ၥီမၭ (စ်) အဲၫဒံၫဆ့ၫ

လၧဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧႉႇ မံၩ့ဎိၩၥၪဖျီၪ မုၪခွၫလၧအအီၪအနိၫ့ အဆၧ ရၩလၩ့ဖၧၩ့ မုကနံၩယီၩ ယအဲၪဒိၭရၩလၩ့န့အ့ၪ ဘၪနၥံၪနီၪ မွဲဝ့ၫဒၪ ဘၪထွ့ၪလၧ စဲၭအဆၧဖံၭဆၧမၩဂဲး ၦအမၩယိထွ့ၪဆၧ ခးအမ့ၫရံကၭဖိၪၥံၪဖၧၩ့ အဂုခိၪလဂၩမွဲဝ့ၫ ၥီမၭ (စ်) အဲၫဒံၫဆ့ၫ အဂဲးအကၠီၩ့နီၪလီၫႉ အဲၫဒံၫဆ့ၫယီၩ အထၧၫ့ဖုဝဲအီၪဝ့ၫ (၇) ဂၩဂီၩ့ အဝ့ၫနီၪမွဲဝ့ၫ အဆံၭထုၬ ဖိၪခွၫ လဂၩနီၪလီၫႉ အမိမိနီၪ မွဲဝ့ၫ ၦအၥီၪ့လံၬဂ့ၩ ဆရၫမုၪ လဂၩနီၪလီၫႉ အဲၫဒံၫဆ့ၫယီၩ လၧ အဝ့ၫဆံၭဆံၭအိၩ ဘၪထိးဆၧဆၫဎၧၫ့အကၠီၩ့ နါဂၧၫ့ဆၧပျၩ့ပျၩ့လၥ့ၪဘၪ အနါဎၧၫ့ဝ့ၫဒၪနီၪလီၫႉ

          အဲၫဒံၫဆ့ၫယီၩ အၥၭအီၪဝ့ၫ (၇) နံၪ့အခံၫ့နီၪ ထၪ့ဘၪစမၩလိၪလါနၫ့ ထၪ့ ဘၪ ဆၧမၩလိၪ လၩ (၃)  ဘံၪ့ဖိၪနီၪလီၫႉ အနါဎၧၫ့နီၪကမံၩ့ လၧအၥၭဆုးလၩ့အီၪဆၧလမံၩ့မံၩ့အဖၫ့ခိၪ အီၪက့ၪထၬ အၥၭအလး ထနီ လီၫအကၠီၩ့ ဆရၫဆရၫမုၪၥံၪလအဲၪဒိၭ ဘၪအဝ့ၫတၭ အဖိၪခွၫ အဲၫဒံၫဆ့ၫအဂဲး အမိမိ ဘၪနါဂၧၫ့ထဲၩ့ ဘၪလၧ ဆရၫ ႇဆရၫမုၪၥံၪအီၪ မုကိၭနံၩဒ့ၭနီၪလီၫႉ မွဲဆၧနီ အမိမိနီၪ ထုၬထၪ့ခွံၬ အဝ့ၫလၧ ဆၧမၩလိၪလးဖၧၩ့ဂီၩ့ အမိမိ ၥီၪ့အ့ၪအဝ့ၫလံၬလၧ အဂံၪ့နီၪလီၫႉ အဲၫဒံၫဆ့ၫလဂၩ အၥၭအီၪဝ့ၫ (၁၁)  နံၪ့အခံၫ့နီၪ အဲၪဒိၭၥ့ၪယၫဆၧ အမံၩ့အစံၩ့ ဒ့ၭတၭ ဒၪလံၬစီၩ့ကိၭမံၩ့ ဖီဝ့ၫဒၪလၧ ၥုၪ့ဆုးလၩ့ၥၭဆုးလၩ့ဖၧၩ့နီၪလီၫႉ အၪ့န့ထၪ့ ဆၧၥ့ၪယၫနၪၥ့ၪလၧ ဖီလံၬဖၧၩ့ နီၪလီၫႉ အၥၭ (၁၂)  နံၪ့ အခံၫ့နီၪ ဖီထၬလံၬလဲၥံၪဖၧၩ့ ကမၩကဲၪထၪ့ဆၧမၩအဂး အၪ့ကံၩ့အခွးအယါလၧ အမိ အဖါ ၥံၪအီၪ နီၪလီၫႉ

          အဆၧမၩနီၪမွဲဝ့ၫဒၪ လၧမ့ၪလဲၪၥိၪဖၧၩ့ၥၭဖၧၩ့ အၪ့ဆၫဆၧဂီၩ့ လီၩ့ဎွါ ထုၬထၪ့ ဆၧပရၧၫ့  အၪ့ဆၫအၪ့ အဆၧပရၧၫ့နီၪလီၫႉ အဆၧပရၧၫ့လဖၪၥံၪနီၪ လၧၦထၪ့ထုၬမ့ၪလဲၪ့ၥိၪၥံၪအကျၩ အမံၩ့ ဎိၩဝ့ၫဒၪနီၪလီၫႉ လၧမ့ၪ လဲၪၥိၪကလးဖၧၩ့ဆ့ ဖိၬလိၬထုၬထၪ့ယိ စီၩ့ဂဲးလမံၩ့အကၠီၩ့ မ့ၪလဲၪၥိၪလးဖၧၩ့ မ့ၪဂဲထုၪ့အၪ့ဆၧ ကဲၪထၪ့ဝ့ၫဒၪ နီၪလီၫႉ မၩဆၧမၩလၧ မ့ၪလဲၪၥိၪ ဆၧမၩလးဖၧၩ့အခံၫ့ မ့ၪလဲၪၥိၪ လစုၭထဲးဘၪ ဖိၪၥၪဆံၭဖိၪလဂၩအဂး အီၪပဒၩ့ထၬအ့ၪန့ဝ့ၫဒၪအကၠီၩ့ ၦၡၩၥံၪ အၪ့အူၭဘၪအဝ့ၫ ဒိၪမၬဒ့ၭ လကၭဒံၭဘၪ ဖိၪၥၪဆံၭဖိၪအဖါဖါနီၪ ဖ့ၪထဲၩ့အ့ၪအဝ့ၫ တဲၫလံၫဂရၫ့ အဆၧၥ့ၪယၫ နၪၥ့ၪနီၪလီၫႉ

