အဲရိၫဆံၩ့ ဘိၩ့

ထၧၫ့ဖုဝဲထံၩၥိၭထီးလူၬၥံၪဧ့ႇ မံၩ့ဎိၩၥၪဖျီၪ မုၪခွၫလၧအအီၪအနိၫ့ အဆၧရၩလၩ့ဖၧၩ့ မုကနံၩ ယီၩ ယအဲၪဒိၭ ရၩလၩ့န့အ့ၪ ဘၪနၥံၪနီၪ မွဲဝ့ၫဒၪ အဲရိၫဆံၩ့ ဘိၩ့ အဂဲးနီၪလီၫႉ လၧအဝ့ၫအဆၧၥၭ မၧၫ့ အဖၫ့ခိၪ ဘၪဒၪခီၩ့ဆၧၫ့ယၫ ဆၧအဂဲးအဖးလဖၪနီၪ ဒိၪနဲၪဖျီၪထၪ့ထၬ ဆၧဂၩ့မၧၫ့ အီၪဝ့ၫ ဘဲၫ ယီၩၥိၭနီၪလီၫႉ ဆၧဂၩ့မၧၫ့အဂဲးအဖးနီၪမွဲဝ့ၫဒၪ အဲရိၫဆံၩ့ ဘိၩ့ယီၩ ကအၪ့ကအီၪအဂး အီၪဝ့ၫဒၪ လၧ ဆၧလၧၫ့ဆၧဎွ့ၩနီၪလီၫႉ အဝ့ၫနီၪမွဲဝ့ၫ ၥံၪ့ဎွံၪဆရၫလဂၩဂီၩ့ လၧအဆၧဖံၭဆၧမၩအဖၫ့ခိၪ မၩဝ့ၫ ဒၪလၧ အတၩလၫ့မုၩဒၩ လၧၫ့လၧၫ့ဎွ့ၩဎွ့ၩလါနၫ့ ကဖီၪ့ထၪ့ဖံၭထၪ့ဆၧမၩလၧ ဆၧအဲၪ ဆၧကွံၩ ဆၧ ယၫ့ၥုၪ့ယၫ့ၥၭ ႇ ဆၧၥ့ၪယၫနၪၥ့ၪအ့ၪဖၧၩ့အဂးနီၪ အဝ့ၫအီၪက့ၪထၬဝ့ၫဘဲၫ အခီၫပယီၫ လအီၪဘၪ ၥိၭနီၪလီၫႉ

          အဲၫရိၫဆံၩ့ဘိၩ့ယီၩ မၩ ၥံၪ့ဎွံၪဆရၫ အဆၧမၩနီၪ မၩဝ့ၫဒၪမုၬမုၬလၩလၩအကၠီၩ့ အလိၬၥၭ ၥံၪ့ဎွံၪဆရၫ ဆရၫ မုၪၥံၪနီၪ မၩဆၧဖံၭဆၧမၩလၧ အဝ့ၫ မုၬမုၬလၩလၩန့ဝ့ၫဒၪနီၪလီၫႉ အကနံၩတၭ လၧ အဝ့ၫအလိၬၥၭၥံၪအီၪပွံၭအခံၫ့ အဲၫရိၫဆံၩ့ဘိၩ့ဘၪကူၭလၩ့န့အၥွံၪနီၪလီၫႉ ဆၧအဂဲးအဖးကဲၪ ထၪ့ဘဲၫယီၩၥိၭအကၠီၩ့ လီၩ့ဎွါယိထဲၩ့အဆၧဆၫ ကကၠၪ အဝ့ၫအဆၧဆၫယီၩ ထီလၧယၫအဂး အ ဆၧယိလါ လအီၪဘၪနီၪလီၫႉ အဝ့ၫအဆၧလၧၫ့ဆၧဎွ့ၩၥံၪ ႇ ၥီၪ့လိၪနဲၪလိၪထၬ ၥံၪ့ဎွံၪ အဆၧၥ့ၪယၫ နၪၥ့ၪ လဖၪၥံၪနီၪ ကဲၪထၪ့ဝ့ၫဒၪ ဆၧပျီၩပျီၩကနီၪလီၫႉ

