထဲၩ့ဘၪလၧ

ဎူၫထံၪကထံၪနီၪ Mother Angelica ယီၩ ၥုၪ့ထးထၬ မံၭထၭမုၪၥံၪအီၪအလးကၠီၩ့လၧ ခး (အမေရိက) Alabama အလးနီၪလီၫႉ ကၠီၩ့အယီၩ ၥုၪ့ဝ့ၫဒၪကန့အဂး အလိၪဝ့ၫဒၪစ့ၩလဖၪနီၪ မၩအၪ့ဆၫခွ့ၫနါဂီၩ့ လီၩ့ဎွါဝ့ၫဒၪနီၪလီၫႉ

နွ့ၫထံၪကထံၪနီၪ လၧစၥုၪ့ထၪ့ EWTN လူၥီၫဂၩ့ဖျီၪအခံၫ့နီၪ Mother Angelica ယီၩ အၥၭအီၪဝ့ၫဒၪ ၅၈နံၪ့ယူၭနီၪလီၫႉ စထၪ့လၧ နံၪ့ ၁၉၇၀နံၪ့နီၪ မိဆၧအီၪကီၪ့ အဆၧၥီၪ့ဆၧၥၫ့လဖၪနီၪ အီၪဆုးဘုၭဝ့ၫလၧ CBS တရၩလၩ့လူအလးဂီၩ့ ရၩလၩ့ဝ့ၫ လဆၧၫ့ဘၪလဆၧၫ့နီၪလီၫႉ လါနၫ့ဂ့ၩ လူၥီၫဂၩ့ဖျီၪ ဆၧထံၫလၩ့ဒီၪလၩ့ယီၩ ဘၪဘုၭထၬၥၭလၧ လူၥီၫဂၩ့ဖျီၪ အၥၭနိၫ့အကၠီၩ့ ဘၪထုၬဖိၬဘံၭၥၭနီၪလီၫႉ လါနၫ့ဂ့ၩ Mother ယီၩ လထုၭဖျ့ၭခွံၬဘၪအစူၪနီၪလီၫႉ လၧမံၭထၭမုၪၥံၪအကၠီၩ့ အီၪက့ၪထၬ လဲၪ့ၥိၪအလးနီၪ ၥိၩ့ဝ့ၫဒၪလၧ လူၥီၫဂၩ့ဖျီၪ တရၩလၩ့ဆၧအလးနီၪလီၫႉ အလးယီၩ လၧခဲၫ့လၧယၫခီၫ ကဲၪထၪ့ဝ့ၫဒၪလၧ EWTN ကၭၥလ့ၬ လူၥီၫဂၩ့ဖျီၪ မံၩ့ဎိၩၥၪဖျီၪအလးနီၪလီၫႉ ဆၧအလးယီၩ ဘိၭဘၪၥ့ၪယၫထၪ့ဝ့ၫဒၪလၧ နံၪ့ ၁၉၈၁နံၪ့ႇ လၩ August ၁၅ၥၫ့နီၪလီၫႉ

ဎိၬထံၪကထံၪနီၪ Mother ယီၩ အဆၧဆီၫ့မီၪ့ဆၧမၬဆၧလဖၪနီၪ ဒိၪလါကဲၪကၩဝ့ၫဒၪနီၪလီၫႉ အဝ့ၫဒၪယီၩ နံၪ့ ၁၉၉၅နံၪ့ လၧ Colombia အိၩ လ့ၩဆၧလ့ၩအခံၫ့ ဒၪခီၩ့ဘၪလ့ၬ ဎြံၬဖိၪၥၪကၠဲၬဂၩ့နီၪလီၫႉ ၦၡၩလဂၩအဂၩ့အထီၫ အီၪဝ့ၫဒၪ ဎြံၬဖိၪကၠဲၬဂၩ့ယီၩ အၥၭမၧၫ့ဝ့ၫဒၪဂီၩ့ နံမွံၫဘၪအဝ့ၫႇ ချဲၩ့ဒီၪဘၪအဝ့ၫနီၪလီၫႉ ၥရိၬကဖျိၪ့ ကၥုၪ့ထၪ့ဝ့ၫအဂး အၪ့က့ၩအၪ့ယၫအဝ့ၫနီၪလီၫႉ ဆၧအၪ့က့ၩအၪ့ယၫအီၪဝ့ၫဒၪ ဘဲၫနီၪၥိၭအကၠီၩ့ လၧ Hanceville, Alabama အိၩ ၥုၪ့ထၪ့ ကိၪ့ဘိၪ့ဆံၫ့ဎံၪၥရိၬကဖျိၪ့နီၪလီၫႉ ဎြံၬဖိၪၥၪယီၩ ဂဲၫထုၬဖျီၪ့ထၪ့ၥၭလၧ Mother အီၪခိၬမၬခိၬမၬဒ့ၭနီၪလီၫႉ

