ၦလၧအကဲၪထၪ့ ၦဆံၫ့ဎံၪလဂၩ ဎီးၡၩမုၪ ဂၠိၪစဖ့ၩ ဘၫခံတၫအဂဲး

လၧဎြံၬအဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မံၩ့ဎိၩၥၪဖျီၪမုၪခွၫလၧ အအီၪအနိၫ့ အဆၧရၩလၩ့ဖၧၩ့ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪနီၪ မွဲဝ့ၫဒၪ ၦလၧအကဲၪထၪ့ ၦဆံၫ့ဎံၪလဂၩ ဎီးၡၩမုၪ ဂၠိၪစဖ့ၩ ဘၫခံတၫအဂဲး အကၠီၩ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ၦဆံၫ့ဎံၪ ဂၠိၪစဖ့ၩ ဘၫခံတၫယီၩ လၧအဆံၭဆံၭခီၩဒၪအိၩ ဘၪထိးဖီၪ့ထဲၩ့ကိၭန့ၥၭဂီၩ့ အၪနံၪ့အၪလၩ ဎီးလဂၩၥိၭ ဘၪထိးဖီၪ့ထၬၥၭနီၪလီၫႉ လါနၫ့ အဝ့ၫအဆၧဆူနဲၩဒဲ အနးၥၭ ဆၧဖီၩ့ဖျ့ၭနီၪ လဂၭဂီၩ့ဂၭစၪဘၪနီၪလီၫႉ အဝ့ၫအပၩရမံၫအဂဲးဆီၫ့အကၠီၩ့ ကဲၪထၪ့ၦဆံၫ့ဎံၪဖိၪလဂၩနီၪလီၫႉ အဝ့ၫအဆၧၥၭမၧၫ့နီၪ လဂ့ၩဘၪလါနၫ့ အဝ့ၫအၥုၪ့ဂ့ၩၥၭဂ့ၩနီၪ ပဒၪထၪ့န့လၧ အဝ့ၫအဆၧဆီၫ့မီၪ့ဆီၫ့မၬႇ အဆၧချဲၩ့လဖၪနီၪလီၫႉ

ဘၫခံတၫယီၩ မွဲဝ့ၫဎီးၡၩမုၪလဂၩၥိၭ ဘၪထိးအၪ့ဆၫအၪ့ၥၭ အဘျၩ့ဘျၩ့ဂီၩ့ကကၠၪ ထီၩ့လၧနံၪ့ ၁၈၈၃နံၪ့နီၪ ဘၪထိးအၪ့ဆၫအၪ့ထဲၩ့အၥၭလၧ ခးအံၫတလံၪ ၥုၭအၥီၫ့ဖိၪလဂၩ မွဲဝ့ၫ ကလ့ၪစတိၫအီၪနီၪလီၫႉ နံၪ့နံၫနံၪ့ ဖီၩ့ခွံၬကကၠၪ ကလ့ၪစတိၫ ကိၭအဝ့ၫလၧ ခးအံၫတလံၪဂီၩ့ ဖ့ၪလၫ့ခွံၬအဝ့ၫလၧ အထံၩၥိၭ အီၪဂုၬစတံၩ မဲၫကဲၪ အီၪနီၪလီၫႉ လၧဆၧအလးနီၪ ဘၫခံတၫလဂၩ ဘၪယိထွ့ၫဖိၪၥၪနီၪလီၫႉ လ့ၩဖိၬဖိၪၥၪအခဲၫ့လၧ ဘဲၩန့ၭဝံးဖိၪ ဖိၪၥၪၥံၪ မၩလိၪ ကၠဲၭလူကၠဲၭထၫ ဆၧမၩလိၪလးဖၧၩ့ကကၠၪ အဝ့ၫယီၩ အၥၭဆုးလီၩ့အီၪလၧ ကၭၥလ့ၬ ဆၧအီၪကီၪ့အဖၫ့ခိၪနီၪလီၫႉ နံၪ့ ၁၈၉၀နံၪ့နီၪ ဘၫခံတၫလဂၩ ဒိၭန့ထၪ့ ဆၧၥူၫဝၭစကဲၫမဲၫ့တူၩဒဲ ဆၧဒူၩယၫ့စကဲၫမဲၫ့တူၩဂီၩ့ အၪ့န့ထၪ့အမံၩ့လၧ ဂၠိၪစဖ့ၩ ဘၫခံတၫနီၪလီၫႉ