          လယံၬလမီးဘၪအခံၫ့ ၥံၪ့ဎွံၪဆရၫ အဲၫရိၫဆံၩ့ဘီၩ့ယီၩ ဆၧဆၫန့ထၪ့အကၠီၩ့ ဘၪကဲၪ့ထၪ့ ထဲၩ့ဆၧဆၫဆါ ယူၭနီၪလီၫႉ ဘၪခိၭယိထဲၩ့ ၥံၪ့ဎွံၪဆရၫၥံၪ ကဂဲၫယိ အဝ့ၫအခံၫ့ယူၭနီၪလီၫႉ အဝ့ၫ ဘၪထိးဆၧဆၫ တၭ မုလါ ၥံၪ့ဎွံၪ ဆရၫၥံၪ ဂဲၫယိဂုအဝ့ၫလါနၫ့ ၥံၪ့ဎွံၪဆရၫၥံၪနီၪ လယိဂုးဘၪ အဝ့ၫအကၠီၩ့ အဝ့ၫအၥၭလွ့ ကဲၪထၪ့ဝ့ၫဒၪ ဎိၩဒိၪဒ့ၭနီၪလီၫႉ အဲရိၫဆံၩ့ဘိၩ့ အဆၧဆၫယီၩ ဂဲၫဎိၩထၪ့ တၭ ကဘၪဎွ့ၭဝ့ၫဂီၩ့ ကဘၪအၪ့ကၪဝ့ၫလၧ စီၩ့ဂဲး အခံၫ့ ကဲၪထၪ့ဝ့ၫဒၪနီၪလီၫႉ မၩကဲၪထၪ့ဝ့ၫ ဘဲၫယီၩၥိၭဂီၩ့လါနၫ့ လဘျၪထဲၩ့ဘၪအကၠီၩ့ ၥံၪ့ဎွံၪဆရၫၥံၪ ကထုၬထၪ့ခွံၬ ဆၧဆၫယီၩအဂး အၪ့ကံၩ့ ၥၭအဆၧလၩ့ဎိၭလၧ အဝ့ၫနီၪလီၫႉ ၥံၪ့ဎွံၪဆရၫၥံၪ ဘျၩ့ဘဲၫယီၩၥိၭကကၠၪ အဆၧဆၫနီၪ ဘျၪထဲၩ့ၡီၩ့ထဲၩ့ဝ့ၫဒၪ ယူၭနီၪလီၫႉ

          အဲရိၫဆံၩ့ဘိၩ့ အဆၧဆၫဘျၪထဲၩ့ဂီၩ့ မၩထဲၩ့ ၥံၪ့ဎွံၪဆရၫအဆၧမၩကကၠၪ ၥီၪ့ၥၫ့ထဲၩ့ အထံၩ အဖျဲ ၥံၪ့ဎွံၪ ဆရၫဆရၫမူၪၥံၪ ပဝ့ၫလဖၪယီၩ ပကဲၪ ၦအဘျၩ့ ဆၧဆၫဆါၥံၪလါနၫ့ ကနံၩကကၠၪ ပကဘၪကဲၪဆၧဆၫဆါ ၥံၪဒံၭနီၪလီၫႉ ပကဲၪဆၧဆၫဆါၥံၪကကၠၪ  ပၥၭဆိၫ့မုလါလၧ ဆၧအဲၪဆၧ ကွံၩအီၪ ႇ ဆၧယၫ့ၥုၪ့ယၫ့ၥၭအီၪ ၥံၪ့ဎွံၪ ဆရၫ ဆရၫမုၪၥံၪ အဆၧယိႇ ဆၧဘျၩ့နီၪလီၫႉ မွဲဆၧနီ ဘဲၫ ပကနၪၥ့ၪအ့ၪ ဆၧဆၧဆါၥံၪ အဂး ပကဘျူၭလၩ့ ၥံၪ့ဎွံၪဆရၫ ဆရၫမုၪၥံၪ အဆၧၥိၭဆၧကီၩ့ဂီၩ့ ပကကီၩ့ထၪ့ၥိၭထၪ့ထဲၩ့ ဆၧဆၫဆါၥံၪအဆၧၥိၭဆၧကီၩ့ ပကအီၪလၧ ဆၧဆၫဆါၥံၪအလး မုနံၩ (၃)  နံၩဖၧၩ့ဂီၩ့ ပကအၪ့န့ထၪ့ ဆၧၥ့ၪယၫနၪၥ့ၪလၧ ဆၧဆၫဆါၥံၪအဖၫ့ခိၪလါဆံၭႉ အဲၫရိၫဆံၩ့ဘိၩ့ ၥီၪ့ထဲၩ့ၥၫ့ထဲၩ့အ့ၪ ၥံၪ့ဎွံၪဆရၫဆရၫမုၪၥံၪ ဘဲၫယီၩၥိၭနီၪလီၫႉ လၧလံၬဆံၫ့ဎံၪ စမၭၥုၫ( 7:12) ဖၧၩ့ “ကယဲဆၧလၧ နၥံၪဆိၫ့ ၦၡၩမၩနၥံၪကိၭမံၩ့ဒ့ၭနီၪ ႇ မၩအဝ့ၫၥံၪ ဘဲၫနီၪအၥိၭဆံၭႉ” အဲၪကွံၩဘၪ ထၧၫ့ဖုဝဲထံၩၥိၭ ထီးအလူၬၥံၪဧ့ႇ အဲၫရိၫဆံၩ့ဘိၩ့ အဂဲး ဆၧရၩလၩ့ယီၩ မွဲဝ့ၫဒၪထၨၪယီၩလီၫႉ မွဲယွၩ အဆၧဆိၪဂ့ၩဆိၪဘွၩ လၧၫ့ဎွ့ၩ ဝ့ၫ ဒၪလၧ နၥံၪအဖၫ့ခိၪ လါဆံၭႉ