ၦဂူၫဂၩ ဆၧဖီၩ့ဖျ့ၭကန့အဂး ဖ့ၪဆၧၫ့လၩ့ၥၭ ၦဒူၩဖိၪ ၥၫ့ခၫၥၧၫ့ဂၩအဂဲး

လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မံၩ့ဎိၩၥၪဖျီၪမုၪခွၫလၧအအီၪအနိၪ့ အဆၧရၩလၩ့ဖၧၩ့ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪနီၪ မွဲဝ့ၫဒၪ ၦဂူၫဂၩ ဆၧဖီၩ့ဖျ့ၭကန့အဂး ဖ့ၪဆၧၫ့လၩ့ၥၭ ၦဒူၩဖိၪ ၥၫ့ခၫၥၧၫ့ဂၩအဂဲးအကၠီၩ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ နံၪ့ ၁၉၁၂နံၪ့ႇ လၩ (April) ၁၅ၥၫ့ ဒၪအိၩ လၧဂၪ့ခိၪချိၫ့ဖၧၩ့ အဎိၩထုၬႇ အဂ့ၩထုၬ မွဲဝ့ၫဒၪ Titanic ကဘၩ့ ဂၭဂီၩ့ လၩ့ဘၧၩ့အဆၧကဲၪ ကဲၪထၪ့အခံၫ့ လၧကဘၩ့ဖၧၩ့ ဆၧၥၭမဲၪၥၭဖျဲၩ့အကျၩ အီၪဝ့ၫဒၪလၧ ၦအထူၬကဘၩ့ဖိၪၥံၪကၠၧၫ့ကၠၧၫ့ ၥၫ့ခၫၥၧၫ့ဂၩနးဆ့ ထဲၩ့ပၪဖိၬ ထံၫအခဲၫ့နီၪလီၫႉ ၥၫ့ခၫၥၧၫ့ဂၩနီၪ မွဲဝ့ၫဒၪ Fr. Thomas Byles, (ဘိုင်းရ်စ်) Fr. Josef Peruschiz (ပီရူးစ်ချိစ်)ဒဲ Fr. Juozas Montvila (မန့်ထ်ဗီ့လာ) နီၪလီၫႉ Fr. Thomas Bylesယီၩ ခီၫဒၪလၧ ကဘၩ့အဆၧလ့ၩ စႇထၪ့အခံၫ့နီ လၧကဘၩ့ဖၧၩ့ ဆၧဘိၪ့ဆၧဘၩဖိၪၥံၪအဂး လုထၪ့ မံၭဆၩဆၧလုထၪ့ဆံၫ့ဎံၪ ကိၭဂီၩဒ့ၭနီၪလီၫႉ ကဘၩ့လၩ့ဘၧၩ့အခံၫ့ ၦၡၩၥံၪ ဆၧၥၭမဲၪၥၭဖျဲၩ့ ချုၭဘံၭအခံၫ့ အဝ့ၫယီၩ ဂဲၫလၧၦၡၩၥံၪအကျၩ ယူၬထၪ့အစူၪဂီၩ့ အီၪက့ၪထၬ ၥုၪ့ၥၭဂုးဂုးခၧၫ့ခၧၫ့အဂး လီၩဝ့ၫဒၪဂီၩ့ ကထံၪဎးလီၫ ဖ့ၪအ့ၪ ဆၧအုၩ့လၩ့ စကမဲၫ့တူၩဂီၩ့ ဆိၪဂ့ၩဆိၪဘွၩအ့ၪဝ့ၫဒၪ မွဲဝ့ၫဒၪ ၥၫ့ခၫလဂၩနီၪလီၫႉ

ဆၧအထၧးအလၧး အၧၩ့ထၪ့နၬမကၭလၨၪအကၠီၩ့ ၦၡၩဂၪ့အလူၬႇ ကိၭၡါထၪ့အလူၬ ကဲၪထၪ့ခိၭမၬခိၭမၬ လါနၫ့ဂ့ၩ ၥၫ့ခၫ အ့ၪယူၬထၪ့အစူၪစွါဘဲၫ အီၪထဲၩ့ၥၭကၠၭ ဂုးဂုးခၧၫ့ခၧၫ့နီၪလီၫႉ ၦၡၩၥံၪယီၩ ဘဲၫဆၧအထၧးအလၧးဖၧၩ့ယီၩ ဘဲၫၥၫ့ခၫ အဆၧမၩဆၧၩ့ဆၧႇ အဆၧပၧၩ့ထၬဆၧယီၩ ဘၪအၥၭအၪမၬလ့ၬနီၪလီၫႉ ဆၧကွဲၪဖျါဆၧဒဲၩဘၭ ဆၧအခိးအတၩဒဲ ဆိၪဂ့ၩဆိၪဘွၩဆၧဂီၩ့ကကၠၪ အဝ့ၫဒၪအနၫ့ဆါ ကဲၪခိၪကဲၪနါဂီၩ့ လၧဆၧဘိၪ့ဆၧဘၩဖိၪၥံၪကၠၧၫ့ကၠၧၫ့ ဝံထၪ့ဖဲၫဆံၫ့ဎံၪ လၧအလူၬဎိၩဎိၩဒိၪဒိၪ အၪ့က့ၩဘၩဆိၪဖၪဆၧအကၠီၩ့ ၦလၧဂဲၫထဲၩ့ဖီၩ့ဖျ့ၭလၧ ကဘၩ့ဖၧၩ့လဂၩ လီၩထၬဝ့ၫအီၪဝ့ၪဒၪ ဘဲၫယီၩၥိၭနီၪလီၫႉ

လၧခဲၫ့နံၫဂၩ မွဲဝ့ၫဒၪ ၥၫ့ခၫ (Josef Peruschiz) ဒဲ ၥၫ့ခၫ (Juozas Montvila)ယီၩ ၦၡၩၥံၪ အဆၧၥၭမဲၪၥၭဖျဲၩ့ ဂဲၫဎိၩထၪ့အခံၫ့ ဆၧဘိၪ့ဆၧဘၩဖိၪၥံၪအဂး အဝ့ၫၥံၪ အဆၧမၩဆၧၩ့ လိၪဝ့ၫဒၪ ၥ့ၪယၫဝ့ၫအကၠီၩ့ လၧခဲၫ့ထုၬအခံၫ့အဂး ကအီၪတဲၩ့ဝဲၩလၩ့ၥၭ ဂ့ၩဂ့ၩဘၪဘၪကန့အဂး အၪ့မၧၫ့ဘၩဆိၪဖၪ ဆၧအုၩ့လၩ့ ဆၧဘၩဆိၪဖၪႇ ဖျါခွံၬအ့ၪဝ့ၫ အဆၧဒဲၩဘၭလဖၪၥံၪနီၪလီၫႉ လၧဆၧၥုၪ့ခိၥၭဂီၩအီၪအကျၩ ၦၡၩလနၩ့နၩ့ ထိးဆၧၫ့ ဆၧဘၩဆိၪဖၪအလူၬ လန့ဘၪအကၠီၩ့ အၥၭထၪ့ထီၫဂီၩ့ အၪ့ကီၪအဝ့ၫၥံၪႇ လီၩဆၫအဝ့ၫၥံၪနီၪလီၫႉ လယံၭလမီးဘၪ ၡၩပြံၭထဲၩ့ကဘၩ့ ဂဲၫထီၩ့အခံၫ့ ၥၫ့ခၫနံၫဂၩနီၪ အၪ့မၧၫ့လ့ၩဆိၫဂု ဆၧဘိၪ့ဆၧဘၩဖိၪၥံၪနီၪလီၫႉ ဆၧဘိၪ့ဆၧဘၩဖိၪၥံၪ ဖ့ၪအ့ၪအဝ့ၫၥံၪအဂးအလး လါနၫ့ဂ့ၩ အဝ့ၫၥံၪ မီၪ့ဘံၭခွံၬဂီၩ့ ဖ့ၪဆၧၫ့လၩ့ အဆၧၥၭမၧၫ့အကၠီၩ့ ၦလၧအဂဲၫထဲၩ့ဖျ့ၭလၫ့လၧ ဆၧအထၧးအလၧးဖၧၩ့ ၦၡၩလဂၩ လီၩထၬဝ့ၫဒၪနီၪလီၫႉ

အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ၥၫ့ခၪလဖၪယီၩ ဘၪဒၪဆၧၫ့ယၫ ဆၧၥံၫအခံၫ့ ဆၧၥၭမဲၪၥၭဖျဲၩ့ အီၪဝ့ၫဒၪလါနၫ့ဂ့ၩ အဝ့ၫၥံၪအဆၧၥၭမၧၫ့အဂးနီၪ ယိဝ့ၫအ့ၬဂီၩ့ ၦၡၩၥံၪလဖၪ ဆၧအၪ့ယိၪခဲၫ့ကံၭႇ ဆၧၡၪ့ဆၧနၭအဖၧၩ့ ကအီၪဂုးခၧၫ့န့ဝ့ၫဒၪအဂး မၩၡူၪမၩဘၩဝ့ၫတၭ ၦၡၩၥံၪကဖီၩ့ဖျ့ၭဝ့ၫဒၪအဂး ဖ့ၪဆၧၫ့လၩ့ၥၭနီၪလီၫႉ ၥၫ့ခၪလဖၪယီၩ ဂၪ့ခိၪၡၩအဆၧၥၭမၧၫ့အဂး မၩဖီၩ့မၩဖျ့ၭဝ့ၫဒၪ လကၭဒံၭဘၪ ထီစိၩလၧ လၧခဲၫ့ထုၬအခံၫ့ကကၠၪ န့ၥၭအဆၧၥၭမၧၫ့နးဆ့ ကန့ဘၪ ဆၧထိးတဲၩ့တၩ့တဲၩ့အဂး ကျ့ၭစၨၭဝ့ၫ ၥုၪ့ဒူၩၥၭဒူၩအီၪ မွဲဝ့ၫဒၪ ၥၫ့ခၫၥံၪယီၩအကၠီၩ့ ယရၩလၩ့န့အ့ၪဘၪနၥံၪလၧ ဆၧအဲၪဆၧကွံၩ ဎိၩဒိၪဖၧၩ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭထီးအလူၬ ကဆါယွၩ အဆၧအဲၪဆၧကွံၩ လၩ့ယွၩဝ့ၫဒၪလၧ နၥံၪကိၭဂၩဒ့ၭ အဖၫ့ခိၪလါဆံၭႉ