ၦဆံၫ့ဎံၪ စံၫမ့ၫအိၫ့

ထၧၫ့ဖုဝဲထံၩၥိၭထီးအလူၬၥံၪဧ့ႇ မံၩ့ဎိၩၥၪဖျီၪ မုၪခွၫလၧအအီၪအနိၫ့ အဆၧရၩလၩ့ဖၧၩ့ မုကနံၩ ယီၩ ယအဲၪဒိၭရၩလၩ့န့အ့ၪ ဘၪနၥံၪနီၪမွဲဝ့ၫဒၪ ကဆါယ့ၫၡုၬဎြံၬ အထံၩအဖျဲ (၇၂ )  ဂၩဖၧၩ့ လဂၩမွဲဝ့ၫ ၦဆံၫ့ဎံၪ စံၫမ့ၫအိၫ့ အဂဲးနီၪလီၫႉ စံၫမ့ၫအိၫ့ ယီၩ ကလ့ၫအိၫဖၭအဖိၪခွၫမွဲဝ့ၫဂီၩ့ ကဆါယ့ၫၡုၬဎြံၬ အတခွၫမွဲဝ့ၫဒၪနီၪလီၫႉ ကဆါဎြံၬထဲၩ့ထၪ့လၧမူၭခိၪအခံၫ့ ဒၪဝ့ၫဒၪလၧ အမ့ၬၥၪဂီၩ့  လၧကဆါဎြံၬအထံၩ အဖျဲၥံၪအီၪ ၥၭမုဆံၫ့ဎံၪ ဂဲၫလၩ့အခံၫ့ဆ့  စံၫမ့ၫအိၫ့ အီၪဝ့ၫဒၪနီၪ လီၫႉ

ကဆါဎြံၬ မၧၫ့ထၪ့ထဲၩ့ဂီၩ့ လၧ ဧမောက် ဖၧၩ့ၥၭလးဖၧၩ့ ၦၡၩနံၫဂၩ ဂၭဖၬအခံၫ့ ဒၪခီၩ့ကဆါဎြံၬ နီၪနးဆ့ မွဲဝ့ၫဒၪ စံၫမ့ၫအိၫ့နီၪလီၫႉ အဝဲခွၫ ( ဂျိမ်း)  နီၪ မွဲဝ့ၫ ဂျေရုဆလင် ဝံး ၥၫ့ခိၪလဂၩအကၠီၩ့  ဂျူး ဆၨၩဖိၪၥံၪ မၩၥံၫခွံၬ အဝဲခွၫနီၪလၧ နံၪ့ (၆၂)  နံၪ့ ဘိၪ့လ့ၩဖၭ အခံၫ့အိၩနီၪလီၫႉ အဝဲခွၫဘၪထိး မၩၥံၫခွံၬယူၭအကၠီၩ့ ဘၪအၪ့န့ထၪ့ထဲၩ့ အဝဲခွၫ အလးနီၪလီၫႉ အခံၫ့အနီအိၩ ဎြံၬဆၧအီၪကီၪ့နီၪ စၭကဲၪ ထၪ့ၥၫ့အခံၫ့ ဆၧဆူနဲၩဖိၪၥံၪနီၪ အဆၧဆူနဲၩ ဘၪ့ဝ့ၫဒၪဒံၭလါနၫ့ ၦၡၩၥံၪနီၪ မၩနၧၩ့မၩစၪ ဎြံၬအဆၧအီၪကီၪ့အီၪဝ့ၫဒၪႇ ဎြံၬကဆါနီၪ မွဲဝ့ၫကဆါယွၩအဂဲး လထိးဆၧၫ့ ဘၪဝ့ၫဂီၩ့ ၦလၧ အထိးဆၧၫ့ ကဆါဎြံၬလဖၪၥံၪနီၪ လီၩ့ မၩနၧၩ့မၩစၪဝ့ၫႇ ဎြံၬဆၧအီၪကီၪ့ လီၩ့အီၪပဒၩ့ထၬဝ့ၫ အီၪဝ့ၫ ဒၪ အၪမၬဒ့ၭနီၪလီၫႉ

