ၦဆံၫ့ဎံၪ Cecilia အဂဲး

လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မံၩ့ဎိၩၥၪဖျီၪ မုခွၫလၧအအီၪအနိၪ့ အဆၧရၩလၩ့ဖၧၩ့  မုကနံၩယီၩ ယအဲၪဒိၭ ရၩလၩ့န့အ့ၪဘၪနၥံၪနီၪ  မွဲဝ့ၫဒၪ ၦဆံၫ့ဎံၪ Cecilia အဂဲးအကၠီၩ့နီၪလီၫႉ  အဲၪကွံၩဘၪထၧၫ့ဖု ဝဲထံၩၥိၭထီး အလူၬၥံၪဧ့ႇ ၦဆံၫ့ဎံၪ Cecilia ယီၩ မွဲဝ့ၫဒၪ ဆၧလၩဆၧဖၩ့အဖိၪမုၪလဂၩနီၪလီၫႉ အဝ့ၫအီၪဖျဲၪဝၫဒၪ့လၧနံၪ့ ၁၈၀ႇ လၧခး Italy (Roma)ဝံးနီၪလီၫႉ ၦဆံၫ့ဎံၪ Cecilia ယီၩ  အၥၭမၧၫ့ထၧၫ့ဘီၩ့ယၪနီၪ ကအီၪဝ့ၫဒၪလၧ  ဆၧဆံၫ့ဖျ့ၪနီၪအကၠီၩ့ အုၩ့လၩ့အီၪလၩ့အၥၭလၧ ကဆါဎြံၬအီၪနီၪလီၫႉ

လါနၫ့ဂ့ၩႇ  အဝ့ၫအမိအဖါနီၪ ဒုၭခၫအဝ့ၫလၧ ဆၧလၩဆၧဖၩ့အီၪ ၦခွၫလဂၩနီၪလီၫႉ ၦဆံၫ့ဎံၪ  Cecilia ယီၩ မၩဆၧဘိၪ့ ဆၧအီၪဎုၬအခံၫ့နီၪ  ကဆါကၠဲၭအဂး  ဆိၪဖၪဆၧၥၭအွံၪလၧ  အၥၭခံဖၧၩ့နီၪလီၫႉ  အဝ့ၫအၥိၭနံၫဂၩ ထၪ့ၡါဂီၩ့နီၪ ၥၭကတၨၩ ဆၧထုၭၥၭ ကပၨၩ့ဆုၭဝ့ၫအဂး  ၥၭဘၪလီၩ့ဎိၭအီၪဝ့ၫဒၪနီၪလီၫႉ  အဝ့ၫအၦခွၫဒိၭန့ၬဘၪ  ဆၧၥုၪဝၭစကြမၫ့တူၩ့ဂီၩ့အခံၫ့နီၪ ၥမံၫ့အံၩ့ကပၩ  ဆၧၫ့ထုၪ့အီၪလၧ ၦဆံၫ့ဎံၪ Cecilia အနဲၩ့ဖၭနီၪဂီၩ့ အဝ့ၫအခိၪဎွံၪဖၫ့ခိၪနီၪ ဖ့ၪချုၬအ့ၪဝ့ၫလၧ  ဖီၫဆၧဆူၪ ၥရဖူၩနီၪအကၠီၩ့  အဝ့ၫအၦခွၫ ဒၪဘၪဝ့ၫနီၪလီၫႉ  ထီးလကၭဒ့ၭဘၪႇ ၦဆံၫ့ဎံၪ Cecilia အဆၧဆံၫ့ဎံၪနီၪ  မၩအၪ့လဲၩ့ထၪ့ အခ့ၫနဲၩ့ခွၫအၥၭန့ၬဝ့ၫဒၪနီၪလီၫႉ နံၪ့ ၁၉၂ နံၪ့ (commodus) ၥံၪလီၩ့မၩနၧၩ့ မၩစၪ ခရံၬဖိၪၥံၪအခံၫ့နီၪ ၦဆံၫ့ဎံၪ Cecilia အၦခွၫထၧၫ့ဖုဝဲနံၫဂၩ  ဘၪထိးမၩၥံၫအၥၭနီၪလီၫႉ

အဝ့ၫအထၧၫ့ဖုဝဲနံၫဂၩ ဘၪထိးမၩၥံၪအၥၭဂီၩ့ လယံၬလမီးဘၪ ၦဆံၫ့ဎံၪ Cecilia ဘၪထိးဖီၪ့ၥၭနီၪလီၫႉ အဝ့ၫအဆၧဆူၩနဲၩ့ တီၩလီၩ့ဘၪအကၠီၩ့  လီၩဖျီၪ့ထၪ့ဝ့ၫလၧ ၦဎွၩအမ့ၬယၪအခံၫ့နီၪ ၦၡၩထးအဝ့ၫအခိၬဘီၩ့ၥၧၫ့ထုၪဂီၩ့  ခွံၬၡိၬထးအဝ့ၫနီၪလီၫႉ အဝ့ၫအစွၫနီၪ ၦၡၩဘၧၩ့လၩ့ထၭလၧ St.Carlistu ဆၧၥွၫခိၪနီၪလီၫႉ  လယံၬလမီးဘၪ  ၦၡၩထဲၩ့ၥုၭထၭလၧ St.Cecilia အၥရိၭဖၧၩ့နီၪလီၫႉ  ၦဆံၫ့ဎံၪ Cecilia ယီၩ ၦလၧအမၩ လုၫဎံၫလါၥံၪလဖၪအဂး  မွဲဝ့ၫဒၪ ၦဆံၫ့ဎံၪလဂၩနီၪအကၠီၩ့ ယရၩလၩ့န့အ့ၪဘၪနၥံၪလၧ    ဆၧအဲၪဆၧကွံၩ   ဎိၩဒိၪဖၧၩ့နီၪလီၫႉ  အဲၪကွံၩဘၪထၧၫ့ဖုဝဲထံၩၥိၭထီးအလူၬႇ မွဲနၥံၪလၧၫ့ဎွ့ၩဝ့ၫဒၪလၧ ကဆါယွၩ အဆၧအဲၪဆၧကွံၩလါဆံၭႉ