ၦလၧအၥုၪ့ထၪ့ EWTN လူၥီၫဂၩ့ဖျီၪ Mother Angelica အဂဲး (၁)

လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မံၩ့ဎိၩၥၪဖျီၪ မုခွၫလၧအအီၪအနိၪ့ အဆၧရၩလၩ့ဖၧၩ့ မုကနံၩယီၩ ယအဲၪဒိၭ ရၩလၩ့န့အ့ၪဘၪနၥံၪနီၪ မွဲဝ့ၫဒၪ ၦလၧအၥုၪ့ထၪ့ EWTN လူၥီၫဂၩ့ဖျီၪ Mother Angelica အဂဲး အဆိၫ့ထုၬလဆၧၫ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ Mother Angelica နီၪ မွဲဝ့ၫဒၪ ၦလၧအၥုၪ့ထၪ့ထးထၬ အခၪ့ထံၭခၪ့ဎၧၩ့ အီၪဝ့ၫဒၪလၧ ခး Amarica ဖၧၩ့ EWTN (The Eternal Word Television Network) ကၭၥလ့ၬ လူၥီၫဂၩ့ဖျီၪ မွဲဝ့ၫဒၪ မံၭထၭမုၪလဂၩနီၪလီၫႉ လၧဆၧလူၥီၫဂၩ့ဖျီၪအဖၧၩ့ယီၩ ရၩလၩ့အ့ၪၦၡၩၥံၪ ဆၧၥၭထိၬအပရၧၫ့နီၪလီၫႉ ထီၩ့လၧခံၫ့ခၫဘဲၫယီၩ ဆၧမၩအယီၩ လ့ၩဆၧလၧယၫနီၪလီၫႉ ၦလၧအၥုၪ့ထးထၬ ဆၧလူၥီၫဂၩ့ဖျီၪ Mother ယီၩ ၥံၪဖီၩ့ခွံၬဝ့ၫဒၪလၧ နံၪ့ ၂၀၁၆နံၪ့ လၩ March ၂၇ၥၫ့ လၧဘိၪ့လ့ၩဖၭ မုဎိၩနံၩ မုဂၩလၩ့ ၅နၫရံၫအခံၫ့နီၪလီၫႉ အဝ့ၫဒၪယီၩ ထီၩ့လၧအၥၭ ၉၂နံၪ့နီၪ ၥံၪဖီၩ့ခွံၬဝ့ၫနီၪလီၫႉ

အဝ့ၫဒၪယီၩ မွဲဝ့ၫဒၪ မံၩ့ဎိၩၥၪဖျီၪ မံၭထၭမုၪလဂၩ လါနၫ့ဂ့ၩ လၧၦၡၩၥံၪလၥ့ၪယၫဒံၭဘၪ အဂဲးအဖး အီၪဝ့ၫဒၪဒံၭနီၪလီၫႉ ဘဲၫယီၩ အရ့ၩဒိၪထုၬ ဘၪထွ့ၫလၧ အဝ့ၫဒၪအဂဲး အဆိၫ့ထုၬ အထံၪ (၅) ထံၪနီၪ ယရၩလၩ့န့အ့ၪဘၪနၥံၪနီၪလီၫႉ အဝ့ၫယီၩ အဲၪဝ့ၫဒၪ ဆၧၥၭထိၬအပရၧၫ့ႇ မိဆၧအီၪကီၪ့ဒဲ ၦခမျၧးၥံၪ ဘဲၫၥ့ၪလဲၪအဂဲး နၥံၪကၥ့ၪယၫဘၪနီၪလီၫႉ အဆိၫ့ထုၬကထံၪနီၪ Mother ယီၩ လၧအဝ့ၫဒၪ လအၪ့န့ဒံၭဘၪ မံၭထၭမုၪ အဆၧကဲၪဒံၭၥၪအိၩ အမံၩ့နီၪ မွဲဝ့ၫဒၪ Rita Antoinette Rizzo (အန်းထိုနက်ထ် ရစ်ဇ်ဇို) နီၪလီၫႉ Mother ယီၩ အီၪဖျဲၪဝ့ၫဒၪလၧ ခး Amarica (အိုဟိုင်းအိုး) ခးဆၨၩဒီၪ့ လၧCanton နီၪ လၧနံၪ့ ၁၉၂၃နံၪ့ လၩ April 20နီၪလီၫႉ အဝ့ၫယီၩ မွဲဝ့ၫဒၪ ဖိၪလဂၩဎးနီၪလီၫႉ

နံၫထံၪလထံၪနီၪ Mother ယီၩ အမံၩ့အၡါမၬနီၪ မွဲဝ့ၫဒၪ Maria Angelica of the Annunciation နီၪလီၫႉ Mother Angelica အမံၩ့အယီၩ ၦၡၩကိၭ လခဲၫ့ကမံၩ့နီၪလီၫႉ

ၥၧၫ့ထံၪကထံၪနီၪ Mother Angelica ယီၩ ခီၫလၧအဆံၭဆံၭ (၁၆) နံၪ့ အခံၫ့အနီၪ ဘၪထိး ဂူၭဖိၫ့ဆၫဆၧဆၫနီၪလီၫႉ အၥၭအီၪဝ့ၫဒၪ (၁၈) နံၪ့ ထၪ့ဘၭကကၠၪ အဆၧဆၫယီၩ လဘျၪဘၪတၭ အၧၩ့လၫ့အၪမၬဒံၭနီၪလီၫႉ မွဲဆၧနီၪအကၠီၩ့ လၧနဲၪၥၭလၧ ၥံၪ့ဎွံၪဆရၫဂီၩ့ ထိးဘၠၩ့အၥၭနီၪလီၫႉ အဆၧဆၫယီၩ အီၪဝ့ၫဒၪလၧ အဂူၭဖိၫ့ဖၧၩ့ လကၭဒံၭဘၪ အီၪဝ့ၫဒၪလၧ အဎွံၬဖၧၩ့ဒံၭနီၪလီၫႉ ၥံၪ့ဎွံၪဆရၫ ဘၠၩ့ဝ့ၫဒၪ ၥံၪ့ဎွံၪအကၠီၪ့အဖျီၩ့ ကိၭမံၩ့ဒ့ၭ လါနၫ့ဂ့ၩ ဆၧအဂ့ၩ ကဲၪလၫ့နးမံၩ့အ့ၬနီၪလီၫႉ မွဲဆၧနီၪ နံၪ့ ၁၉၄၃နံၪ့နီၪ အဆၧဆၫ ကဘျၪထဲၩ့အဂး မၩဝ့ၫဒၪ Novena နီၪလီၫႉ ထီၩ့လၧ ၁၇ၥၫ့ မုနံၩနီၪ အဝ့ၫဒၪ မံၫမၪဂီၩ့ နၪ့လၫ့ၥၭအခံၫ့ လၧအဘၪထိး ဆၧဆၫလဖၪနီၪ လၩ့မၬခွံၬဝ့ၫဒၪနီၪလီၫႉ ဘဲၫဆၧဘျၪထဲၩ့အဆၧမၩယီၩ မွဲဝ့ၫဒၪ ဆၧဘၩဆိၪဖၪဆၧ အစီၩ့အမၩ့အကၠီၩ့ ဆူနဲၩဝ့ၫဂီၩ့ ဒိၭနဲၩ့ၥၭလၧကၠဲၬ အၪအၪဒ့ၭနီၪလီၫႉ ဆၧဆၫအယီၩ ဘျၪထဲၩ့အခံၫ့နီၪ Mother ယီၩ အၥၭထၪ့ဘၭ ၂၀ယူၭနီၪလီၫႉ

