ၦဆံၫ့ဎံၪ Virginia Centurione Bracelli အဂဲး

လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မံၩ့ဎိၩၥၪဖျီၪ မုခွၫလၧအအီၪအနိၪ့ အဆၧရၩလၩ့ဖၧၩ့ မုကနံၩယီၩ ယအဲၪဒိၭ ရၩလၩ့န့အ့ၪဘၪနၥံၪနီၪ မွဲဝ့ၫဒၪ ၦဆံၫ့ဎံၪ Virginia Centurione Bracelli အဂဲးအကၠီၩ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ၦဆံၫ့ဎံၪ Virginia Centurione Bracelli ယီၩ လၧနံၪ့ ၁၅၈၇နံၪ့ လၩ April 2 ၥၫ့ဒၪအိၩ အီၪဖျဲၪဝ့ၫဒၪလၧ ခး Italy ဝံး (ဂျီနိုအာ)နီၪလီၫႉ Virginia ယီၩ ဂဲၫဎိၩလၫ့ဘၪလၧ ၥၭဆုးလီၩ့အီၪ ဆၧဘိၪ့ဆၧဘၩ ဂံၪ့ဒီၪ့ဖၧၩ့အကၠီၩ့ လၧအဝ့ၫဒၪ အဆံၭဆံၭအခံၫ့ အၥၭဆုးလီၩ့အီၪလၧ ဆၧဘိၪ့ဆၧဘၩဂီၩ့ မိဖ့ၪဆၧၫ့လၧၥၭလၧ ကဆါယွၩအအီၪနီၪလီၫႉ လါနၫ့ဂ့ၩ အနဲၩ့အဎီၩ့ၦၡၩၥံၪအကၠီၩ့ အဝ့ၫယီၩ အၥၭအီၪ ၁၅နံၪ့အခံၫ့ ထၪ့ၡါလၩ့ဖၭဂီၩ့ အဖိၪအမုၪ န့ဝ့ၫဒၪ နံၫဂၩနီၪလီၫႉ
လါနၫ့ဂ့ၩ အဝ့ၫယီၩ ဆၧဘိၪ့လဂ့ၩဘၪအကၠီၩ့ အဝ့ၫထၪ့ၡါလၩ့ဖၭ အၦခွၫနီၪ မွဲဝ့ၫလၧ ၦမၩဆၧကွ့ၩထၩဆၧႇ ၦအီၩၥံၭအီၩဂၬဖိၪ လဂၩနီၪလီၫႉ ထၪ့ၡါလၩ့ဖၭဂီၩ့ ဖီၩ့ခွံၬ ၅နံၪ့အခံၫ့ အၦခွၫနီၪ ၥံၪဖီၩ့ခွံၬဝ့ၫဒၪနီၪလီၫႉ မွဲဆၧနီၪ Virginia ယီၩ ကဲၪလၫ့ထး ၦမုၪမဲၫလဂၩဂီၩ့ အဖိၪမုၪနံၫဂၩနီၪ ဘၪယိထဲၩ့ခွါထဲၩ့ဝ့ၫလဂၩဎးနီၪလီၫႉ အဝ့ၫယီၩ ဆၧဘၩဆိၪဖၪဆၧအဆၧမၩႇ ဆၧယၫ့ၥၭမၩဆၧၩ့အဆၧမၩလဖၪ ဖ့ၪအ့ၪအခံၫ့ ဂ့ၩဘၪစဲၪဂီၩ့ ဖီၪ့ထၪ့ဖံၭထၪ့ဝ့ၫဒၪနီၪလီၫႉ အဝ့ၫယီၩ အဖိၪအဒံၪၥံၪ ဂဲၫဎိၩထၪ့အခံၫ့ထီၩ့ကကၠၪ ဖ့ၪဆၧၫ့လၩ့ထၬအခံၫ့လၧ ၦလၧဆၧဆီၪ့ဆၧချဲၪ့လအီၪဘၪၥံၪႇ ၥုၪ့ဎိၩၥၭၡါၥံၪဒဲ ၦဘၪထိးခွံၬၡိၬထၬၥၭလဖၪၥံၪအီၪနီၪလီၫႉ
