ၦလၧနါဂၧၫ့ဘၪ ကၠဲၬအဆၧကိၭ အံၫတလံၫ မံၩ့ဎိၩၥၪဖျီၪ ၥၭဘၪ့ဖိၪ Edoardo Santini

လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မံၩ့ဎိၩၥၪဖျီၪ မုခွၫလၧအအီၪအနိၪ့ အဆၧရၩလၩ့ဖၧၩ့ မုကနံၩယီၩ ယအဲၪဒိၭ ရၩလၩ့န့အ့ၪဘၪနၥံၪနီၪ မွဲဝ့ၫဒၪ ၦလၧနါဂၧၫ့ဘၪ ကၠဲၬအဆၧကိၭ အံၫတလံၫ မံၩ့ဎိၩၥၪဖျီၪ ၥၭဘၪ့ဖိၪ Edoardo Santini အဂဲးအကၠီၩ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ Edoardo Santini ယီၩ ခးအံၫတလံၫ ၦခွၫအဎံၫလၩထုၬခိၪဖၭ န့ထၬဘၪ မွဲဝ့ၫဒၪ ၥၭဘၪ့ဖိၪလဂၩနီၪလီၫႉ အဝ့ၫဒၪယီၩ မွဲဝ့ၫဒၪ မီၫဒဲၫလဂၩဂီၩ့ လုအၪ့အဆၧၥၭမၧၫ့လၧ မီၫဒဲၫဆၧၥၭမၧၫ့နီၪလီၫႉ အဆၧၥၭမၧၫ့ဆၧမၩအနီၪဆ့ အမံၩ့ဎိၩၥၪဖျီၪအီၪဝ့ၫဒၪနီၪလီၫႉ ဘဲၫနီၪၥိၭ အမံၩ့ဎိၪၥၪဖျီၪ အီၪဝ့ၫဒၪ လါနၫ့ဂ့ၩ အီၪဖျါထုၬခွံၬ အဆၧၥၭမၧၫ့အနီဂီၩ့ ကဒိၭန့ဘၪ ၥၫ့ခၫအဆၧကဲၪအဂး အီၪက့ၪလၩ့ထၬအၥၭနီၪလီၫႉ မွဲဆၧနီၪ ကအီၪထုၬခွံၬဝံၬ မီၫဒဲၫဆၧအၪ့လုအဆၧၥၭမၧၫ့အကၠီၩ့ ကွ့ၭထၬဝ့ၫလၧ အဆိၫၡဲၫမံၫဒံၫယၫကကၠၪ ဆၧပရၧၫ့အနီၪအကၠီၩ့ ဂၪ့ခိၪဎံၩ့လၩ့ ဖးထၪ့ၥၭနီၪလီၫႉ

ၥၭဘၪ့ဖိၪ Edoardo Santini ယီၩ လၧနံၪ့ ၂၀၁၉နံၪ့ဒၪအိၩ န့ထၪ့ဘၪ ၦခွၫအဎံၫလၩထုၬခိၪဖၭနီၪလၧ ABE ဖဲၫၡ့ၫခရၫ့နီၪလီၫႉ အဝ့ၫယီၩ ကလုအၪ့အဆၧၥၭမၧၫ့လၧ လုၫဎံၫလါၥ့ၪဆၧလုအၪ့အဆၧၥၭမၧၫ့အဂး မၩလိၪၥၭလၧ ဆၧဂဲထုၪ့လံ အဆၧမၩလိၪနီၪလီၫႉ အဝ့ၫယီၩ အၥၭအီၪဝ့ၫဒၪ (၂၁) နံၪ့ဒ့ၭနီၪလီၫႉ အဝ့ၫယီၩ ဆၧနံမွံၫႇ အမ့ၬဎံၫအီၪအကၠီၩ့ ၦအဲၪကွံၩအဲၪလၩ့အီၪအၪမၬႇ အမံၩ့ဎိၪထၪ့ဒိၪထၪ့ဝ့ၫဒၪနီၪလီၫႉ အဝ့ၫယီၩ အမံၩ့ဎိၪၥၪဖျီၪ အီၪဝ့ၫဒၪလါနၫ့ဂ့ၩ အီၪထုၬခွံၬဝ့ၫဂီၩ့ ဘဲၫယီၩကကၠၪ ရွံထၪ့ဝ့ၫဒၪလၧ ဆၧဂုးခၧၫ့ဆၧၡူၫဆၧဘၩအီၪ နးၥၭအဆၧၥၭမၧၫ့ဖၧၩ့ၥၭနီၪလီၫႉ အဝ့ၫယီၩ ၥုၪ့ဆီၪ့ၥၭဆီၪ့ အီၪဝ့ၫဒၪလၧ ၥၫ့ခၫအဆၧကဲၪနီၪလီၫႉ အဝ့ၫယီၩ ရွံထၪ့ဂၭဖၬထၬ လုၫဎံၫလါၥ့ၪဆၧဖၧၩ့ၥၭအဖၧၩ့ န့ထၬဘၪ ဆၧမၩနၧၩ့ခၫ့ဖျီၫ့ အထီၫထုၬႇ အဂ့ၩထုၬလါနၫ့ဂ့ၩ ဘၪထိးကိၭထၪ့ၥၭလၧ ကၠဲၬအဆၧကိၭကကၠၪ ဆၧလမံၩ့မၬ ဂ့ၩနဲၪ့န့ႇ အၪနဲၪ့န့ ဆၧၥၭမၧၫ့ လၩ့ဆိၩလၩ့ကၠၪအ့ၬနီၪလီၫႉ

အဝ့ၫယီၩ ဘဲၫနီၪၥိၭ အီၪထုၬခွံၬ အဆၧၥၭမၧၫ့လါနၫ့ဂ့ၩ အၥၭဆုးလီၩ့အီၪဝ့ၫဒၪအကၠီၩ့ ကမၩဖျီၪထၪ့ထဲၩ့ဝ့ၫ လခဲၫ့အကၠီၪ့အဖျီၩ့ဒံၭနီၪအကၠီၩ့ႇ ကဆါကၠဲၬအဂး ကလုထၪ့ဝ့ၫဒၪအကၠီၩ့ ထုၬဖျီၪထၪ့ထၬဝ့ၫလၧ Instagram နီၪလီၫႉ ဆၧပရၧၫ့အနီၪ ထုၬဖျီၪထၪ့ဝ့ၫလၧ ဆၧဂၩ့လၧ အဝ့ၫဒၪ ထွံၩလၩ့ထၬအခၪ့လၧ မံဆၩလးဆီၩ့ဆီအမ့ၬယၫ ဆၧဂ့ၩကၠၧၫ့ကၠၧၫ့နီၪလီၫႉ ဘဲၫယီၩၥိၭ အၥၭဆၧအၪ့လဲၩထၪ့ န့ဝ့ၫဒၪနီၪ အဝ့ၫဒၪ ဒၪခီၩ့ဘၪလၧ အၥၭမီၪ့ဎီၩ့လိၬၥၭ ၥၭဘၪ့ဖိၪလဖၪအကၠီၩ့  ဆၧချဲၩ့လၩ့ဎိၭလၧ ၥၭဘၪဖိၪၥံၪအခံၫ့ လၧအဆံၭဆံၭ ခီၩ့ဒၪအိၩ အီၪဝ့ၫဒၪလၧ အၥၭခံဖၧၩ့ အၥၭဆုးလီၩ့လဖၪ ဂဲၫထဲၩ့မၧၫ့ထၪ့ထဲၩ့အကၠီၩ့ႇ ဆၧအထၧးအလၧး အမံၩ့မံၩ့အကျၩ ထုၬဖျီၪထၪ့ အၥၭဆုးလီၩ့ လန့ဘၪအကၠီၩ့ႇ လၧခဲၫ့မၬ ဒၪခီၩ့ဘၪလၧ ၦလၧမၩမၧၫ့ထၪ့ အဝ့ၫအဆၧၥၭအီၪန့ဝ့ၫဒၪ ၦလဖၪၥံၪအကၠီၩ့ လီၩဖျီၪထၪ့ထၬဝ့ၫလၧ New York Time အိၩနီၪလီၫႉ

အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ Edoardo Santini ယီၩ အီၪက့ၪထၬၥၭ ဘဲၫယီၩၥိၭအကၠီၩ့ ၦလၧဖီဘၪ အဝ့ၫဒၪအဂဲး လၧ Instagramဖၧၩ့ အခမျၧး (၈၀၀၀)ဖၧၩ့ အၪဒၪဆၧနီၪ ဖ့ၪဂဲးဖ့ၪဘၭအဝ့ၫဒၪႇ ယူၭယၪ့အဝ့ၫဒၪႇ အ့ၪက့ၩဘၩဆိၪဖၪအ့ၪ အဝ့ၫဒၪနီၪလီၫႉ မွဲဆၧနီၪ ထီဘဲၫယီၩ ၥၭဘၪ့ဖိၪ အၪဒၪဆၧ လီၩ့ဖိၬ ဂၪ့ခိၪ အဆၧမုၬဆၧလၩႇ ဆၧနံဆၧကွ့ၩအခံၫ့ ဘဲၫၥိၭ ၥၭဘၪ့ဖိၪအယီၩ အမံၩ့ဎိၩၥၪဖျီၪလဖၪ အီၪက့ၪထးထၬဝ့ၫဂီၩ့ နါဂၧၫ့လီၩ့ဖိၬဘၪ ကဆါကၠဲၬအဆၧကိၭအကၠီၩ့ ပကဘၪယူၭယၪ့ပၭကၩ အၪမၬဒ့ၭနီၪလီၫႉ မွဲဆၧနီၪ အဲၪကွံၩဘၪထၧၫ့ဖုဝဲ ထံၩၥိၭထီးအလူၬၥံၪဧ့ႇ အဝ့ၫဒၪ ကဆါကၠဲၬအဆၧကိၭၥၭမၧၫ့ မွဲကလီၩ့ဖိၬဝ့ၫ ထၧၨအထုၬကန့ဝ့ၫဒၪအဂး မွဲနၥံၪနးဆ့ အ့ၪက့ၩဘၩဆိၪဖၪအ့ၪ အဝ့ၫဒၪအဂး န့ဝ့ၫဒၪအကၠီၩ့ Edoardo Santini အဂဲး ယရၩလၩ့န့အ့ၪဘၪနၥံၪ ထၨၪယီၩနီၪလီၫႉ အဲၪကွံၩဘၪထၧၫ့ဖုဝဲထံၩၥိၭထီးအလူၬ မွဲနၥံၪလၧၫ့ဎွ့ၩဝ့ၫဒၪလၧ ကဆါယွၩ အဆၧအဲၪဆၧကွံၩလါဆံၭႉ