ၦလၧအကဲၪထၪ့ မံၭထၭမုၪလဂၩ ဟီလံၩဝုၭ ဆၧဂၩ့ဒီၩ့မုၪ ဒိၪလီရဲ(စ်) ဟဲ(တ်) အဂဲး

လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၭၥိၭထီးအလူၬၥံၪဧ့ႇ မံၩ့ဎိၩၥၪဖျီၪမုၪခွၫလၧအအီၪအနိၪ့ အဆၧရၩလၩ့ဖၧၩ့ မုကနံၩယီၩ ယအဲၪဒိၭရၩလၩ့န့အ့ၪနၥံၪနီၪ မွဲဝ့ၫဒၪ ၦလၧအကဲၪထၪ့ မံၭထၭမုၪလဂၩ ဟီလံၩဝုၭ ဆၧဂၩ့ဒီၩ့မုၪ ဒိၪလီရဲ(စ်) ဟဲ(တ်)  အဂဲးအကၠီၩ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ပကမၩကၠဲၬအဆၧမၩအဂး ကဆါဎြံၬနီၪ ကိၭထၪ့ ၦၡၩအမံၩ့မံၩ့ လၧဎံၩလးကိၭစီၪ့ လၧဆၧလၩ့ဆၫ့ အကၠီၪ့အဖျီၩ့ဖၧၩ့နီၪလီၫႉ တခၩဒၪ ပရွံထၪ့ ယွၩအဆၧကိၭနမံၩ့ အရ့ၩဒိၪထုၬနီၪ မွဲပကဘၪအီၪၥၭမၧၫ့ ပဆၧၥၭမၧၫ့လၧ ၥီၪကျဲၪအီၪအဖၧၩ့နီၪလီၫႉ လၩ့ဆၫ့ဒၪဆၧ လၧခးၥဲၫဖၧၩ့ မံၩ့ဎိၩၥၪဖျီၪၦၡၩၥံၪ အဆၧအၪ့လဲၩထၪ့ၥၭနီၪ ၦၡၩအၪဒၪဆၧ အၥၭဆုးလီၩ့အီၪဝ့ၫဒၪနီၪလီၫႉ ဆၧနီၪအကၠီၩ့ ၦလၧကဲၪထၪ့ မံၭထၭမုၪလဂၩ ဟီလံၩဝုၭ ဆၧဂၩ့ဒီၩ့မုၪအဂဲးနးဆ့ ဂ့ၩနဲၪဝ့ၫဒၪၥၭဆုးလီၩ့အဂးနီၪလီၫႉ

ၦလၧကဲၪထၪ့မံၭထၭမုၪအဆၧကဲၪ ဒိၪလီရဲ(စ်) ဟဲ(တ်) ယီၩ အမ့ၫရံကၫ့ မံၩ့ဎိၩၥၪဖျီၪ ဆၧဂၩ့ဒီၩ့မုၪ လဂၩနီၪလီၫႉ အဝ့ၫယီၩ အီၪဖျဲၪထၪ့လၧ နံၪ့ ၁၉၃၈ လၩအီၭတိၫဘၧၫ ၂၀ နီၪလီၫႉ အဝ့ၫအီၪဖျဲၪလးကျဲၩနီၪ မွဲဝ့ၫဒၪ Chicago U.S နီၪလီၫႉ အဝ့ၫဒဲ ဆၧဂၩ့ဒီၩ့ခွၫ Elvis Presly ဒိၪထၬဝ့ၫကၠၧၫ့ကၠၧၫ့ အဆိၫထုၬ ဆၧဂၩ့မၧၫ့နီၪ ဘၪဆၧထုၭထၪ့လၧ နံၪ့ ၁၉၅၇ နံၪ့နီၪလီၫႉ ဖီၩ့ခွံၬနံၪ့ၡၩခိၬကကၠၪ အဝ့ၫယီၩ အီၪက့ၪထးထၬ ဆၧဂၩ့ဒီၩ့မုၪ ဆၧလုအၪ့အဆၧၥၭမၧၫ့ဂီၩ့ ကနူၬလၩ့လၧ (ဘက်နဒစ်တင်း) မံၭထၭမုၪအခရၧၫ့ဖၧၩ့အဂး အီၪက့ၪလၩ့ၥၭအကၠီၩ့ စံၭဘိၭဘၬၥ့ၪယၫထၪ့ဝ့ၫဒၪနီၪလီၫႉ အဝ့ၫယီၩ ရွံထၪ့လၧ ၦၡၩအၪဒၪဆၧ အဲၪဒိၭလ့ၩအ့ၬ မွဲဝ့ၫ “the narrow gate” ဖၧၩ့ၥၭအအံၪ့ႇ ထုၪ့စူၪယၫ ဖၧၩ့ၥၭနီၪလီၫႉ အဝ့ၫကကဲၪထၪ့ မံၩ့ဎိၩၥၪဖျီၪအဂး လမွဲဘၪဂီၩ့ ကဆါယွၩ အစီၩ့အမၩ့ ကဎိၩထၪ့ဒိၪထၪ့အဂး မွဲဝ့ၫဒၪ ရွံထၪ့ ဖၧၩ့ၥၭအယီၩနီၪလီၫႉ

