အီၪပဒၩ့ထၬ ၦအမၩၡၩခံးဂးအဆၧမၩ ၦဆံၫ့ဎံၪ လူၩဝံ ဒံၫမၫရံၫလဲ

လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မံၩ့ဎိၩၥၪဖျီၪမုၪခွါလၧအအီၪအနိၫ့ အဆၧရၩလၩ့ဖၧၩ့ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪနီၪ မွဲဝ့ၫဒၪ အီၪပဒၩ့ထၬ ၦအမၩၡၩခံးဂးအဆၧမၩ ၦဆံၫ့ဎံၪ လူၩဝံ ဒံၫမၫရံၫလဲအဂဲး အကၠီၩ့နီၪလီၫႉ ထၧၫ့ဖုဝဲထံၩၥိၭထီးအလူၬၥံၪဧ့ႇ လူၩဝံ ဒံၫမၫရံၫလဲယီၩ အီၪဖျဲၪလၧခးပြ့ၫၥ့ၭႇ မဲၩအူၩလးကျဲၩ ၦအကဲၪဒိၪကဲၪမု ဂံၪ့ဒီၪ့ဖၧၩ့နီၪလီၫႉ အဝ့ၫယီၩ မၩလိၪထၬအၥၭလၧ ဒိၫမံၫနံၫကၫ့ မံၭထၭမုၪၥံၪ အကၠီၩ့နီၪလီၫႉ အဝ့ၫမိကဲၪဘၪ မံၭထၭမုၪလါနၫ့ ဆၧဆီၪ့ဆၧချဲၫ့ လအီၪဘၪအကၠီၩ့ ကဲၪထၪ့ဝ့ၫလၥ့ၪဘၪနီၪလီၫႉ မွဲဆၧနီၪ ၦဖ့ၪကိၪ့နးၥၭအဂဲး အဆၧဆၫ့ထွ့ၫဖၧၩ့ ၁၆၁၃နံၪ့နီၪ အီၪဎုၬထဲၩ့လၧ အၫ့တိၫနံၫနီၪလီၫႉ

ထီၩ့လၧနံၪ့ ၁၆၂၅နံၪ့နီၪ အဝ့ၫအဆၧအဲၪ အၫ့တိၫနံၫ ၥံၪဖီၩ့ခွံၬကကၠၪ အနးၥၭဂဲးဘၭ ကန့ထၪ့အဂး ၦဆံၫ့ဎံၪ Vincent De Paul ၥီၪ့လိၪနဲၪလိၪအ့ၪ အဝ့ၫနီၪလီၫႉ အဝ့ၫယီၩ အဲၪဒိၭန့ဘၪ ၦဆံၫ့ဎံၪ Vincent De Paul အကၠီၩ့ အၥၭထၧၫ့ထီယၫ လုထၪ့ၥၭဂီၩ့ ကျ့ၭစၨၭမၩဆၧၩ့ ၦအၡၪ့ဖိၪ လၧၦဆံၫ့ဎံၪ Vincent De Paul ကၠၧၫ့ကၠၧၫ့နီၪလီၫႉ လၩ့ဆၫ့ဒၪဆၧ ၦလၧဆၧဆီၪ့ဆၧချဲၫ့ လအီၪဘၪၥံၪႇ ၡၪ့ဖိၪယၬဖိၪၥံၪဒဲ ၦဘၪထုၬပဲၩထၬၥၭ လဖၪၥံၪအဂး ယိထွ့ၫမၩဆၧၩ့ဝ့ၫ အခရၧၫ့ဖၧၩ့ ၦမၩဆၧမၩလၧ အဝ့ၫဒၪကၠၧၫ့ကၠၧၫ့ ၦမုၪလဖၪနီၪ အဝ့ၫကဲၪခိၪကဲၪနါဝ့ၫနီၪလီၫႉ နံၪ့ ၁၆၃၃နံၪ့နီၪ ၦလၧအဆၧမၩ လအီၪဘၪၥံၪအဂး ၥိၩ့ထၪ့အဝ့ၫအဂံၪ့ဂီၩ့ မၩဆၧၩ့ဝ့ၫနီၪလီၫႉ ဆၧလၧဂံၪ့ယီၩ လၧခဲၫ့ကကၠၪ ကဲၪထၪ့ဝ့ၫဒၪလၧ St. Vincent De Paul မံၭထၭမုၪ အခရၧၫ့နီၪလီၫႉ ၁၆၃၄နံၪ့နီၪ အနၫ့ဆါဒၪအဝ့ၫ အုၩ့လၩ့ လဆိၩယၫဂီၩ့ ၦလၧအမိနုၬလၩ့ မံၭထၭမုၪအခရၧၫ့ဖၧၩ့ လဖၪနီၪ ထုၭန့ထၬန့ဝ့ၫဒၪနီၪလီၫႉ အဝ့ၫယီၩ လ့ၩလၧခးပြ့ၫၥ့ၭ ထၧၫ့ဘံၫ့ယၫဂီၩ့ ဆၧဆၫဂံၪ့ႇ ဖိၪဎွ့ၪအီၪလးကၠီၩ့ဒဲ အဂူၫဂၩခရၧၫ့လဖၪ မၩကၧၩ့ထၪ့ဝ့ၫနီၪလီၫႉ

အဝ့ၫၥံၪဖီၩ့ခွံၬအခံၫ့ကကၠၪ ခရၧၫ့ဆၧၥုၪ့ဆၧဒီၩ့ (၄၀) ဘျဲၪ ဂုထၪ့အၪ့ထၪ့လၧ ခးပြ့ၫၥ့ၭ ထၧၫ့ဘံၪ့ယၫဖၧၩ့နီၪလီၫႉ အဝ့ၫအခရၧၫ့ဖိၪလဖၪနီၪ ခးပြ့ၫၥ့ၭ လကၭဒံၭဘၪ ခးၥဲၫထၧၫ့ဘံၫ့ယၫ ဎံၩ့လၩ့ၡီၫၡီၪတၭ ၡၩခံးဂးဆၧမၩလဖၪ မၩဝ့ၫဒၪနီၪလီၫႉ အဝ့ၫယီၩ နံၪ့ ၁၉၃၄နံၪ့နီၪ ၥၫ့ဎွၩပံၫအူၩ (၁၁) နီၪ ရွံထၪ့အဝ့ၫလၧ Blessed ဂီၩ့ ထီၩ့လၧ နံၪ့ ၁၉၆၀နံၪ့နီၪ ၥၫ့ဎွၩ ဂၠံၫ (၂၃) နီၪ ရွံထၪ့အဝ့ၫလၧ ၦလၧအီၪပဒၩ့ထၬ ၦမၩဆၧၩ့ၡၩခံးဂး ၦဆံၫ့ဎံၪလဂၩနီၪအကၠီၩ့ ယရၩလၩ့အ့ၪဘၪနၥံၪလၧ ဆၧအဲၪဆၧကွံၩ ဎိၩဒိၪဖၧၩ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭထီးအလူၬ မွဲနၥံၪလၧၫ့ဎွ့ၩဝ့ၫဒၪလၧ ကဆါဎြံၬ အဆၧအဲၪဆၧကွံၩ ကိၭဒ့ၭကိၭဂၩလါဆံၭႉ