ၦဆံၫ့ဎံၪ ဂၫဘြံၫအဲ

လၧဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မံၩ့ဎိၩၥၪဖျီၪ မုၪခွၫလၧအအီၪအနိၫ့ အဆၧရၩ လၩ့ဖၧၩ့ မုကနံၩယီၩ ယအဲၪဒိၭရၩလၩ့န့အ့ၪ ဘၪနၥံၪနီၪမွဲဝ့ၫဒၪ ၦလၧအဒိၭနဲၩ့အၥၭ လၧ ယွၩအမိမိမၫရံၫ အီၪ အၪ့ကံၩ့ ဘၩဆိၪဖၪဖၧၩ့ အၥၭဆုးလၩ့အီၪလဂၩမွဲဝ့ၫ ၦအကဲၪထၪ့ ၦဆံၫ့ဎံၪ ဂၫဘြံၫအဲ နီၪလီၫႉ လအၪ့န့ထၪ့ဒံၭဘၪ အမံၩ့ ဂၫဘြံၫအဲၩအခံၫ့ အဝ့ၫအမံၩ့နီၪ မွဲဝ့ၫ ဖရၫ့စ့ၭ ပိၫစ့ၫတံၫဂီၩ့ အဝ့ၫနီၪ မွဲဝ့ၫ အစံၫစံၫဝံးဖိၪလဂၩနီၪလီၫႉ ဖရၫ့စ့ၭပိၫစ့ၫတံၫယီၩ အၪ့န့ထၪ့ စၥူၪဝၭဆံၫ့ စကရမ့ၫတူၩလၧ နံၪ့ ၆၀၀ အခံၫ့အိၩနီၪလီၫႉ ဖရၫ့စ့ၭပိၫစ့ၫတံၫယီၩ ကဘၪဘိၪ့ထၪ့ဘၩထၪ့ယွၩဖၧၩ့ ဆၧမုၬလၩၥၭဎွံၫအီၪဝ့ၫဒိၪမၬဒ့ၭ အကၠီၩ့ ထၪ့မံဆၩဆၧလု ထၪ့ ကိၭနံၩဒ့ၭဂီၩ့ အၪ့ဎၬဆီၫ့မီၪ့ထၪ့လၩ့အၥၭႇ ဖီနးၥၭအဂးလံၬလဲ ဒဲ လ့ၩအၪ့ကံၩ့ ဘၩဆိၪဖၪ ဆၧလၧ ကိၪ ဘိၪ့ဆံၫ့ဎံၪအမ့ၬယၫ မုကိၭနံၩဒ့ၭနီၪလီၫႉ

          ဖရၫ့စ့ၭ ပိၫ့စ့ၫတံၫယီၩ အၥၭအီၪဝ့ၫ (၄)  နံၪ့အခံၫ့နီၪ အမိမိၥံၫခွံၬဝ့ၫဒၪနီၪလီၫႉ အထၧၫ့ဖုထၧၫ့ဝဲ အီၪ (၁၃)  ဂၩဖၧၩ့ အဝ့ၫနီၪ မွဲဝ့ၫ (၁၁)  ဂၩလဂၩနီၪလီၫႉ ဖရၫ့စ့ၭအမိမိနီၪ အီၪၥၭမၧၫ့ လၧ ဎြံၬအဆၧၥီၪ့ ဆၧၥၫ့အဖၫ့လၬ ဂီၩ့ ၥီၪ့ထဲၩ့ၥၫ့ထဲၩ့ အဖိၪအဒံၪၥံၪလၧ ယွၩလု ယွၩထၫအဆၧၥီၪ့ဆၧၥၫ့နီၪလီၫႉ အမိမိၥံၫဂီၩ့ အီၪထးအဖါဖါနီၪ ၥီၪ့ၥၫ့အဖိၪအဒံၪၥံၪ ဘဲၫ အမၪၥၭ ဘီၩ့ၥိၭ လၥ့ၪ ဘၪနီၪလီၫႉ

          ဖရၫ့စ့ၭပိၫစ့ၫတံၫနီၪ လၧအဝ့ၫအဆၧၥၭမၧၫ့ဖၧၩ့ ဆၧမုၬဆၧလၩၥံၪအီၪဝၩ့ဖီၩ့ထၬ အဝ့ၫလါနၫ့ ကထၪ့ဘၩယွၩအခံၫ့ႇ ကအၪ့ကံၩ့ဘၩဆိၪဖၪဆၧအခံၫ့ႇ ကဝံဖဲၪဆံၫ့ဎံၪအခံၫ့ လအီၪက့ၪထးထၬဘၪဝ့ၫ နးကၠၪနးဘျၩ့နီၪလီၫႉ အီၪလမုၬဆီၪ့လချဲၫ့ ဘၪကဲၪထၪ့တၭ ကန့ထၪ့ထဲၩ့ဘၪ ဆၧဆီၪ့ဆၧချဲၫ့အဂး အၪ့ကံၩ့ဘၩဆိၪဖၪဆၧလၧ မိမၫရံၫ အီၪဂီၩ့ အ့ၪန့ထၪ့ထဲၩ့ဘၪ ဆၧဆီၪ့ဆၧချဲၫ့စွါ ဘဲၫ ကနုၬလၩ့မၩဆၧမၩလၧ ဆၧအီၪကီၪ့လးဖၧၩ့အကၠီၩ့ အဆၧအုၩ့လၩ့ အီၪဝ့ၫလါနၫ့ န့ထၪ့ထဲၩ့ဘၪ ဆၧဆီၪ့ဆၧချဲၫ့ကကၠၪ လနုၬလၩ့မၩ ဘၪဆၧမၩလၧ ဆၧအီၪကီၪ့လးဖၧၩ့ဂီၩ့ ၥုၭထၬခွံၬအခံၫ့နီၪလီၫႉ