Dolores Hart လဂၩ န့ထၪ့ဘၪ ဆၧအၪ့လဲၩထၪ့ၥၭနီၪ မွဲဝ့ၫဒၪလၧ ဒိၪၦဆံၫ့ဎံၪအဂဲး ဆၧဂၩ့မၧၫ့အခံၫ့နီၪလီၫႉ အဝ့ၫလီၩဘၪဝ့ၫနီၪ လၧၦဆံၫ့ဎံၪ Francis Assisi အထံၩၥိၭ ၦဆံၫ့ဎံၪ Clare of Assisi အလး ဒိၪဝ့ၫအခံၫ့ လၧအၥၭခံဖၧၩ့ မိကဲၪဘၪဘဲၫၦဆံၫ့ဎံၪ Clare ၥိၭအကၠီၩ့ လီၩထၬဝ့ၫ အီၪဝ့ၫဒၪနီၪလီၫႉ အၡါမၬနီၪ ဎြံၬဆၧဘိၪ့ဆၧဘၩဖိၪၥံၪ ထီးအလူၬယီၩ ပၩရမံၫလဖၪ လီၩ့မၩဖိၬထွ့ၫဝ့ၫ အဆၧမၩဖၧၩ့ အၪ့န့ထၪ့ ဆၧဒီၩ့ဆၧထ့ၬကန့အဂး လၧဒိၭန့ ဆၧဆံၫ့ဖျ့ၪ စကမဲၫတူၩ အခံၫ့ဒၪအိၩ မၩန့ထၬ ၦဆံၫ့ဎံၪလဂၩဂၩ အမံၩ့နီၪလီၫႉ ဂီၩ့နီၪ မုကနံၩ ဆၧဂၩ့ဒီၩ့မုၪအလး ဆၧဂၩ့မၧၫ့အဂဲးအဂး လ့ၩဒၪလၧ ၥၫ့ဎွၩပီၩ ဆၧချဲၩ့လၩ့ဎိၭအခံၫ့ “နၧၩဝ့ၫဒၪယီၩ နမွဲဝ့ၫ ၦဆံၫ့ဎံၪ Clare of Assisi နီၪလီၫ” ၥၫ့ဎွၩအဆၧချဲၩ့ယီၩ ဘၪထံၭအၥၭနီၪလီၫႉ ဆၧနီၪအကၠီၩ့ လၧဆၧၥုၪ့ဒုၩၥၭဒုၩဖၧၩ့ ရွံထၪ့ ဆၧကၪဆၧဂဲၩအီၪဖၧၩ့ၥၭယီၩနီၪ မွဲဝ့ၫဒၪ ကဆါယွၩအစီၩ့အမၩ့ ကဎိၩထၪ့ဒိၪထၪ့အဂးနီၪလီၫႉ

အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ပၥ့ၪယၫထၪ့ဘၪ မံၭထၭမုၪ Dolores Hart အဂဲးဂီၩ့ ဘဲၫအဝ့ၫၥိၭ လၧမုကနံၩယီၩ ကဆါဎြံၬအဂး ပထိစိၩထၬၥၭအဖၧၩ့ ပကမၩဘိၪ့မၩထးဆၧ မနီၪလဲၪႉ ကဆါဎြံၬ ကိၭဖိၭၥိၭထၬ ပဝ့ၫဎြံၬဆၧဘိၪ့ဆၧဘၩဖိၪၥံၪ ကဘၪအီၪၥၭမၧၫ့လၧ ဆၧဆံၫ့ဆၧဖျ့ၪဖၧၩ့ၥၭဖၧၩ့အဂးနီၪလီၫႉ ပဝ့ၫၥံၪနးဆ့ မုကိၭနံၩ ပဆၧၥၭမၧၫ့ဖၧၩ့ ပဘၪဒၪဆၧၫ့ယၫ ဆၧအၪ့ထၩလဖၪ ပကခၪ့ဂၬခွံၬလၧ ကဆါယွၩ အခိးအတၩ ကန့အဂး ပကကျ့ၭစၨၭလါဆံၭႉ အဲၪကွံၩဘၪထၧၫ့ဖုဝဲထံၩၥိၭထီးအလူၬ မွဲနၥံၪလၧၫ့ဎွ့ၩဝ့ၫဒၪလၧ ကဆါယွၩ အဆၧအဲၪဆၧကွံၩလါဆံၭႉ