          ထီၩ့ထဲၩ့နံၪ့ ၁၈၇၀ နီၪ မၩကဲၪထၪ့ စီၩ့ဂဲးအဆၧမၩ အဂုခိၪထုၬဂီၩ့ ၦၡၩကမၩဆၧၩ့ အဝ့ၫဆ့ ကိၭထၬဝ့ၫ ဒၪနီၪလီၫႉ အဲၫဒံၫဆ့ၫ ထုၬထၪ့ယိ အစီၩ့ဂဲးအဆၧဖံၭဆၧမၩနီၪ ကဲၪထၪ့ဝ့ၫဒၪဂ့ၩဘၪအကၠီၩ့ ၦၡၩကမၩဆၧမၩလၧ အဝ့ၫ ဂဲၫအၪထၪ့ဝ့ၫဒၪနီၪလီၫႉ အဆၧမၩနီၪ မွဲဝ့ၫဒၪလၧ “ဝဲစတၫ့ယူၫနံၫယၫ့ တဲၫလံၫဂရါ” ကမနံၫ ဆၧမၩလး အဂးနီၪလီၫႉ အဲၫဒံၫဆ့ၫ ဖိၬလိၬထုၬထၪ့စီၩ့ဂဲးအဆၧမၩယီၩ ၦၡၩၥံၪအဂး အခိးအတၩအီၪဝ့ၫ ဒိၪမၬဒ့ၭအကၠီၩ့ ၦကဲၪဒိၪလဂၩနီၪ အၪ့ဎွ့ၩအဝ့ၫ အဆၧထုၬထၪ့ထီးအလူၬတၭ အဲၫဒံၫဆ့ၫလဂၩဖီၩ့ဖျ့ၭဝ့ၫဒၪလၧ ဆၧၡၪ့ဖၧၩ့ယူၭ နီၪလီၫႉ အဝ့ၫအဆၧထုၬထၪ့ယိ စီၩ့ဂဲးထီးအလူၬလဖၪၥံၪဖၧၩ့ အမံၩ့အဎိၩထုၬနီၪမွဲဝ့ၫဒၪ မၩကဲၪထၪ့မ့ၪပျၩ့န့ဝ့ၫ ဒၪအကၠီၩ့နီၪလီၫႉ ထီၩ့လၧထီ ဘိၫယီၩ အဲၫဒံၫဆ့ၫဖိၬလိၬထုၬထၪ့ထၬ  မ့ၪပျၩ့အကၠီၩ့ ထံၫခးထၧၫ့ခးယၫဖၧၩ့ ၦၡၩၥံၪၥိၩ့မ့ၪန့ဝ့ၫဒၪဘဲၫယီၩၥိၭနီၪလီၫႉ ထၧၫ့ဖုဝဲထံၩၥိၭၥံၪဧႉႇ ၥီမၭ (စ်) အဲၫဒံၫဆ့ၫယီၩ ထၨၪကန့ထၪ့ဘၪ အဆၧဖံၭဆၧမၩ အဖီၫအၥၪဘဲၫယီၩၥိၭနီၪ ဘၪထိးၡၪ့ထိးယၬဝ့ၫဒၪ ဒိၪမၬဒ့ၭ ဘၪမၩကဲၪထၪ့ယိအစီၩ့ဂဲးအဆၧမၩ ယီၩ လမံၩ့ဘၪလမံၩ့နီၪလီၫႉ အဆၧဖံၭဆၧမၩလဖၪၥံၪနီၪ လကဲၪထၪ့ဒံၭဘၪလါနၫ့ လအီၪက့ၪဖျါထုၬထၬဘၪဝ့ၫဂီၩ့ ဆုးကျ့ၭစၨၭမၩကဲၪထၪ့ဝ့ၫအကၠီၩ့ န့ထၪ့ဘၪဆၧအနၧၩ့ ဘဲၫယီၩၥိၭနီၪလီၫႉ အဲၪကွံၩဘၪထၧၫ့ဖုဝဲထံၩၥိၭ ထီးအလူၬ နးဆ့ လၧပဆၧဖံၭဆၧမၩလဖၪၥံၪအဖၫ့ခိၪ ပကခိးဂဲးခိးဘၭလၧ ၥုၪ့အီၪၥၭအီၪ ၥုၪ့ဆၧၩ့ၥၭဆၧၩ့ဖၧၩ့ လါဆံၭႉ