          ထီၩ့ထဲၩ့နံၪ့ (၈၅၆)  နံၪ့ကကၠၪ ဂူၭလ့ၩဆၧဆၫ ကဲၪထၪ့ဝ့ၫလၧ အဝ့ၫၥံၪအီၪအလးတၭ ၦၡၩၥံၪ ၥုၪ့ခိၥၭဂီၩကဲၪထၪ့ဝ့ၫဒၪထီးအလူၬနီၪလီၫႉ မွဲဆၧနီ ကအၪ့ကံၩ့ ဆၧမၩဆၧၩ့လၧ ယွၩအမိ မိမၫရံၫအီၪအဂး အၥၭလုအီၪကၠၭဝ့ၫဒၪဂီၩ့ ဝံထၪ့ကၠၭဖဲၪဆံၫ့ဎံၪအၪ့ကံၩ့ဘၩဆိၪဖၪဝ့ၫဒၪ ဘဲၫဂူၭလ့ၩဆၧဆၫ ကလၩ့မါခွံၬအဂးနီၪလီၫႉ အ့ၪဂူၭလ့ၩဆၧဆၫယီၩ လၩ့မါစွါဘဲၫ ကဝံထၪ့ဖဲၪဆံၫ့ဎံၪဂီၩ့ ကဂၭတလဲၪဆိၬန့ မိမၫရံၫအဂၩ့လၧ အဝ့ၫၥံၪအီၪအလးဖၧၩ့ အကၠီၩ့ အဆၧအုၩ့လၩ့ အီၪကၠၭဝ့ၫဒၪ လဘျၩ့ဒီၭနီၪလီၫႉ မိမၫရံၫနးဆ့ မၩလၧၫ့ဎွ့ၩအ့ၪ အဝ့ၫၥံၪ အဆၧ အၪ့ကံၩ့အၪ့ယၫတၭ ဂူၭလ့ၩဆၧဆၫနီၪ လၩ့မါခွံၬဝ့ၫဒၪ လထုၪဎးနီၪလီၫႉ အနီၪတၭ ဘဲၫအဝ့ၫ ၥံၪ အဆၧအုၩ့လၩ့ အီၪထၬၥိၭ ဆိၬထၪ့မိမၫရံၫအဂၩ့ဂီၩ့ ဝံဖဲၪဆံၫ့ဎံၪလၧ ဖၧၩ့ၥၭအလးဎံၩ့လၩ့ ယၫနီၪလီၫႉ

          ဖရၫ့စ့ၭလဂၩ ၦၡၩၥံၪ ကဂဲၫဆိၬန့ မိမၫရံၫအလးနီၪ ထွံၩလၩ့အခၪ့ အၪ့ကံၩ့ ဘၩဆိၪဖၪ ဆၧဂီၩ့ ခိၭဝ့ၫဒၪနီၪလီၫႉ ၦၡၩၥံၪ ဂဲၫဆိၬန့ မိမၫရံၫအဂၩ့ ထီၩ့လၧ အဝ့ၫအနဲၩ့ကကၠၪ ဖရၫ့စ့ၭဒၪ မိမၫရံၫအဂၩ့နီၪ အနိၭဝဲထၪ့အၥၭဂီၩ့ ချဲၩ့ဒုၪ့အဝ့ၫ “ ဖရၫ့စ့ၭ န ဘၪၥုၭအခံၫ့နီၪ ဘၪနီၪလဲၪ” နါဂၧၫ့ ဘၪ ဆၧချဲၩ့လၧ မိမၫရံၫအီၪ ဘဲၫယီၩၥိၭနီၪလီၫႉ ဖရၫ့စ့ၭလဂၩ အၪ့ဎၬထၪ့ထဲၩ့ အၥၭဂီၩ့  ကလုထၪ့လၩ့အၥၭလၧ ဆၧအီၪကီၪ့လးဖၧၩ့ အဂး အီၪဂုးခၧၫ့လၩ့အၥၭဂီၩ့ အၪ့န့ထၪ့ထဲၩ့ အမံၩ့ အၥၫ့ ဂၫ ဘြံၫအဲ လုထၪ့လၩ့အၥၭလၧ ဆၧအီၪကီၪ့လးဖၧၩ့နီၪလီၫႉ ဂၫဘြံၫအဲယီၩ အမံၩ့ဎိၩဝ့ၫ ဒၪလၧ ဆၧအၪ့ကံၩ့ဘၩဆိၪဖၪဖၧၩ့ႇ ဆၧဒိၭနဲၩ့အၥၭမိမၫရံၫအီၪဖၧၩ့ႇ ဘိၪ့ထၪ့ဘၩထၪ့ ကိၪ ဘိၪ့ဆံၫ့ဎံၪ စကရမ့ၫတူၩဖၧၩ့ အဂဲး ယရၩလၩ့ ဖ့ၪၥ့ၪယၫအ့ၪ ဘၪနၥံၪ ၦဆံၫ့ဎံၪ ဂၫ ဘြံၫအဲ အဂဲး ဘဲၫယီၩၥိၭနီၪလီၫႉ