Virginia ယီၩ နံၪ့ ၁၆၂၅နံၪ့အိၩ လၧ ဂျီနိုအာ ၦအီၪဒူၩၥၭအဂးအလးနီၪ စႇၥုၪ့ထၪ့ဝ့ၫဒၪလၧ အဂံၪ့နီၪလီၫႉ နံၪ့ ၁၆၃၁နံၪ့နီၪ အၪ့လံၩ့လၩ့ ကၠီၩ့ကဖျိၪ့ဂီၩ့ ၦမုၪဂူၫဂၩၥံၪႇ ၦအလိၪဆၧမၩဆၧၩ့ၥံၪႇ ၦအီၪလမုၬဆီၪ့လချဲၪ့ဘၪၥံၪ ယိထဲၩ့ခွါထဲၩ့ဝ့ၫဂီၩ့ အဝ့ၫၥံၪ အဆၧဆူနဲၩ ကထၪ့ထီၫ့အဂး ၥီၪ့ၥၫ့အ့ၪဝ့ၫဒၪနီၪလီၫႉ လၧဆၧကၪဆၧဂဲၩဒဲ ဆၧအၪ့ထၩၥံၪအဖၧၩ့ အဝ့ၫအဆၧဆူနဲၩအဂုခၧၫ့ဒဲ ကဆါယွၩအဂး ကဖ့ၪဆၧၫ့လၩ့ၥၭ ၥၭအဆၧဆူယိၬနးဆ့ၭ ဒုၭအီၪထၪ့ဆၧမၩခံးဂၩ့ ကဆံၭကဆံၭ န့ဝ့ၫဒၪနီၪလီၫႉ
အဝ့ၫယီၩ ၥုၪ့ထၪ့ထး Our Lady of Refuge ၥရိၬဒဲ Daughters of Our Lady on Mount Calvary ၥရိၬ နံၫဖျိၪ့ဂီၩ့ လယံၭလမီးဘၪ လၧဆၧဆၫဂံၪ့ဖၧၩ့ ၦလၧအမၩဆၧမၩလၧ အဝ့ၫဒၪကၠၧၫ့ကၠၧၫ့ ၦမုၪလဖၪၥံၪအဂး ၥုၪ့ထၪ့ခရၧၫ့ နံၫမံၩ့ဆ့ၭနီၪလီၫႉ အဝ့ၫယီၩ လၧလၩ December 15ၥၫ့နီၪ ၥံၪဖီၩ့ခွံၬဝ့ၫဒၪလၧ ဂျီနိုအာ အိၩနီၪလီၫႉ ထီၩ့လၧ နံၪ့၂၀၀၄နံၪ့ လၩ May ၁၈ၥၫ့နီၪ ၥၫ့ဎွၩ John Paul II နီၪ ရွံထၪ့အဝ့ၫလၧ ၦဆံၫ့ဎံၪလဂၩနီၪလီၫႉ အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ၦလၧအၪ့န့ထၪ့ ဆၧဆံၫ့ဖျ့ၪစကဲၫမဲၫတူၩ ဎြံၬဖိၪၥံၪထီးအလူၬ အဖီၫထုၪ့နီၪ မွဲဝ့ၫဒၪ ကအီၪဆုးကျိၭလိၬၥၭလၧ ကဆါယွၩဂီၩ့ မွဲကကဲၪထၪ့ ၦဆံၫ့ဎံၪအဂးနီၪလီၫႉ မွဲဆၧနီၪ ဎြံၬဖိၪၥံၪထီးအလူၬနီၪ ကဲၪထၪ့ ၦဆံၫ့ဎံၪန့ဝ့ၫဒၪနီၪလီၫႉ မွဲဆၧနီၪ နၥံၪအၪ့န့ထၪ့ ဆၧဒီၩ့ဆၧထၬလၧ ၦဆံၫ့ဎံၪ Virginia Centurione Bracelli အီၪကန့အဂး ၦဆံၫ့ဎံၪအဂဲး ယရၩလၩ့စိၩအ့ၪဘၪနၥံၪနီၪလီၫႉ အဲၪကွံၩဘၪထၧၫ့ဖုဝဲထံၩၥိၭထီးအလူၬ မွဲနၥံၪလၧၫ့ဎွ့ၩဝ့ၫဒၪလၧ ကဆါယွၩ အဆၧအဲၪဆၧကွံၩလါဆံၭႉ