ခွံၫထံၪကထံၪနီၪ အဝ့ၫယီၩ လၧနံၪ့ ၂၀၀၉နံၪ့ လၩ October ၄ၥၫ့နီၪ ဒိၭန့ဘၪ ခိၪဖၭအထီၫထုၬလၧ ၥၫ့ဎွၩ Benedit ၁၆ အစူၪဖၧၩ့နီၪလီၫႉ ခိၪဖၭအယီၩ ပကိၭဝ့ၫဒၪလၧ ‘Pro Ecclesia et Pontifice’ နီၪလီၫႉ ခိၪဖၭအယီၩ ၦလၧအစထၪ့ ဖ့ၪအ့ၪဝ့ၫဒၪနီၪ မွဲဝ့ၫဒၪ ၥၫ့ဎွၩ Leo XIIIဂီၩ့ အီၪစထၪ့ဖ့ၪအ့ၪဝ့ၫဒၪလၧ နံၪ့ ၁၈၈၈နံၪ့အိၩနီၪလီၫႉ

ဆံၫထံၪကထံၪနီၪ Mother ယီၩ ထၨၪအၥၭဖီၩ့ခွံၬဝ့ၫဒၪ အခံၫ့ကကၠၪ မုကိၭနံၩဒ့ၭ လ့ၩဂၭကွ့ၩႇ လ့ၩအၪ့က့ၩဘၪဆိၪဖၪဆၧလၧ ကိၪ့ဘိၪ့ဆံၫ့ဎံၪအီၪ ကိၭကၠၪဒ့ၭနီၪလီၫႉ Mother ယီၩ မံၩ့ဎိၩၥၪဖျီၪဝ့ၫဒၪ ခးၥဲၫထၧၫ့ဘံၪ့ယၫ လါနၫ့ဂ့ၩ အဝ့ၫယီၩ ဒိၭန့ထၬ မံၭထၭမုၪအဆၧကဲၪဒဲ မံၭထၭမုၪ ဆၧအုၩ့လၩ့လဖၪနီၪ အီၪက့ၪထၬဝ့ၫဒၪ အရ့ၩဒိၪထုၬႇ အီၪထုၪ့ၥုၪ့ထုၪ့ၥၭဝ့ၫဂီၩ့ လၧကဆါဎြံၬအဖၫ့ခိၪ အီၪက့ၪဂုးခၧၫ့ထၬ ၥီၪကၠဲၪနီၪလီၫႉ အၥၭဎိၩလၫ့နီၪအကၠီၩ့ ထီၩ့အၥၭ ၇၈နံၪ့အခံၫ့ နံၪ့ ၂၀၀၁နံၪ့နီၪ အီၪထုၭခွံၬဝ့ၫဒၪ ရၩလၩ့ဆၧဘိၪ့ဆၧဘၩအဂဲး ဆၧထံၫလၩ့ဒီၪလၩ့ လဖၪနီၪလီၫႉ အီၪထုၭခွံၬ ရၩလၩ့ဆၧအဆၧမၩ လါနၫ့ဂ့ၩ Mother ယီၩ နးၥၭအဂဲးအဘၭ ကန့ဝ့ၫဒၪအဂး ခိးဂဲးခိးဘၭဝ့ၫထၨၪ အမိၡါဂဲၩဝၭလနၧၩ့လၧၫ့ဘၪအခံၫ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ဘၪထွ့ၫလၧ Mother Angelica အဂဲး ယရၩလၩ့န့အ့ၪဘၪနၥံၪနီၪ ထၨၪယီၩနီၪလီၫႉ ထၧၫ့ဖုဝဲထံၭၥိၭထီးအလူၬႇ မွဲနၥံၪအၪ့န့ထၪ့ ဆၧဒီၩ့ဆၧထ့ၭလၧ Mother Angelicaအီၪဂီၩ့ မွဲနၥံၪ ဒိၭနဲၩ့ၥၭလၧ ကဆါယွၩအီၪန့ဝ့ၫဒၪ ကိၭဒ့ၭကိၭဂၩလါဆံၭႉ