ၦဆံၫ့ဎံၪ Agatha အဂဲး

လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မံၩ့ဎိၩၥၪဖျီၪ မုခွၫလၧအအီၪအနိၪ့ အဆၧရၩလၩ့ဖၧၩ့  မုကနံၩယီၩ ယအဲၪဒိၭ ရၩလၩ့န့အ့ၪဘၪနၥံၪနီၪ  မွဲဝ့ၫဒၪ ၦဆံၫ့ဎံၪ Agatha အဂဲးအကၠီၩ့နီၪလီၫႉ  အဲၪကွံၩဘၪထၧၫ့ဖု ဝဲထံၩၥိၭထီး အလူၬၥံၪဧ့ႇ  ၦဆံၫ့ဎံၪ Agatha ယီၩ  အီၪဖျဲၪ့လၧ (Sicily) နီၪလီၫႉ အဝ့ၫအမိမိဖါဖါနီၪ  မွဲဝ့ၫဒၪ မံၩဎိၩ့ၥၪဖျီၪ့ဂၧၫ့ထၪ့ ၥၩလၩ့ဖိၪၥံၪနီၪလီၫႉ  ၦဆံၫ့ဎံၪယီၩ  စၭထၪ့လၧဖိၪၥၪအခံၫ့နီၪ  အဆၧၥၭမၧၫ့ထၧၫ့ဘီၩ့ယၪနီၪ လုၬထၪ့ဝ့ၫလၧ ကဆါကၠဲၭအီၪနီၪလီၫႉ

ၦၡၩဂဲၫချဲၩ့လၩ့ဎိၭလၩ့အဝ့ၫ  အီၪဝ့ၫဒၪနီၪလီၫႉ  လါနၫ့ဂ့ၩႇ ၦဆံၫ့ဎံၪယီၩ ထိးဆၧၫ့ၦၡၩနးဂၩအ့ၬနီၪလီၫႉ ၦလၧအဘၪၥၭအဝ့ၫကဂၩနီၩ  မွဲဝ့ၫဒၪ (Concian) နီၪလီၫႉ ၦဆံၫ့ဎံၪယီၩ လထိးဆၧၫ့ဘၪအဝ့ၫ အဆၧအဲၪနီၪအကၠီၩ့ လီၩဖျီၪ့ထၪ့ဝ့ၫတၭ အဝ့ၫအၥၭထၪ့ဂီၩ့ ချဲၩ့ခွးဝံၬ ၦဆံၫ့ဎံၪနီၪလီၫႉ  နံၪ့  (၂၅၀) အခံၫ့နီၪ ၦဎွၩ(Darechious)  လီၩမၩနၧၩ့မၩစၪဎရံၬဖိၪၥံၪနီၪလီၫႉ  ၦဎွၩယီၩ  လ့ၩၥိၫ့ထၬ  ၦဆံၫ့ဎံၪလၧ  ၦၡၩမၩအံၭက့ၩဆၧမၩဖိၪၥံၪအဂံၪ့နီၪလီၫႉ  လါနၫ့ဂ့ၩႇ ၦဆံၫ့ဎံၪယီၩ အဆၧထိးလၩ့ၥၭနီၪ အၪ့လဲၩ့ထၪ့ဝ့ၫ နးဆံၭအ့ၬနီၪလီၫႉ လၩ့မၬယံၬ  လၩကဘံၪ့ဂီၩ့  အဝ့ၫအမိဎွါနီၪ ၦၡၩထံၭလၫ့ထၬလၧ  စဲၭအပိၩ့အရိၩ့ဂီၩ့  ၦၡၩမၩနၧၩ့မၩစၧအဝ့ၫ  အမံၩ့မံၩ့နီၪလီၫႉ  ၦၡၩအိၭလၩ့အဝ့ၫအဖံၭႇ ၦၡၩထးလၧထၭဘီၩ့နီၪလီၫႉ

ယံၬဖီၩ့ခွံၬလံၥၫ့ဂီၩ့နီၪ  ဆၧလုၬဆၧကီၩ့လအီၪလၧဘၪ  အဝ့ၫအမိဎွါနီၪ  ၦၡၩထံၭလၫ့ထၭလၧ  မ့ၪကျီၩ့အဖၫ့ခိၪဂီၩ့ ဘၪထိးမၩနၧၩ့မၩစၪၥၭ  လခဲၫ့ကမံၩ့နီၪလီၫႉ  အဝ့ၫဘၪထိး ဆၧမၩနၧၩ့မၩစၧဂီၩ့  ၦၡၩဂဲၫထဲၩ့ဆိၬန့အဝ့ၫလၧ ထီၫ့အချိၫ့ အခံၫ့နီၪ  ချဲၩ့ဒၧၫ့ကဆါကၠဲၭလၧ  အၥၭခံဖၧၩ့နီၪလီၫႉ  ယဖါကဆါကၠဲၭႇ နၧၩဝ့ၫမွဲယဖါႇ မွဲနတဲၩ့လၩ့ထၬယၧၩနီၪလီၫႉ ယဘၪထိးဆၧမၩနၧၩ့မၩစၪအဂး  နဖ့ၫလၫ့အ့ၪယၧၩ  ဆၧအွံၪၥၭဆၧၩ့ထီးအလူၬနီၪလီၫႉ ဆၧနီၪ့အကၠီၩႇ အခံၫ့ယီၩနီၪ ထိးဆၧၫ့အ့ၪယၧၩ  ယနးၥၭလၧနအီၪနီၪလီၫႉ ၦဆံၫ့ဎံၪလဂၩစ့ၭဆၧၫ့ထဲၩ့  ကဆါကၠဲၭဘဲၫယီၩၥိၭဂီၩ့  ၥံၫဖီၩ့ခွံၬ ဝ့ၫဒၪနီၪလီၫႉ ၦဆံၫ့ဎံၪ Agatha ယီၩ  ၦယိဆၧဆၫဆရၫမုၪၥံၪ ဘၪဒိၭနဲၩ့ၥၭ  လကၭဒ့ၭဘၪႇ   ၦလၧဘၪထိး နူဆၧဆၫလဖၪၥံၪ ဘၪဒိၭနဲၩ့ၥၭမွဲဝ့ၫဒၪ  ၦဆံၫ့ဎံၪလဂၩနီၪအကၠီၩ့ ယရၩလၩ့န့အ့ၪဘၪနၥံၪလၧ    ဆၧအဲၪဆၧကွံၩ   ဎိၩဒိၪဖၧၩ့နီၪလီၫႉ  အဲၪကွံၩဘၪထၧၫ့ဖုဝဲထံၩၥိၭထီးအလူၬႇ မွဲနၥံၪလၧၫ့ဎွ့ၩဝ့ၫဒၪလၧ ကဆါယွၩ အဆၧအဲၪဆၧကွံၩလါဆံၭႉ