ၦဆံၫ့ဎံၪ အဲၫဒံၫ စတံၩ့

လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မံၩ့ဎိၩၥၪဖျီၪမုၪခွၫလၧအအီၪအနိၫ့ အဆၧရၩလၩ့ဖၧၩ့ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪနီၪ မွဲဝ့ၫဒၪ ၦဆံၫ့ဎံၪ အဲၫဒံၫ စတံၩ့ (Edith Stein) အဂဲးအကၠီၩ့နီၪလီၫႉ အဲၫဒံၫယီၩ အထၧၫ့ဖုဝဲ (၁၁) ဂၩဖၧၩ့ အဝ့ၫယီၩ မွဲဝ့ၫ ဖိၪမုၪအဆံၭထုၬ လဂၩနီၪလီၫႉ အဲၫဒံၫ စတံၩ့ အမိမိ အဖဖနီၪ မွဲဝ့ၫ (ဂျူး) ဆၨၩဆၬဂီၩ့ အဆူနဲၩအဝံ ဆဲၩလၩ့ၥၭလၧ (ဂျူး) ဆၧဘိၪ့ဆၧဘၩဖၧၩ့နီၪလီၫႉ အဝ့ၫအဖါဖါနီၪ ၥံၪဖီၩ့ခွံၬဒၪ အဝ့ၫၥံၪလၧ အဆံၭဆံၭခီၩဒၪအိၩဂီၩ့ အမိမိလဂၩဎး ဘၪထိးဆၧၫ့ ဂံၪ့ဒီၪ့အတၩလၫ့ လဖၪၥံၪနီၪလီၫႉ

            အဲၫဒံၫယီၩ လၧအဆံၭဆံၭခီၩဒၪအိၩ ၥ့ၪလၩ့ဆၫ့ႇ ၥ့ၪဂ့ၩဘၪဂီၩ့ ဆၧမၩလိၪလံၬလဖၪ ဒိၭန့ဝ့ၫ ဆၧထီးနဲၪ့ အထီၫထုၬနီၪလီၫႉ အဲၫဒံၫ အၥၭအီၩ (၁၃) နံၪ့ အခံၫ့နီၪ အဝ့ၫယီၩ ကဲၪထၪ့ဝ့ၫလၧ ၥုၪ့ၥၭကၠဲၭလူကၠဲၭဂဲး လအီၪဘၪ ၦၡၩလဂၩနီၪလီၫႉ ဆၧဆူနဲၩလအီၪဘၪလၧ ဆၧဘၩဆိၪဖၪဖၧၩ့ၥိၭ အဆၧၥၭမၧၫ့ဖၧၩ့ အီၪက့ၪထၬၥၭလၧ ဆၧဘၩဆိၪဖၪ လအီၪဘၪ ၦၡၩလဂၩၥိၭနီၪလီၫႉ လါနၫ့ အဝ့ၫ မၩလိၪဆုးလီၩ့ လံၬမၩလိၪ ဆၧဆီၫ့မီၪ့ဆီၫ့မၬကိၪ့ၥ့ၪအဂး (ဒဿနိကပညာရပ်) စ့ၩရၫ့ဝ့ၫဂီၩ့ လၧအဝ့ၫထိးဆၧၫ့ထၬ ဆၧလဖၪၥံၪအဖၧၩ့ စထၪ့လီၩ့ဎွါ ဆၧတီၩ့ဆၧလီၩ့နီၪလီၫႉ ထီၩ့လၧအၥၭ (၂၁) နံၪ့ကကၠၪ ဒိၭန့ ဆၧဆီၫ့မီၪ့ဆီၫ့မၬကိၪ့ၥ့ၪခိၪဒိၪ ဒံၫကရံၫလၧ Freiburg ဘျၪ့ကိၪ့ဒိၪဂီၩ့ လီၩ့ဎွါဆုးလီၩ့ ဆၧတီၩဆၧလီၩ့နီၪလီၫႉ

            အီၪပွံၭနံၩ မုနၩကနၩနီၪ အဲၫဒံၫဒၪထၪ့ဘၪ ၦဆံၫ့ဎံၪ (ထရေဇား) နၫ့ဆါအဂဲးအဖး လံၬစီၩ့ဂီၩ့ လၧလံၬစီၩ့ဖၧၩ့ ၦဆံၫ့ဎံၪ (ထရေဇား) အဆၧမၧၫ့ၥၭၡီၩ့ဒဲ ဆၧတီၩဆၧလီၩ့အကၠီၩ့ အဝ့ၫအၥၭဘုၭထၬ လၧလံၬစီၩ့အီၪ မံၫအ့ၬဂီၩ့ ဖီဝ့ၫထၧၫ့နၩယၫနီၪလီၫႉ လံၬစီၩ့အနီၪ ဖီဝ့ၫဂီၩ့ကကၠၪ အဲၫဒံၫလဂၩ မိကဲၪထၪ့ဘၪ ကၭၥလ့ၬကဂၩအကၠီၩ့ လ့ၩလၧဆၧဘိၪ့ဆၧဘၩဖိၪၥံၪ အၥရိၬဂီၩ့ ၁၉၂၂ နံၫ့ လၩစၪ့နွ့ၫရံၫ (၁) ၥၫ့နီၪ ဒိၭန့ ဆၧဆံၫ့ဖျ့ၪစကဲၫမဲၫတူၩနီၪလီၫႉ