အဝ့ၫအဆၧရၫမဲၫကဲၪ အီၪဂဲၫထဲၩ့လၧ ခးအၫဖရံကအခၫ ဂၠိၪစဖ့ၩဒဲ အဝ့ၫဘၪယိထွ့ၫဖိၪၥၪနီၪ မိထဲၩ့ကိၭန့ထဲၩ့ဝ့ၫ ကၠၧၫ့ကၠၧၫ့လါနၫ့ ဘၫခံတၫ လထိးဆၧၫ့ဘၪနီၪလီၫႉ ဘၪထၪ့ ခွးရိၩ့ကကၠၪ Canossian မံၭထၭမုၪလဖၪဒဲ ခးဘဲၩန့ၭ ဆၧအီၪကီၪ့ခိၪနါလဖၪ အီၪဂုးခၧၫ့ထၬအၥၭလၧ ဂၠိၪစဖ့ၩအဂးနီၪလီၫႉ ခးအံၫတလံၪ အၥနိၫဖၧၩ့ အီၪက့ၪထၬ ဎီးၥံၪနီၪ လတီၩလဘၪဘၪအကၠီၩ့ နံၪ့၁၈၈၅နံၪ့ ထီၩ့ကကၠၪ ဂၠိၪစဖ့ၩလဂၩ ဖီၩ့ခွံၬဝ့ၫဒၪလၧ ဎီးၡၩမုၪလဂၩ အဆၧမၩနီၪလီၫႉ

နံၪ့၁၈၉၃နံၪ့ဖၧၩ့ ဂၠိၪစဖ့ၩလဂၩ မိကဲၪဘၪ မံၭထၭမုၪလဂၩအကၠီၩ့ လ့ၩနုၬလၩ့ဝ့ၫလၧ Canossian မံၭထၭမုၪၥံၪ အခရၧၫ့ဂီၩ့ ကဲၪထၪ့ဘၪ မံၭထၭမုၪကပၩနီၪလီၫႉ ၁၉၀၂နံၪ့ အဝ့ၫၥုၭထဲၩ့အၥၭလၧ ဝံးဆံၫအိၪဂီၩ့ အၪ့ထံၩ့အၪ့ဖီၫ့ဆၧႇ ဆၭဆၧႇ ၦအဂဲၫဂၭကွ့ၩလၧ အဝ့ၫၥံၪအကၠီၩ့ ၦၡၩၥံၪနီၪ အၪ့ဂၭထိးဆၧၫ့ဝ့ၫအဖၧၩ့ ဆၧအီၪကီၪ့အဆၧမၩလဖၪနီၪ မၩဝ့ၫလၧ မံၭထၭမုၪအဂူၫဂၩၥံၪ ကၠၧၫ့ကၠၧၫ့နီၪလီၫႉ လၧမံၭထၭမုၪၥံၪအကၠီၩ့ ၦအဂဲၫမၩလိၪၥၭ တဝၫ့ဖိၪၥံၪလဖၪ ဒၪထၪ့ၥ့ၪယၫဘၪ ဘၫခံတၫ အပၩရမံၫၥံၪကကၠၪ အဝ့ၫၥံၪ အဆၧအဲၪဆၧကွံၩႇ ဆၧယူၭယၫ့ၥံၪ အီၪဝ့ၫဒၪလၧ ဘၫခံတၫ အဖၫ့ခိၪနီၪလီၫႉ