ၦဆံၫ့ဎံၪ George အဂဲး

လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မံၩ့ဎိၩၥၪဖျီၪ မုခွၫလၧအအီၪအနိၪ့ အဆၧရၩလၩ့ဖၧၩ့  မုကနံၩယီၩ ယအဲၪဒိၭ ရၩလၩ့န့အ့ၪဘၪနၥံၪနီၪ  မွဲဝ့ၫဒၪ ၦဆံၫ့ဎံၪ George အဂဲးအကၠီၩ့နီၪလီၫႉ ၦဆံၫ့ဎံၪ George ယီၩအီၪဖျဲၪ့လၧ AD ၂၈၀ ခး Greek နီၪလီၫႉ အဝ့ၫအမိအဖါနီၪ မွဲဝ့ၫဒၪဎြံၬဖိၪၥံၪနီၪလီၫႉ ကနံၩနီၪတၭ ၦဆံၫ့ဎံၪ Georgeလဂၩ ဘၪဒၪလၧၡီၩ့ အဆၧမၩတုၩ့မၩဎီနီၪလီၫႉ လၧဝံး (sylene)နီၪ ဝံးဖိၪၥံၪကဒီၪ့  ဘၪဒၪဆၧၫ့ယၫလၧ ၡီၩ့အဆၧမၩတုၩ့မၩဎီ လနံၩဘၪလ နံၩနီၪလီၫႉ လကၭဒ့ၭဘၪႇ  ၡီၩ့အဆၧအၪ့အဂး  ထီၩ့အဝၫ့ ကနံၩနီၪဘၪချိၭလၩ့အ့ၪဝ့ၫ ၥိၫနံၩဒုၩနီၪလီၫႉ အခံၫ့ယံၬလၫ့အခၫ (sylene)ဝံးဖိၪၥံၪ အၥိၫလအီၪလၧၩ့ဘၪအကၠီၩ့ ဂဲၫ့ထီၩ့ထဲၩ့လၧၦၡၩအဝၫ့နီၪလီၫႉ ဆၧနီၪအကၠီၩ့ႇ ၡီၩ့အဆၧအၪ့အဂး  ကနံၩနီၪ  ၦၡၩကဂၩဘၪဘူၭ ဆၧဖၭ  ကိၭနံၩနီၪလီၫႉ

ကနံၩနီၪႇ ၦၡၩဘူၭဆၧဖၭတၭ  အဝၫ့လ့ၩဘၪလၧ ၦဎွၩအဖိၪမုၪနီၪလီၫႉ အဝ့ၫအလးနီၪမပၩမၬ  ကအၪ့လဲၩ့ခွံၬအ့ၪအဝ့ၫ လအီၪဘၪ နးဂၩနီၪလီၫႉ  ဆၧနီၪကၠီၩ့ႇ  ၦဎွၩအဖိၪမုၪယီၩ ကဘၪကဲၪၡီၩ့အဆၧအၪ့    ကဘၪထိးၥံၫၥၭအဂး စၭထၪ့လ့ၩလၧ ၡီၩ့အီၪအလးနီၪလီၫႉ လါနၫ့ဂ့ၩႇ  ၦဆံၫ့ဎံၪ Georgeယီၩ ဆ့ၭၥံၫၡီၩ့လၧဖၩ့ဂီၩ့  ပဒၩ့ထၬအ့ၪ  ၦဎွၩအဖိၪမုၪအၥၭနီၪလီၫႉ ၦဆံၫ့ဎံၪယီၩ  ပဒၩ့ထၬအ့ၪၦဎွၩအဖိၪမုၪအၥၭနီၪအကၠီၩႇ့ ၦဎွၩနီၪဖ့ၪလၫ့အ့ၪအဝ့ၫထီၫ့ၥံၪႇ စ့ၩၥံၪႇ မနံၬထၫ့ဖျါၥံၪ  ထီးအလူၬနီၪလီၫႉ နဖ့ၫလၫ့ယၩ ဆၧကဒီၪ့ယီၩယမၩအ့ၬ ဖ့ၫလၫ့အ့ၪ ၦၡၪ့ဖိၪၥံၪထီးအလူၬနီၪအကၠီၩ့  ၦဆံၫ့ဎံၪယီၩ စ့ၭဆၧၫ့ထဲၩ့ၦဎွၩ  ဘဲၫယီၩၥိၭနီၪလီၫႉ

အဝ့ၫပဒၩ့ထၬ ၦဎွၩအဖိၪမုၪအၥၭနီၪအကၠီၩ့ႇ ၦၡၩအၪဒၪဆၧ  ဒၪဘၪဝ့ၫတၭ အဝ့ၫၥံၪအဆၧဆူၩနဲၩ့အီၪထၪ့လၧ ဎရံၬဖိၪၥံၪ အဖၫ့ခိၪဂီၩ့ ဂဲၫဒိၭန့ဘၪ စၥူၪဝၭစကြမၫ့တူၩနီၪလီၫႉ လယံၬလမီးဘၪ ဎရံၬဖိၪၥံၪဘၪထိးမၩနၧၩ့မၩစၪၥၭအခံၫ့ ထီၩ့ဝ့ၫဒၪနီၪလီၫႉ  အဝ့ၫၥံၪဘၪဒၪဆၧမၩနၧၩ့မၩစၪယီၩတၭ  ဖျါဖျ့ၭခွံၬ ဆၧဘူၪ့ဆၧဘၩ  ထီးအလူၬနီၪလီၫႉ ၦဆံၫ့ဎံၪယီၩ ကမၩဖျီၪ့ထၪ့ ဎရံၬဖိၪၥံၪ အဆၧဆူၩနဲၩ့အဂး    လ့ၩထၪ့လၧ (Palistine Diospolis) ဝံးနီၪလီၫႉ လါနၫ့ဂ့ၩႇ (Roma) ၥုၭမုဒိၪလဂၩနီၪ မၩနၧၩ့မၩစၪ အဝ့ၫလၧ ထၭခိၬအဘီၩ့နီၪလီၫႉ  လခဲၫ့ထုၬနီၪႇ ၦဆံၫ့ဎံၪ George လဂၩ ၦၡၩဖ့ၬထ့ၬအခိၬဘီၩ့တၭ ၥံၫဖီၩ့ခွံၬဝ့ၫဒၪနီၪလီၫႉ အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ  ဘဲၫၥိၭနၥံၪကထီးန့ထၬ ၦဆံၫ့ဎံၪ George အဂဲးအဖး ကန့အဂး ယရၩလၩ့န့အ့ၪဘၪနၥံၪလၧ    ဆၧအဲၪဆၧကွံၩ   ဎိၩဒိၪဖၧၩ့နီၪလီၫႉ  အဲၪကွံၩဘၪထၧၫ့ဖုဝဲထံၩၥိၭထီးအလူၬႇ မွဲနၥံၪလၧၫ့ဎွ့ၩဝ့ၫဒၪလၧ ကဆါယွၩ အဆၧအဲၪဆၧကွံၩလါဆံၭႉ