            အဲၫဒံၫကဲၪထၪ့ ကၭၥလ့ၬကကၠၪ မိနုၬလၩ့ဝ့ၫလၧ မံၭထၭမုၪ အခရၧၫ့လါနၫ့ အမိမိ အၥၭလဘၪဘၪအကၠီၩ့ ထၨၪအမိ ဆၧၥ့ၪယၫနၪၥ့ၪ ကအီၪအဂး လီၩပျၩ့ထၪ့ဝ့ၫဂီၩ့ လ့ၩကိၭန့ဝ့ၫလၧ ဆၧဘိၪ့ဆၧဘၩအီၪလးနီၪလီၫႉ အမိမိအဆၧၥ့ၪယၫနၪၥ့ၪ န့ထၪ့လၧ ဆၧဘိၪ့ဆၧဘၩအဂဲးကကၠၪ အဲၫဒံၫလဂၩ လ့ၩနုၬလၩ့ဝ့ၫလၧ မံၩထၭမုၪၥံၪအခရၧၫ့ဖၧၩ့ မၩလိၪၥၭလၧ ဆၧဆူနဲၩႇ ဆၧအဲၪဆၧကွံၩဒဲ ဆၧတီၩဆၧလီၩ့နီၪလီၫႉ အဝ့ၫယီၩ ကဲၪထၪ့ဘၪ ဆၧဆီၫ့မီၪ့ဆီၫ့မၬကိၪ့ၥ့ၪဖိၪဒဲ ဆရၫကွ့ၭလံၬလဲလဂၩနီၪလီၫႉ လကၭဒံၭဘၪ အဝ့ၫယီၩ ၦမုၪၥံၪ အဆၧလၩဆၧဖၩ့ဒဲ ဆၧလုအၪ့ၥၭမၧၫ့အဂဲးအဖးအကၠီၩ့ ၥီၪ့လိၪဝ့ၫလၧ ခး (ဂျာမနီ) ဒဲ (ဥရောပ) ထၧၫ့ဘံၫ့ယၫဖၧၩ့နီၪလီၫႉ

            အဲၫဒံၫအၥၭ (၄၃) နံၪ့နီၪ လ့ၩနုၬလၩ့လၧ (ကာမယ်လိုက်) မံၭထၭမုၪအခရၧၫ့ဖၧၩ့ အခံၫ့နီၪ ခး (ဂျာမနီ) နီၪ ဘၪထိးပၨၩ့ဆုၭထၬၥၭလၧ (ဟစ်တလာ) အစူၪဖၧၩ့နီၪလီၫႉ အခံၫ့နီၪ အဲၫဒံၫ အၪ့န့ထၪ့ အမံၩ့လၧ Teresa Benedict of the Cross နီၪလီၫႉ အခံၫ့အနီၪအိၩ အီၪၥၭမၧၫ့လၧ ကွ့ၭလံၬလဲလါနၫ့ ကဲၪ (ဂျုူ) ဆၨၩဖိၪလဂၩအကၠီၩ့ ဘၪထိးစီၪဆံၭၥၭၥိၭ ထံၫခးအထၧးအလၧးအကၠီၩ့ အဝ့ၫယီၩ ဘၪစဲၪ့ဖျိၭဂၭဎ့ၭဝ့ၫဒၪနီၪလီၫႉ ထီးနီၪကကၠၪ အဝ့ၫယီၩ လ့ၩအီၪလၧ ခး (နယ်သာလန်) ႇ (ကာမယ်လိုက်) မံၭထၭမုၪၥံၪ အခရၧၫ့နီၪလီၫႉ အီၪလၧနီၪအဘိၩ့အဘၭဖၧၩ့ ကွ့ၭကဲၪထၪ့ လံၬစီၩ့ကစီၩ့ န့ဝ့ၫဒၪနီၪလီၫႉ

            လၧမုကနံၩ ၦလၧအအီၪလၧ ခး (နယ်သာလန်) ဖၧၩ့ (ဂျူး) ဆၨၩဖိၪ ဆၧဘိၪ့ဆၧဘၩဖိၪလဖၪ ဘၪထိးၥုၭအၥၭလၧ ခး (ပိုလန်) ကကၠၪ အဲၫဒံၫလဂၩ ၥုၭၥၭအဂးလ့ၩဝ့ၫအခံၫ့ ဘၪထိးဖီၪ့လၧ ဖၧၩ့ၥၭနီၪလီၫႉ အဝ့ၫဒဲကၠၧၫ့ကၠၧၫ့ မံၭထၭမုၪ (ရိုဇား) နးဆ့ ဘၪထိးဖီၪ့ထဲၩ့ၥၭနီၪလီၫႉ အဲၫဒံၫယီၩ ဘၪထိးစၧၩ့ထၬအၥၭဂီၩ့ ဘၪထိးမၩနၧၩမၩစၪၥၭ လကၭဒံၭဘၪ ဘၪထိးဖိၭဘံၭထၬၥၭလၧ စီၩ့အွံၩဒူၭဖၧၩ့ဂီၩ့ ၥံၪဖီၩ့ခွံၬလၧ အၥၭအီၪ (၅၀) အခံၫ့နီၪလီၫႉ အဲၪကွံၩဘၪထၧၫ့ဖုဝဲ ထံၩၥိၭထီးအလူၬ ယရၩလၩ့န့အ့ၪဘၪနၥံၪ အဲၫဒံၫစတံၩ့အဂဲးနီၪ ထၨၪယီၩနီၪလီၫႉ မွဲနၥံၪ လၧၫ့ဎွ့ၩဝ့ၫဒၪလၧ ကဆါယွၩ အဆၧအဲၪဆၧကွံၩလါဆံၭႉ