လံထံၪကထံၪနီၪ Mother Angelica ယီၩ ထၨၪအမိမိအဖဖ လၥ့ၪယၫဘၪ လ့ၩနုၬလၩ့လၧ မံၭထၭမုၪခရၧၫ့ဖၧၩ့ ကစုၩယၫနီၪလီၫႉ လၧဂီၪ့ဒီၪ့ဖၧၩ့ အဝ့ၫယီၩ မွဲဝ့ၫဒၪ ဖိၪလဂၩဎးလီၫအကၠီၩ့ အမိမိနီၪ အဖိၪမုၪ ကကဲၪထၪ့ မံၭထၭမုၪအဆၧကဲၪအဂဲး အၥၭလဘၪဘၪနီၪလီၫႉ အဝ့ၫယီၩ အမိမိအဖဖၥံၪ လဘၪဘၪၥၭနီၪအကၠီၩ့ ကၥၭနၪ့ခွံၬ မံၭထၭမုၪ အဆၧကဲၪအဂဲး ကျ့ၭစၨၭဝ့ၫ ကိၭအမံၩ့ဒ့ၭလါနၫ့ဂ့ၩ ကဆါယွၩ အဆၧကိၭ အီၪဝ့ၫဒၪလၧ အဝ့ၫဒၪအီၪနီၪ ထိးဘၪဝ့ၫ ဆီၪ့ဆီၪ့လ့ၬနီၪလီၫႉ တခၩဒၪကကဲၪနးမံၩ့ လခဲၫ့ထုၬနီၪ ကဒိၭန့ဘၪ မံၭထၭမုၪ အဆၧကဲၪအဂး အီၪက့ၪပဲၩထၬအၥၭနီၪလီၫႉ ထီၩ့လၧမုကနံၩ ၦလၧကကဲၪထၪ့ Mother လဂၩယီၩ ထၨၪအမိမိ လၥ့ၪယၫဘၪအဂး စဲၪ့ထၪ့ခွံၬလၧဂံၪ့ဂီၩ့ လ့ၩနုၬလၩ့ဝ့ၫဒၪလၧ ၦလၧအလ့ၩအထဲၩ့လအီၪဘၪ မံၭထၭမုၪခရၧၫ့ကၠီၩ့ဖၧၩ့နီၪလီၫႉ ကိၭလစဲၪ့လၫ့ဒံၭဘၪလၧဂံၪ့အခံၫ့ အမိမိအဂး ကွ့ၭထးထၬလံၬနီၪ မွဲဝ့ၫဒၪ “မိဧ့ႇ လၧနဒၪဘၪ လံၬယီၩအခံၫ့ ယၧၩယီၩ ယအီၪဝ့ၫဒၪလၧ Cleveland (ကလီးဗန်း) မံၭထၭမုၪကၠီၩ့ယီၩယူၭနီၪလီၫႉ ပကဒိၭန့ထၪ့ Adoration မံၭထၭမုၪ အဆၧကဲၪနီၪလီၫႉ ဆၧဆီၪ့ဆၧချဲၫ့အီၪဝ့ၫဒၪ လခဲၫ့အခံၫ့ ယဝ့ၫဒၪယီၩ ယဒိၭန့ဘၪ ဆၧကမံၩ့နီၪ ထၨၪယလီၩလဘၪဘၪနီၪလီၫႉ လါနၫ့ဂ့ၩ ကဆါယွၩအဂး ယမိဖ့ၪဆၧၫ့လၩ့ယၥၭနီၪ ကဲၪထၪ့ဆီၪ့ဆီၪ့လ့ၬနီၪလီၫႉ ဖီၩ့ခွံၬ လၩ ၁၉ ဘံၪ့အထးဖၧၩ့ ယဘၪအီၪၥၭမၧၫ့လၧ ဂၪ့ခိၪချိၫ့ဖၧၩ့ယီၩ ကၪဂဲၩဝ့ၫဒၪ အၪမၬဒ့ၭနီၪလီၫႉ မိဧ့ ယအဲၪနၧၩအၪလ့ၬနီၪလီၫႉ လၧယဖၫ့ခိၪ နမၩအ့ၪယၧၩ ဆၧကိၭမံၩ့ကိၭဆံၩ့နီၪ ယၥၭနၪ့လန့ဘၪနီၪလီၫႉ မိဧ့ႇ ဆူနဲၩ ကဆါယွၩဆံၭႉ ဆိၪဂ့ၩဆိၪဘွၩယၧၩလါဆံၭႉ မွဲဘဲၫနီၪမၬ မံၭထၭမုၪ ဆၧၥၭမၧၫ့ အဆၧလ့ၩယီၩ ယကလ့ၩန့ဝ့ၫဒၪ ယၥၭတီၩတီၩလီၩ့လီၩ့နီၪလီၫႉ မိဧ့ ယအဲၪနၧၩ အၪမၬနီၪလီၫအကၠီၩ့ ကွ့ၭထးထၬအ့ၪ အမိမိ အီၪဝ့ၫဒၪ ဘဲၫယီၩၥိၭနီၪလီၫႉ

ယဲထံၪကထံၪနီၪ အၥၭအီၪဝ့ၫဒၪ ၃၀နံၪ့နီၪ ထူၭဂံၪ့လၧ စီၩ့ထူၭဂံၪ့ဘီၩ့အခံၫ့ လၩ့ထံၩဖါတၭ အချိၫ့ဆဲၪခိၪ ဒိၪထဲးၥၭလၧ ဆၧဒီၪဂီၩ့ အမိၡါထီးအလူၬ ဂဲၩဝၭလန့လီၫဘၪနီၪလီၫႉ ဆၧဆၫယီၩ ဆီၪ့နၬလၨၪအကၠီၩ့ လခဲၫ့ထုၬ ထိးဆၧၫ့ဝ့ၫလန့ဘၪအကၠီၩ့ ထိးဎွ့ၭအၥၭလၧ ၥံၪ့ဎွံၪဆရၫနီၪလီၫႉ ဆၧဘၠၩ့အယီၩ ကဂ့ၩလၫ့ထဲၩ့အဂး ဆၧယိလါအီၪဝ့ၫဒၪ ၡၩခိၬအကၠီၩ့ အၪ့က့ၩဘၩဆိၪဖၪဆၧလၧ ကၠဲၬအီၪနီၪလီၫႉ အဝ့ၫဒၪ အ့ၪမွဲအီၪမုၬလၫ့ထဲၩ့ကကၠၪ ကၥုၪ့ထၪ့ကၠီၩ့အကၠီၩ့ အၪ့က့ၩဘၩဆိၪဖၪဆၧအဖၧၩ့ လီၩဝ့ၫဒၪဂီၩ့ လၧခဲၫ့မုကနံၩ ဘၪထိးဎွ့ၭၥၭအဆၧဆၫကကၠၪ မၩနၧၩခၪ့ဖျီၪ့ဝ့ၫနီၪလီၫႉ ဎွ့ၭအၥၭဂီၩ့ ဖီၩ့ခွံၬလၩလံဘံၪ့ကကၠၪ စဲၪ့လၩ့ဘၪလၧ ဆၧဆၫဂံၪ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ဘၪထွ့ၫလၧ ၦလၧအၥုၪ့ထၪ့ EWTN လူၥီၫဂၩ့ဖျီၪ Mother Angelica အဂဲး ယရၩလၩ့န့အ့ၪဘၪနၥံၪအဆိၫ့ထုၬလဆၧၫ့နီၪ ထၨၪယီၩနီၪလီၫႉ အဲၪကွံၩဘၪထၧၫ့ဖုဝဲထံၩၥိၭထီးအလူၬ မွဲနၥံၪလၧၫ့ဎွ့ၩဝ့ၫဒၪလၧ ကဆါယွၩ အဆၧအဲၪဆၧကွံၩ ကိၭကၠၪဒ့ၭလါဆံၭႉ