          စံၫမ့ၫအိၫ့နီၪ မွဲဝ့ၫ ဂျေရုဆလင် ဝံး ၥၫ့ခိၪလဂၩအကၠီၩ့ ဝံး ဂျေရုဆလင် ကဂၭဂီၩ့ဝ့ၫဒၪ အဂဲး န့ ဘၪဆၧၥ့ၪယၫဆိၪထၬလၧ ဖါကဆါယွၩအအီၪ လၧ နံၪ့ (၆၆) နံၪ့ အခံၫ့နီၪလီၫႉ မွဲဆၧနီ စံၫမ့ၫအိၫ့ လ့ၩၥုၭအီၪထဲၩ့အၥၭလၧ ယဲၩ့လၧ ဝံး (ဂျေရုဆလင်) မံလၬ (၆၅)  အလးနီၪလီၫႉ အဝ့ၫ လ့ၩၥုၭအီၪအလးဂီၩ့ (၄)  နံၪ့ကကၠၪ တံၫတု ၥုၭဖိၪၥံၪ ဂဲၫနုၬလၩ့လၧ ခးယုဒၭ ဖၧၩ့ဂီၩ့ ဂဲၫဒုၭစဲၪ့ထၪ့ ခွံၬ ဂျူး ဆၨၩဖိၪၥံၪနီၪလီၫႉ ဝံး ဂျေရုဆလင် လဂၭဂီၩ့ဒံၭ ဘၪ လၩယဲ ဘံၪ့ နီၪ ဖၭ ဘံၭထၬဝံး  ဂျေရုဆလင် အကၠီၩ့  ဂျေရုဆလင် ဖၧၩ့ ၦၡၩၥံၪ အီၪဝံအီၪဆံၩ့ ဂီၩ့ ၥံၫဝ့ၫဒၪနီၪလီၫႉ ထီၩ့ထဲၩ့ နံၪ့ (၇၀)  နီၪ ဝံး ဂျေရုဆလင် ဂၭဂီၩ့ခွံၬဝ့ၫဒၪယူၭနီၪလီၫႉ လါနၫ့ ကဆါဎြံၬဒဲ အထံၩအဖျဲၥံၪ အလးခဲၫ့ထုၬ အၪ့ဂၪဆၧအၪ့ အလးနီၪ လဂၭဂီၩ့ ဘၪနီၪလီၫႉ ဆၧဒုၭဆၧခၭဆၧ ဂီၩ့ကကၠၪ ကဆါဎြံၬ ဒဲ အထံၩအဖျဲၥံၪ မၩကဲၪထၪ့ထၬ ဂၪဆၧအၪ့အလးနီၪ ၥုၪ့ထၪ့ထဲၩ့ ဘၩယွၩၥရိၬအလး နီၪလီၫႉ စံၫမ့ၫအိၫ့ယီၩ ကဆါယွၩ အဆၧဒုၭၥ့ၪယၫဆိၪထၬအကၠီၩ့ လ့ၩၥုၭအီၪခွံၬအလးတၭ ဖီၩ့ဖျ့ၭ ဝ့ၫဒၪလၧ  ဆၧၥံၫနီၪလီၫႉ ထီၩ့ထဲၩ့နံၪ့ (၁၁၂)  နံၪ့အခံၫ့ နီၪ ဎြံၬဖိၪၥံၪ ဘၪထိးဖီၪ့အၥၭႇ ဘၪထိးမၩ ၥံၫအၥၭ အီၪတၭ စံၫမ့ၫအိၫ့ လဂၩနးဆ့ ဘၪထိးဖီၪ့အၥၭႇ ဘၪအီၪလၧ ထီၪ့ဖၧၩ့ဂီၩ့ ဘၪထိးမၩနၧၩ့ မၩစၪအၥၭ ယံၬခိၭဂီၩ့မၬ ဘၪထိးမၩၥံၫခွံၬအၥၭလၧ စူၪယၫထုၪ့လီၩ့နီၪလီၫႉ စံၫမ့ၫအိၫ့ယီၩ လၧကဆါ ဎြံၬအထံၩအဖျဲၥံၪဖၧၩ့ ဘၪထိးမၩၥံၫအၥၭ အလးခဲၫ့ထုၬလဂၩမွဲဝ့ၫလီၫႉ

Add new comment

14 + 3 =